ស្ថានភាពអាកាសធាតុដែលបង្កឱ្យមានភ្លៀងផ្គរ រន្ទះ ខ្យល់កន្ត្រាក់ និងខ្យល់កួច បានបង្កឱ្យមានមហន្តរាយជាបន្តបន្ទាប់ដល់លំនៅឋាន សាលារៀននិងសំណង់ផ្សេងៗទៀត ជាមួយនឹងការរងគ្រោះដោយរន្ទះបាញ់ផងដែរ ។ បើយោងតាមសេចក្តីប្រកាសជូនដំណឹងលើកទី៣របស់ក្រសួងធនធានទឹកនិងឧតុនិយម កាលពីថ្ងៃទី២៦ មីនា ឱ្យដឹងថា ចាប់ពីចុងខែមីនាដល់ចុងខែមេសាខាងមុខនេះ បាតុភូតធម្មជាតិដែលបង្កជាគ្រោះថ្នាក់មួយចំនួននឹងកើតឡើងនៅតំបន់ទំនាបកណ្តាល ដោយត្រូវទទួលរងនូវការធ្លាក់ភ្លៀង ផ្គរ រន្ទះ ខ្យល់កន្ត្រាក់ និងខ្យល់កួច ចំណែកសីតុណ្ហភាពអតិបរមាក៏មានការកើនខ្លាំងដែរ ពី៣៩ទៅ៤០អង្សាសេ ។ តាមប្រភពព័ត៌មានពីខេត្តមួយចំនួនបានឱ្យដឹងថា មហន្តរាយដោយខ្យល់កួចនៅតែបន្តកើតមានមិនឈប់ឈរដែលគ្រាន់តែនៅរសៀលថ្ងៃទី២៥ មីនា លំនៅឋាន និងសំណង់ផ្សេងៗជាង២០០ខ្នងត្រូវខូចខាតនិងបណ្តាលឱ្យរបួសមនុស្សច្រើននាក់ផងដែរ ។
ខាងក្រោមនេះ គឺជាសេចក្តីរាយការណ៍ពីបណ្តាខេត្តដែលជួបគ្រោះមហន្តរាយនៃគ្រោះធម្មជាតិនេះ ។
ខេត្តស្វាយរៀង ៖ មានភ្លៀងធ្លាក់មួយមេធំលាយឡំដោយខ្យល់បោកបក់យ៉ាងខ្លាំង បណ្តាលឱ្យរលំផ្ទះប្រជាពលរដ្ឋអស់២៣ខ្នង និងខូចខាតទ្រព្យសម្បត្តិអស់ជាច្រើន ។ គ្រោះធម្មជាតិនេះក៏បានបណ្តាលឱ្យមនុស្ស២នាក់រងរបួសផងដែរ ។ បើតាមមន្ត្រីអាជ្ញាធរប្រាប់ឱ្យដឹងថា ភ្លៀងមួយមេធំលាយឡំនឹងខ្យល់កួចបណ្តាលឱ្យរលំផ្ទះប្រជាពលរដ្ឋនេះ បានកើតឡើងកាលពីថ្ងៃទី២៥ មីនា វេលាម៉ោង៣និង៣០នាទីរសៀល ។
លោកសរ វណ្ណា នាយកសាខាកាកបាទក្រហមកម្ពុជាខេត្តប្រាប់ឱ្យដឹងថា ខ្យល់ខ្លាំងដែលបណ្តាលឱ្យរលំផ្ទះប្រជាពលរដ្ឋនេះគឺនៅស្រុកស្វាយទាប៣ខ្នង ស្រុកំពង់រោទ៍៣ខ្នង ស្រុករមាសហែកខ្នង ក្រុងស្វាយរៀង ៨ខ្នង និងស្រុកស្វាយជ្រំ១ខ្នង រីឯមនុស្សរងរបួសធ្ងន់ម្នាក់ និងស្រាលម្នាក់ ។ ចំពោះទ្រព្យសម្បត្តិពុំទាន់វាយតម្លៃបានថា ខូចខាតអស់ប៉ុន្មាននៅឡើយទេព្រោះកំពុងធ្វើការវាយតម្លៃ ហើយនៅថ្ងៃទី២៧ មីនា នឹងចុះទៅធ្វើការវាយតម្លៃនិងឧបត្ថម្ភគ្រឿង ឧបភោគបរិភោគជូនប្រជាពលរដ្ឋរងគ្រោះដែលជាអំណោយរបស់សាខាកាកបាទក្រហមកម្ពុជាខេត្តស្វាយរៀង ។
