បាងកក-ភ្នំពេញ ៖ ជំងឺមហារីកគឺជាជំងឹធ្ងន់ធ្ងរម្យ៉ាងដែលកំពុងតែឆក់យកជីវិតប្រជាពលរដ្ឋខ្មែរយ៉ាងច្រើន និងស្ងៀមស្ងាត់បំផុត ជាមួយគ្នានោះផងដែរចំនួនអ្នកជំងឺកើតមហារីកចូលសម្រាកនៅមន្ទីរពេទ្យក្នុងស្រុកក៏មានការកើនឡើង ខណៈប្រជាពលរដ្ឋខ្មែរមួយចំនួនក៏បានចាកចេញទៅព្យាបាលនៅក្រៅប្រទេស ។
ជាក់ស្តែងករណីពិនិត្យពិគ្រោះជំងឺមហារីក និងសម្រាកព្យាបាល របាយការណ៍ក្រសួងបានអះអាងថាក្នុងឆ្នាំ2017 ការពិគ្រោះជំងឺមហារីកបានចំនួន 4,352 ករណី ប្រហាក់ប្រហែលនឹងឆ្នាំ2016 ដែរ ។ ផ្ទុយទៅវិញករណីសម្រាកព្យាបាល មានចំនួន 8,360 នាក់ ដោយកើនឡើង 1,675 ករណី បើប្រៀបធៀបនឹងឆ្នាំ2016 និងករណីស្លាប់មានចំនួន 128នាក់ ។
ប្រជាជនកម្ពុជាជាច្រើនបានស្វែងរកការព្យាបាលនៅក្រៅប្រទេស បើសិនជាពួកគេមានលទ្ឋភាព។ សម្រាប់តម្លៃនៃការព្យាបាលជំងឺមហារីក នៅប្រទេសថៃ លោក រ៉ាតាភុង អាមហានវង់ ( Ratapong Ambhanwong) អនុប្រធានមន្ទីរពេទ្យបាងកក (Bangkok Hospital) បានបញ្ជាក់ថា វាអាស្រ័យលើដំណាក់កាលនៃជំងឺ និងស្ថានភាពរបស់អ្នកជំងឺពីម្នាក់ទៅម្នាក់ ព្រោះតម្លៃប្រែប្រួលទៅតាមប្រភេទ និងដំណាក់កាលនៃការព្យាបាល ។
លោក រ៉ាតាភុង អាមហានវង់ ថ្លែងយ៉ាងដូច្នេះថា៖ «នៅពេលអ្នកសួរថា តើវាមានតំលៃប៉ុន្មានសម្រាប់ការព្យាបាលជំងឺមហារីក?នោះគឺវាអាស្រ័យទៅលើអ្នកជំងឺម្នាក់ៗ។ ប្រសិនបើអ្នកជំងឺត្រូវបានរកឃើញជំងឺមហារីក ឧទាហរណ៍ជំងឺមហារីកសុដន់នៅដំណាក់កាលដំបូង នោះតម្លៃនៃការព្យាបាលនឹងមិនខ្ពស់នោះទេ។ វាអាចមានតម្លៃរវាងពី 300.000 បាត (ប្រមាណជាង 9,096.70 ដុល្លារអាមេរិក) ឬ 400.000 បាត (12,128.93 ដុល្លារសហរដ្ឋអាមេរិក) ។
លោកបន្តថា៖ «ប៉ុន្តែប្រសិនបើអ្នកជំងឺត្រូវបានគេធ្វើរោគវិនិច្ឆ័យថា មានជំងឺមហារីកនៃសរីរាង្គណាមួយនៅដំណាក់កាលចុងក្រោយ នោះតម្លៃនៃការព្យាបាលអាចខ្ពស់ ដោយសារពួកគេអាចត្រូវការការវះកាត់ ឬពួកគេប្រហែលជាត្រូវត្រលប់មកព្យាបាលដោយប្រើគីមីវិញ ឬពួកគេប្រហែលជាត្រូវត្រលប់មកវិញដើម្បីព្យាបាលជាតិវិទ្យុសកម្ម (radiation therapy) ។ ដូច្នេះការចំណាយសម្រាប់ការព្យាបាលនឹងខុសគ្នា។ ប៉ុន្តែអ្វីដែលខ្ញុំកំពុងនិយាយនោះគឺថា ប្រសិនបើអ្នកបានរកឃើញជំងឺមហារីករបស់អ្នកនៅដំណាក់កាលដំបូង តម្លៃនៃការព្យាបាលនឹងត្រូវបានបង្រួមជាអប្បបរមា»។
