ខេត្តកណ្ដាល ៖ សង្ឃក្លែងក្លាយវ័យចំណាស់ម្នាក់ តាមស្រឡាញ់ស្ត្រីមេម៉ាយ ខឹងគេមិនព្រម ដុតផ្ទះគេចោល ត្រូវសមត្ថកិច្ចចាប់ខ្លួន។ ហេតុការណ៍នេះបានកើតឡើងកាលពីម៉ោង១២ និង១៥នាទីថ្ងៃត្រង់ នាថ្ងៃទី២៥ កក្កដា ២០១៨នេះ នៅចំណុចភូមិអំពិលដាំទឹក ឃុំវិហារហ្លួង ស្រុកពញាឮ ខេត្តកណ្តាល។ អំពើហិង្សានោះបណ្តាលឲ្យស្ត្រីម្នាក់រងគ្រោះមានឈ្មោះ ផាត យេង អាយុ៤៧ឆ្នាំ មុខរបរលក់ផ្លែអំពិល មានទីលំនៅកន្លែងកើតហេតុ។ ចំណែកជនសង្ស័យម្នាក់ឈ្មោះ ឃុន ខេង ភេទប្រុស អាយុ៥៧ឆ្នាំ មុខរបរមិនពិតប្រាកដ (បួសជាសង្ឃក្លែងក្លាយ) ស្នាក់នៅក្នុងវត្តភ្នំតូច សិ្តតក្នុងភូមិរំលេច ឃុំរលាំងចក ស្រុកសំរោងទង ខេត្តកំពង់ស្ពឺ(ត្រូវបានឃាត់ខ្លួន)។
សម្ភារខូចខាតរួមមាន ១.ផ្ទះ១ខ្នងធ្វើពីឈើប្រក់សង្ក័សី ជញ្ជាំងសង្ក័សី ទទឹងប្រវែង៥ម៉ែត្រ បណ្តោយ៧ ម៉ែត្រ កម្ពស់២ម៉ែត្រកន្លះ។ ២-ធុងបាស់០៦គ្រាប់,៣-អំភ្លី០២គ្រឿង,៤-ខ្សែកផ្លាទីន០១ខ្សែ តម្លៃ១២០ដុល្លារ,៥-ប្រាក់រៀល ២០ម៉ឺនរៀល,៦-ទូតាំង០១៧-ទូរទស្សន៍០១គ្រឿង និងសម្ភារប្រើប្រាស់ក្នុងផ្ទះមួយចំនួនទៀត។ ក្រោយពីឃាត់ខ្លួនជនសង្ស័យបានសារភាពថា កន្លងមករូបគេធ្លាប់បានបួសជាព្រះសង្ឃតាំងឆ្នាំ២០០៤ គង់នៅវត្តស្បែង ស្ថិតក្នុងភូមិធ្យូង ឃុំវិហារហ្លួង ស្រុកពញាឮ ខេត្តកណ្តាល បានរយៈពេល២ឆ្នាំ។ រហូតដល់ឆ្នាំ២០០៦ បានមកគង់នៅវត្ត ព្រះវិហារសំណរ រយៈពេល២ឆ្នាំ ដល់ឆ្នាំ២០០៨ ចាប់ផ្តើមស្គាល់ជនរងគ្រោះឈ្មោះ ផាត យេង នៅពេលជនរងគ្រោះទៅឲ្យខ្លួនជួយស្តោះផ្លុំជំងឺដុះដុំគីសនៅក្នុងសុដន់ ហើយជនរងគ្រោះក៏ធ្លាប់បាន ធ្វើម្ហូប(ចង្ហាន់)សម្រាប់ឲ្យខ្លួនឆាន់រៀងរាល់ថ្ងៃ។