ខេត្តកំពង់ស្ពឺ ៖ ខ្យល់លាយឡំនឹងភ្លៀងបានបំផ្លាញផ្ទះប្រជាពលរដ្ឋឱ្យខូចខាតអស់៣៧ខ្នង នៅភូមិច្រកពពូល ឃុំជម្ពូព្រឹក្ស ស្រុកឧដុង្គ។ បាតុភូតធម្មជាតិបំផ្លាញផ្ទះប្រជាពលរដ្ឋនេះ កើតឡើងកាលពីវេលាម៉ោង៤រសៀលថ្ងៃទី២៥ មីនា ។
តាមប្រជាពលរដ្ឋរស់នៅក្នុងភូមិខាងលើឱ្យដឹងថា នៅវេលាម៉ោងប្រមាណ៤រសៀលនោះមានភ្លៀងធ្លាក់មួយមេយ៉ាងខ្លាំង លុះក្រោយពេលរាំងភ្លៀងគាត់ក្រឡេកមើលទៅក្រៅផ្ទះស្រាប់តែឃើញមេឃខ្មៅងងឹតនិងមានខ្យល់បក់មកយ៉ាងខ្លាំង ។ ពេលនោះខ្យល់បានកួចដំបូលផ្ទះរបស់គាត់ដែលប្រក់ក្បឿងប៉ើងឡើងទៅលើជាច្រើនផ្ទាំងហើយធ្លាក់មកវិញបណ្តាលឱ្យបែកក្បឿងអស់ជាច្រើនសន្លឹក ។
លោក យន់ កល់ អាយុ៣៧ឆ្នាំ បានឱ្យដឹងដែរថា ផ្ទះរបស់គាត់សង់អំពីឈើប្រក់ស័ង្កសីមានទំហំ៥ម៉ែត្រគុណ៦ម៉ែត្រជាប្រភេទផ្ទះ
តៀម ។ ក្រោយពីរាំងភ្លៀង មានខ្យល់បក់មកយ៉ាងខ្លាំងហើយមិនដល់២នាទីផងផ្ទះរបស់គាត់ត្រូវខ្យល់បំបើុងរបើកដំបូលស័ង្កសីនិងសសរឈើមួយដើមហើរទៅធ្លាក់នៅមុខផ្ទះអ្នកភូមិម្នាក់ទៀតរបាត់រប៉ាយពេញដី ចំណែកតួផ្ទះត្រូវខ្យល់កួចរលំបាក់រាបដល់ដី ។ គាត់បន្តថា ក្នុងពេលនោះកូនប្រុសរបស់គាត់ម្នាក់ដែលជ្រកភ្លៀងនៅក្នុងផ្ទះសំណាងល្អគ្មានរងគ្រោះថ្នាក់នោះទេ តែក្នុងហេតុការណ៍នេះក្មេងប្រុសម្នាក់បានរងរបួសបែកក្បាលដោយសារតែបំណែកក្បឿងធ្លាក់ចំដេរអស់៣ថ្នេរផងដែរ ។
នៅព្រឹកថ្ងៃទី២៦ មីនា គេឃើញក្រុមការងារខេត្តចុះទៅដល់ទីនោះដើម្បីស្រង់យកតួលេខនៃការខូចខាតធ្វើរបាយការណ៍ជូនថ្នាក់លើ និងស្នើសុំគោលការណ៍ពីអាជ្ញាធរខេត្តក្នុងការជួយសង្គ្រោះប្រជាពលរដ្ឋដែលរងគ្រោះដោយគ្រោះធម្មជាតិនេះ ។