អ្នកនាង មរកត ដែលធ្លាប់យកស្វាមីទៅព្យាបាលនៅក្រៅប្រទេសបានលើកឡើងថា ការចំណាយគឺពិតជាខ្ពស់នៅក្រៅប្រទេស ជាពិសេសប្រទេសដែលបងប្អូនខ្មែរ មិនអាចធ្វើដំណើរបានតាមរថយន្តក្រុង ឬក៏ឡានឈ្នួល តួយ៉ាងប្រទេសសិង្ហបុរី និងឥណ្ឌាជាដើម។
អ្នកនាង មរកត ដែលមានវ័យ ៣៤ ឆ្នាំបានបន្តថា ៖ «ដោយសារតែជំងឺប្តីខ្ញុំ ត្រូវបានធ្វើ រោគវិនិច្ឆ័យឃើញថា កើតមហារីកក្នុងដំណាក់កាលចុងក្រោយនៅមន្ទីរពេទ្យមួយនៅក្រៅប្រទេស គឺខ្ញុំនិងគាត់ពិតជាធ្លាក់ថ្លើមក្តុក ព្រោះសុខភាពគាត់គឺមាំមួន ហើយមិនដែលឈឺថ្កាត់អីសោះ»។ អ្នកស្រីបានបន្ថែមទៀតថា កាលនោះគឺចេញទៅដើរលេងជាមួយមិត្តភ័ក្ត្រក៏ឆ្លៀតពិនិត្យសុខភាព ក៏បានដឹងរឿងអកុសលតែម្តង ។
ជាស្ត្រីម៉េម៉ាយកូនមួយទាំងក្មេងវ័យអ្នកនាង មរកត ក្រោយពីស្វាមីបានស្លាប់ដោយសារតែជំងឺមហារីកជាង១ ឆ្នាំទៅហើយនោះ គឺធ្លាប់ជាស្ត្រីមេផ្ទះដ៏ចំណានមួយរូប តែជីវភាពរបស់អ្នក នាងត្រូវ ប្រែប្រួល ហើយត្រូវធ្វើការតែម្នាក់ឯងដោះបំណុលផង ចិញ្ចឹមកូនផង។
ពោលទាំងទឺកភ្នែករលីងរលោង អ្នកស្រីបានបន្តថា ៖ «ស្វាមីរបស់ខ្ញុំគឺ សម្រេចចិត្តព្យាបាលតាមដំណើរ គឺពិគ្រោះយោបល់ជាមួយគ្រូពេទ្យជំនាញ ស្ថានភាពរបស់គាត់ គឺបានត្រឹមព្យាបាលដើម្បីពន្យាពេលតែប៉ុណ្ណោះ។ ការចេញទៅព្យាបាលនៅក្រៅប្រទេស គឺតាមរយៈមិត្តភ័ក្ត្ររបស់គាត់ដែលត្រូវបានរកឃើញថា មានជំងឺមហារីកដែរ តែមិត្តភ័ក្ត្រប្តីរបស់ខ្ញុំគឺគេនៅដំណាក់កាលដំបូងៗដែលអាចព្យាបាលឲ្យជាដាច់បាន» ។ ដើម្បីកាត់បន្ថយការចំណាយ អ្នកនាង តែងតែអមដំណើរប្តីទៅព្យាបាលនៅក្រៅប្រទេសតាមរយៈការធ្វើដំណើរតាមឡានក្រុង។
អ្នកនាង មរកតត ថ្លែងថា៖ «ការព្យាបាលគឺខ្ពស់នៅក្រៅប្រទេស ព្រោះថ្លៃធ្វើដំណើរ ការហូបចុក និងស្នាក់នៅ គឺត្រូវបង់ថ្លៃទាំងអស់ ជាក់ស្តែងប្តីខ្ញុំបើទោះបីជាចំណាយអស់ប្រមាណជាង ៦ ម៉ឺនដុល្លារ ដោយសារតែការប្រើប្រាស់លុយសន្សំផង លុយបានពីការលក់គ្រឿងអលង្ការផង និងខ្ចីឪពុក-ម្តាយផង ក៏បានត្រឹមពន្យាជីវិតគាត់បាន ៤ ឆ្នាំតែប៉ុណ្ណោះ» ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