តាំងពីពេលនោះមកជនរងគ្រោះ និង ខ្លួនជាសង្ឃក៏បានលួចមានទំនាក់ទំនងស្នេហាជាមួយគ្នារហូតបានរួមភេទជាច្រើនលើកទៀតផង។ ជនសង្ស័យបានសារភាពទៀតថា នៅអំឡុងឆ្នាំ២០១៧ ព្រះចៅអធិការវត្តបានឃើញខ្លួនផឹកស្រា និង មានស្រីធ្វើឲ្យខុសធម៌វិន័យសង្ឃក៏បានចាប់ខ្លួនផ្សឹក។ ក្រោយផ្សឹករួចមកខ្លួនបានគ្រងស្បង់ជីវរ ដោយខ្លួនឯងទៅគង់នៅវត្តភ្នំតូច ឃុំរលាំងចក ស្រុកសំរោងទង ខេត្តកំពង់ស្ពឺ។ នៅពេលនោះជនរងគ្រោះ ក៏មានការទំនាក់ទំនងជាមួយខ្លួនរាប់អានគ្នាជាធម្មតា និងបានទៅលេងសួរសុខទុក្ខដោយរួមដំណើរ ជាមួយប្ដី និងកូន៣លើកក្នុងខណៈនោះខ្លួនបានទិញទូរស័ព្ទម៉ាកសាំងស៊ុង១គ្រឿងតម្លៃ៤០ដុល្លារអាមេរិកឲ្យជនរងគ្រោះប្រើប្រាស់។
នៅថ្ងៃ២៣ ខែកក្កដា ឆ្នាំ២០១៨ វេលាម៉ោង១១ព្រឹក ប្ដីរបស់ជនរងគ្រោះដែលមានឈ្មោះ ឡុង បូរ បានមកជួបខ្លួននៅផ្ទះរួចហើយ ក៏បបួលជនរងគ្រោះមកសាលាឃុំវិហារហ្លួងផ្ដិតមេដៃលែងលះគ្នា ពេលផ្ដិតមេដៃរួច ឈ្មោះ ឡុង បូរ បានត្រឡប់ទៅផ្ទះប្រពន្ធ ចុងនៅក្រុងតាខ្មៅវិញ។ ជនសង្ស័យបន្តទៀតថា លុះដល់ថ្ងៃទី២៤ ខែកក្កដា ឆ្នាំ២០១៨ ឈ្មោះ ឡុង បូរ បានជិះម៉ូតូទៅជួបខ្លួន (ឃុន ខេង) នៅចំណុចវត្តខាងលើ ហើយខ្លួនបានឲ្យលុយជាង២ម៉ឺនរៀលទៅឈ្មោះ ឡុង បូរ ដើម្បីទិញស្រាបៀរផឹកទាំង២នាក់។ ពេលអង្គុយផឹកបណ្តើរឈ្មោះ ឡុង បូរ បាននិយាយពោលពាក្យថា ជនរងគ្រោះ (ផាត យេង) មានការទាក់ទងប្រុសថ្មី ដោយបានយកទូរស័ព្ទដៃឲ្យទៅប្រុសនោះទៀតផង និង បាននិយាយថាចោរលួចបាត់។
លុះដល់វេលាម៉ោង១រសៀលនាថ្ងៃដដែលឈ្មោះ ឡុង បូរ បានបបួលជនសង្ស័យថា អត់ទៅលេងស្រុកទេអី? បន្ទាប់មកឈ្មោះ ឡុង បូរ បានជិះម៉ូតូឌុបខ្លួនទៅដល់ចំណុចវត្តវាំងចាស់ ខ្លួនបានឲ្យឈ្មោះ ឡុង បូរ ជិះម៉ូតូចូលលេងឈ្មោះ មួង សឿង ត្រូវជាព្រះចៅអធិការ គង់នៅក្នុងវត្តវាំងចាស់នោះ រួចក៏បានជជែកគ្នាលេង រហូតវេលាម៉ោង១៧ ឈ្មោះ ឡុង បូរ ក៏បានជិះម៉ូតឌុបខ្លួនទៅក្បែរផ្ទះឈ្មោះ កង កន្និថា ភេទស្រី នៅភូមិឃុំកើតហេតុខាងលើ ចំណែកឈ្មោះ ឡុង បូរ បានជិះម៉ូតូចេញទៅមុនបាត់ទៅ។ ក្រោយមកខ្លួនបានទៅផ្ទះឈ្មោះ ហ៊ូ ភារ៉ា ហៅ កុយ ភេទប្រុស អាយុ៤៩ឆ្នាំ ហើយក៏បានឲ្យលុយទៅឈ្មោះ ហ៊ូ ភារ៉ា ហៅកុយ ដើម្បីទៅទិញស្រាបៀរមកផឹកបន្តទៀត។