ខេត្តព្រៃវែង ៖ ភ្លៀងមួយមេធំបានបង្អុរចុះជាមួយនឹងខ្យល់បក់បោកខ្លាំងអស់រយៈពេលជាង២ម៉ោងបណ្តាលឱ្យផ្ទះប្រជាពលរដ្ឋប្រមាណជាង១០០ខ្នង នៅក្នុងស្រុកចំនួន៣ត្រូវរលំនិងប៉ើងខ្ចាត់ខ្ចាយ ។
ព្យុះភ្លៀងដ៏ធំនេះបានចាប់ផ្តើមនៅវេលាម៉ោងប្រមាណជាង៤រសៀល ថ្ងៃទី២៥ មីនា នៅស្រុកចំនួន៣គឺ ស្រុកស្វាយអន្ទរ ស្រុកមេសាង និងស្រុកបាភ្នំ។ តាមមន្ត្រីអ្នកនាំពាក្យសាខាកាកបាទក្រហមកម្ពុជាខេត្តព្រៃវែងឱ្យដឹងថា ព្យុះភ្លៀងមួយមេនេះបណ្តាលឱ្យផ្ទះប្រជាពលរដ្ឋជាង១០០ខ្នងត្រូវដួលរលំ និងបើុងខ្ចាត់ខ្ចាយ ក្នុងនោះស្រុកស្វាយអន្ទរ៩៣ខ្នង ស្រុកមេសាង២៤ខ្នង និងស្រុកបាភ្នំចំនួន១២ខ្នង និងបណ្តាលឱ្យរបួសស្រាលមនុស្សចំនួន២នាក់ និងមេគោផើម១ក្បាល របួសធ្ងន់ ។
គួរកត់សម្គាល់ថា នៅដើមឆ្នាំ២០១៣ នេះសម្រាប់ខេត្តព្រៃវែងគ្រោះធម្មជាតិដែលកើតឡើងហាក់មានភាពសាហាវជាងឆ្នាំមុនៗខ្លាំងណាស់ ដោយគ្រាន់តែមានភ្លៀងធ្លាក់កក់ខែ១មេដំបូងភ្លាម ក៏មានរន្ទះបាញ់ស្លាប់មនុស្សអស់ចំនួន២នាក់ ។ ក្រោយមកមិនទាន់បានប៉ុន្មានផងភ្លៀងធ្លាក់មួយមេទៀតក៏នាំមកជាមួយនូវខ្យល់កួចដ៏ធំ ដែលធ្វើឱ្យមានគ្រោះមហន្តរាយដ៏ធំមិនធ្លាប់មានពីមុនមកសម្រាប់ខេត្តព្រៃវែង ហើយក៏ជាហេតុដែលមិននឹកស្មានដល់ គឺផ្ទះប្រជាពលរដ្ឋរហូតដល់ទៅជាង១០០ខ្នង ត្រូវរលំប៉ើងដំបូលនិងជញ្ជាំងដោយរបួសទាំងមនុស្សនិងសត្វថែមទៀត ។
ទោះជាយ៉ាងណាក៏ដោយសាខាកាកបាទក្រហមកម្ពុជាខេត្តព្រៃវែង កំពុងតែមមាញឹកក្នុងការចុះប្រមូលស្ថិតិជនរងគ្រោះដើម្បីរៀបចំគម្រោងនាំយកអំណោយសង្គ្រោះរបស់កាកបាទក្រហមទៅចែកជូនដល់ប្រជាពលរដ្ឋដែលរងគ្រោះដោយសារតែគ្រោះធម្មជាតិនេះ ។
ខេត្តតាកែវ ៖ គ្រោះធម្មជាតិដ៏ធំមួយបានកើតឡើងនៅរសៀលថ្ងៃទី២៥ មីនា នៅឃុំអូរសារាយ ស្រុកត្រាំកក់ ក្បែរតំបន់ខ្ពបត្របែក ។ តាមលោកចេង ចិត្រា អធិការរងនគរបាលស្រុកត្រាំកក់ទទួលបន្ទុករដ្ឋបាលឱ្យដឹងថា នៅវេលារសៀលនោះមានភ្លៀង ផ្គរ រន្ទះបានបក់បោកខ្លាំង បណ្តាលឱ្យរំលំផ្ទះប្រជាពលរដ្ឋអស់២៨ខ្នង ។
ខេត្តកណ្តាល ៖ ភ្លៀងមួយមេមិនជាខ្លាំងនោះទេ តែលាយឡំជាមួយនឹងខ្យល់បោកបក់យ៉ាងខ្លាំងបណ្តាលឱ្យលំនៅឋានមួយចំនួននិងរោងមាន់ប្រជាពលរដ្ឋព្រមទាំងដើមឈើ និងបង្គោលភ្លើង ស្ថិតនៅក្នុងភូមិសាស្ត្រឃុំដំណាក់អំពិល ស្រុកអង្គស្នួល បើុងដំបូលនិងដួលរលំជាបន្តបន្ទាប់ ប៉ុន្តែសំណាងល្អមិនបណ្តាលឱ្យមានមនុស្សណាម្នាក់រងរបួសឡើយ ។
ហេតុការណ៍នេះបានកើតឡើងកាលពីល្ងាចថ្ងៃទី២៥ មីនា នៅក្នុងភូមិសេរីសុខា និងភូមិក្តាន់ ព្រមទាំងភូមិមួយចំនួនទៀតស្ថិតក្នុងឃុំដំណាក់អំពិល ។ ប្រជាពលរដ្ឋបានឱ្យដឹងថា រយៈពេលប៉ុន្មានខែក្នុងរដូវប្រាំងឆ្នាំ២០១៣ នេះ មេឃមិនដែលមានធ្លាក់ភ្លៀងកក់ខែទេ អាកាសធាតុមានសភាពក្តៅហួតហែង ទើបតែនៅល្ងាចថ្ងៃទី២៥ មីនា មេឃបានចាប់ផ្តើមងងឹតហើយមានភ្លៀងធ្លាក់កក់ខែមកតិចៗ ស្របពេលនោះដែរស្រាប់តែមានលាយឡំមកជាមួយនូវខ្យល់បក់បោកយ៉ាងខ្លាំង ។ ខណៈនោះធ្វើឱ្យផ្ទះសម្បែងរបស់ប្រជាពលរដ្ឋចំនួន១០ខ្នងត្រូវប៉ើងដំបូលក្នុងនោះមានផ្ទះប្រក់ដំបូលក្បឿង និងដំបូល ស័ង្កសី ព្រមទាំងមានរោងមាន់ចំនួនបីខ្នងដែលក្នុងមួយខ្នងៗទំហំ៨ម៉ែត្រគុណនឹង១៥០ម៉ែត្រត្រូវរលំបាក់រាបដល់ដី ។ ក្រៅពីនេះ ក៏នៅមានបង្គោលភ្លើងមួយចំនួនត្រូវដួលរលំដែរ ។
ខេត្តបន្ទាយមានជ័យ ៖ កាលពីវេលាម៉ោង៣និង១៥នាទីរសៀលថ្ងៃទី២៤ មីនា ប្រជាពលរដ្ឋនៅស្រុកថ្មពួកជួបនឹងគ្រោះមហន្តរាយម្តងទៀត ដែលនេះជាលើកទី២ ដោយសារខ្យល់កំណាចបានបោកបក់បណ្តាលឱ្យខូចខាតលំនៅឋានប្រជាពលរដ្ឋ៤ឃុំ គឺឃុំគំរូ ឃុំភូមិថ្មី ឃុំគោករមៀត និងឃុំថ្មពួក សរុបចំនួន៥២ខ្នង សាលារៀន៤ខ្នង និងរបួសមនុស្សម្នាក់បែកក្បាល ។