ក្នុងពេលកំពុងផឹកវេលាម៉ោង៨យប់ថ្ងៃខែឆ្នាំដដែល ខ្លួនបានដើរទៅរកជនរងគ្រោះនៅផ្ទះ តែពុំបានឃើញជនរងគ្រោះទេ ក៏ដើរត្រឡប់ទៅផ្ទះឈ្មោះ ហ៊ូ ភារ៉ា ហៅកុយ វិញ រហូតដល់វេលាម៉ោង៩យប់ ខ្លួនបានដើរមករកជនរងគ្រោះម្តងទៀត ដោយក្នុងស្ថានភាពស្រវឹង។ រួចខ្លួនបាននិយាយរករឿង សួររកទូរស័ព្ទដៃដែលខ្លួន បានទិញឲ្យជនរងគ្រោះប្រើប្រាស់កន្លងមក តែពេលនោះជនរងគ្រោះ បានប្រាប់ទៅវិញថា ចោរលួចបាត់ហើយ។ ពេលជនរងគ្រោះនិយាយដូច្នោះ ខ្លួនចាប់ផ្តើមខឹងនាងដោយ ក្នុងស្ថានភាពស្រវឹងស្រាផង និងបានធាក់ទៅលើខ្លួនជនរងគ្រោះចំនួន២ជើងចំមុខ និងខ្លួន ដែលជនរងគ្រោះកំពុងដេកនៅក្នុងផ្ទះ។ ពេលនោះជនរងគ្រោះពុំបានតបតជាមួយទេ គេក៏បានតេទូរស័ព្ទហៅឈ្មោះ ឡង់ រដ្ឋា ភេទស្រី អាយុ២៧ ឆ្នាំ(ត្រូវជាកូនស្រីបង្កើត) ឲ្យជិះម៉ូតូមកយកនាងដោយខ្លាចខ្លួនវាយធ្វើបាបទៀត។
បន្ទាប់មកជនរងគ្រោះបានដើរទៅលើថ្នល់ជាតិលេខ៥ ដើម្បីរង់ចាំកូនមកឌុបចេញទៅ ចំណែកខ្លួនបាននៅអង្គុយក្រោមផ្ទះរបស់ជនរងគ្រោះតែម្នាក់ឯង។ សមត្ថកិច្ចបានឲ្យដឹងថា វេលាម៉ោងកើតហេតុខាងលើមានប្រជាពរដ្ឋ បានឃើញផ្ទះរបស់ជនរងគ្រោះត្រូវភ្លើងឆេះ ក្នុងខណៈនោះក៏ឃើញជនសង្ស័យ(ឃុន ខេង) រត់ចេញពីកន្លែងកើតហេតុដើម្បីគេចខ្លួន តែប្រជាពលរដ្ឋមានការសង្ស័យបានរាយការណ៍ទៅសមត្ថកិច្ចប៉ុស្តិ៍រដ្ឋបាលវិហារហ្លួង រួចក៏កម្លាំងសមត្ថកិច្ទនគរបាលប៉ុស្ដិ៍បានចុះទៅដល់ និងបានឃាត់ខ្លួនជនសង្ស័យបញ្ជូនមកកាន់អធិការដ្ឋាននគរបាលស្រុកពញាឮ។ បន្ទាប់មកសមត្ថកិច្ចបានធ្វើតេស្តរកសារធាតុស្រវឹង និងបានប្រគល់ជនសង្ស័យ ជូនទៅឲ្យការិយាល័យធម្មការ និងសាសនាបកស្បង់ចីវរក្លែងក្លាយផ្សឹកចោល ហើយបានប្រគល់ឲ្យសមត្ថកិច្ចជំនាញ ដើម្បីអនុវត្តតាមនីតិវិធី៕
ចែករំលែកព័តមាននេះ