យោងតាមរបាយការណ៍របស់អធិការនគរបាលស្រុកថ្មពួកបានឱ្យដឹងថា មុនពេលកើតមានខ្យល់កួចនោះ ផ្ទៃមេឃមានពពកដុំខ្មៅមើលទៅគួរឱ្យខ្លាច ។ ស្រាប់តែបន្តិចក្រោយមកក៏មានខ្យល់បានបោកបក់យ៉ាងខ្លាំងមកពីទិសខាងលិច ដោយបានផ្តួលរំលំផ្ទះប្រជាពលរដ្ឋជាបន្តបន្ទាប់លាយឡំជាមួយភ្លៀងផ្គររន្ទះគួរឱ្យតក់ស្លុតបំផុត។
ប្រភពដដែលបានឱ្យដឹងទៀតថា ផ្ទះប្រជាពលរដ្ឋដែលរងនូវការខូចខាតនេះមានឃុំភូមិថ្មីមាន២ភូមិ គឺភូមិកាប់ចោរ និងភូមិគោកស្វាយ សរុបចំនួន៤ខ្នង របើកដំបូល ឃុំគំរូមានភូមិឯកភាព ភូមិគំរូ ភូមិអណ្តូងខ្លុង និងភូមិផ្សារថ្មី សរុប៣៦ខ្នង របើកដំបូល៣០ខ្នង និងធ្លាក់ពីលើជើងតាង៦ខ្នង មានសាលារៀន២អគាររបើកដំបូល ឃុំថ្មពួកមាន២ភូមិគឺភូមិកសិណនិងភូមិថ្មពួករបើកដំបូលសរុប៨ខ្នង ក្នុងនោះផ្ទះ៤ខ្នង សាលារៀន២ខ្នង និងរន្ទះបាញ់កាំជណ្តើរខូច១ និងឃុំគោករមៀតនៅភូមិស្រែល្អរបើកដំបូល១១ខ្នង ធ្លាក់ពីលើជើងតាង១ខ្នង ។ សរុបទាំងអស់ផ្ទះចំនួន៥២ខ្នង ខូចខាតធ្ងន់៧ខ្នង សាលារៀន៤ខ្នង នៅស្រុកថ្មពួកនេះ ។
បើយោងតាមរបាយការណ៍សរុបជាមួយនឹងលើកទី២នេះ លំនៅឋានរបស់ប្រជាពលរដ្ឋចំនួន៣៤៣ខ្នងដែលរងការខូចខាតដោយសារខ្យល់ព្យុះ មនុស្សស្លាប់ម្នាក់ដោយសាររន្ទះបាញ់ និងរបួសធ្ងន់ស្រាលចំនួន៣នាក់ ។ តែបើយើងគិតទូទាំងខេត្តបន្ទាយមានជ័យដែលរងគ្រោះដោយធម្មជាតិខ្យល់ព្យុះនេះ គឺចំនួន៤៤៣ខ្នងដែលខូចខាតមានសាលារៀន៧ខ្នង មនុស្សរបួសចំនួន៤នាក់ និងស្លាប់២នាក់ដោយសាររន្ទះបាញ់ ។
ខេត្តមណ្ឌលគិរី ៖ ភ្លៀង១មេនិងមានខ្យល់បោកបក់ខ្លាំងផង បានបណ្តាលឱ្យផ្ទះឈើប្រក់សង័្កសី និងស្បូវបីខ្នងដួលបាក់រលំនិងប៉ើងដំបូល កាលពីថ្ងៃទី២៦ មីនា ២០១៣ វេលាម៉ោងជិត៤រសៀល នៅភូមិពូតាំង ឃុំពូជ្រៃ ស្រុកពេជ្រាដា។ ក្នុងហេតុការណ៍ខាងលើបានបណ្តាលឱ្យមនុស្សចំនួនបីនាក់រងរបួសស្រាល រួមនឹងរបស់របរមួយចំនួនខូចខាតស្ទើរទាំងស្រុង ។
ជនរងគ្រោះឈ្មោះតុប ផា ភេទប្រុស អាយុ៥៣ឆ្នាំ បាននិយាយថា មុនពេលកើតហេតុគាត់បានសង្កេតឃើញផ្ទៃមេឃមានពពកខ្មៅដុំៗ ក្រោយបន្តិចមកស្រាប់តែពពកខ្មៅទាំងនោះប្រមូលផ្តុំបង្កើតទៅជាភ្លៀងខ្យល់ខ្លាំងបក់មកលើផ្ទះរបស់កូនគាត់ ខណៈពេលកំពុងអង្គុយលេងជាមួយចៅនិងកូនៗ ។ បុរសវ័យចំណាស់ដដែលបានបន្តថា ភ្លាមៗនោះខ្យល់ក៏បានបក់របើកដំបូលផ្ទះ ហើយដោយសារតែភ័យខ្លាចខ្លាំងពេក គាត់ក៏ចាប់ស្រវាបីចៅរត់ចេញជាមួយកូន ពីក្នុងផ្ទះ តែដោយល្បឿនខ្យល់ខ្លាំងពេកផ្ទះក៏ដួលរលំបាក់ ។
មនុស្សបីនាក់ដែលរងរបួសក្នុងហេតុការណ៍ខាងលើបានបញ្ជាក់ថា ពួកគាត់ពុំមែនរបួសដោយផ្ទះសង្កត់នោះទេ តែបណ្តាលមកពីពួកគាត់ភ័យខ្លាំងពេក ក្នុងពេលកំពុងរត់ចេញពីផ្ទះដែលរៀបនឹងដួលរលំនោះ ។ ជនរងគ្រោះមានឈ្មោះតុប ផា ភេទប្រុស អាយុ៥៣ឆ្នាំ ប្រពន្ធឈ្មោះឡឹង ជីម អាយុ៤៩ឆ្នាំ និងចៅតូចម្នាក់ ។ អ្នកទាំងបីនាក់បានរងរបួសស្រាលត្រង់ចង្កេះ កែងដៃ និងជង្គង់ ជាអ្នកភូមិពូតាំង ឃុំពូជ្រៃ ស្រុកពេជ្រាដា ។
យោងតាមបុរសឈ្មោះឆុំ ភើន អាយុ២៩ឆ្នាំ ត្រូវជាកូនជនរងគ្រោះ និងជាម្ចាស់ផ្ទះកើតហេតុបានឱ្យដឹងថា ផ្ទះរបស់គាត់សង់អំពីឈើប្រក់ស្បូវ មានទំហំ៦ម៉ែត្រគុណនឹង៧ម៉ែត្រ ដោយសង់នៅលើដីជួលពីគេ ។ ចំណែកទ្រព្យសម្បត្តិដែលមាននៅក្នុងផ្ទះរងការខូចខាតស្ទើរទាំងស្រុងដូចជា ម៉ូតូមួយគ្រឿង ពូជសណ្តែកសៀងនិងសណ្តែកដីចំនួន៥បាវ និងសម្ភារផ្សេងៗជាច្រើនទៀត ។
ខេត្តក្រចេះ ៖ បុរសម្នាក់ក្នុងចំណោមបួននាក់ បានស្លាប់បាត់បង់ជីវិតភ្លាមៗនៅកណ្តាលវាលស្រែខាងក្រោយផ្ទះ ខណៈជនរងគ្រោះកំពុងដើរឆ្លុះកង្កែបពេលមេឃកំពុងភ្លៀងក៏ត្រូវរន្ទះបាញ់ ។ គ្រោះធម្មជាតិដែលបណ្តាលឱ្យមានមនុស្សស្លាប់នេះ បានកើតឡើងកាលពីវេលាម៉ោង៨យប់ថ្ងៃទី២៦ មីនា នៅកណ្តាលវាលស្រែខាងក្រោយផ្ទះជនរងគ្រោះ ស្ថិតក្នុងភូមិច្រវា៉ ឃុំកន្ទួត ស្រុកចិត្តបុរី ។
លោកអនុសេនីយ៍ទោភី គា នាយប៉ុស្តិ៍រដ្ឋបាលកន្ទួត ឱ្យដឹងថា បុរសរងគ្រោះឈ្មោះមិះ សុខា អាយុ២៨ឆ្នាំ មានប្រពន្ធនិងកូនពីរនាក់នៅក្នុងបន្ទុក ។ ជនរងគ្រោះត្រូវរន្ទះបាញ់ចំភ្លើងគោម ដែលពាក់នៅលើក្បាល បណ្តាលឱ្យឆេះខ្មៅរោលពេញរាងកាយ និងស្លាប់ភ្លាមមួយ រំពេច ។
តាមសេចក្តីរាយការណ៍របស់នគរបាលខេត្តឱ្យដឹងថា កាលពីយប់ថ្ងៃទី២៦ មីនា នោះមានគ្រោះធម្មជាតិចំនួនបីកន្លែង បានកើតឡើង គឺករណីរន្ទះបាញ់មនុស្សស្លាប់នៅឃុំកន្ទួត ស្រុកចិត្របុរី ខ្យល់កួចបំប៉ើងដំបូលផ្ទះមួយខ្នងធ្វើអំពីឈើប្រក់ស័ង្កសី ទំហំ៦ម៉ែត្រគុណ៥ម៉ែត្រនៅក្នុងឃុំសំបូរ ស្រុកសំបូរ និងអគ្គិភ័យ លេបត្របាក់ផ្ទះឈើប្រក់ស្បូវមួយខ្នង នៅក្នុងឃុំចង្ក្រង ស្រុកចិត្របុរី បណ្តាលមកពីភ្លើងឆេះព្រៃ ធ្វើឱ្យខូចខាតទ្រព្យសម្បត្តិលុយកាក់មួយចំនួនធំផងដែរ ។
ខេត្តពោធិ៍សាត់ ៖ កាលពីថ្ងៃទី២៦ មីនា នៅស្រុកក្រគរ មានភ្លៀងធ្លាក់មួយមេយ៉ាងខ្លាំងតាំងពីម៉ោង១ដល់ម៉ោង៣រសៀល និងមានខ្យល់ព្យុះបោកបក់បណ្តាលឱ្យខូចខាតផ្ទះប្រជាពលរដ្ឋអស់ចំនួន៨៣ខ្នង អគារសិក្សា៤ខ្នង បាក់ដើមត្នោត១៥ដើម និងរលំងាប់គោមួយក្បាល ប៉ុន្តែមិនមានគ្រោះថ្នាក់ដល់មនុស្សណាម្នាក់ទេ ។
តាមលោកទឹម សារិន អភិបាលស្រុកក្រគរឱ្យដឹងថា ខ្យល់កួចបានបោកបក់លើឃុំចំនួន៣គឺឃុំក្បាលត្រាចអស់ផ្ទះ១០ខ្នង ឃុំអន្លង់ត្នោត ១៧ខ្នង និងឃុំកំពង់លួង៥៦ខ្នង សរុប៨៣ខ្នង ក្នុងនោះខូចខាតទាំងស្រុង១៤ ខ្នង ។ ផ្ទះទាំងអស់នោះធ្វើអំពីឈើប្រក់ក្បឿង ប្រក់ស័ង្កសី និងប្រក់ស្លឹក ខ្លះរបើកដំបូល ប៉ើងជញ្ជាំង ទ្រេតធ្លាក់ពីជើងតាង ហើយឃុំកំពង់លួងខូចខាតច្រើនជាងគេរហូតដល់ទៅ៥៦ខ្នង ទាំងផ្ទះចល័ត ផ្ទះលើទូកនិងផ្ទះលើគោក ដោយនៅទីនោះចំមុខខ្យល់លំហបឹងទន្លេសាប និងផ្ទះបណ្តែតទឹក ។ លោកអភិបាលស្រុកបន្តថា នៅថ្ងៃទី២៦ មីនា នោះ ចាប់ពីម៉ោង១ដល់ម៉ោង៣រសៀល ភ្លៀងធ្លាក់ខ្លាំងណាស់នៅស្រុកក្រគរ និងមានខ្យល់បោកបក់ខ្លាំងប៉ើងដំបូល ជញ្ជាំង និងរលំផ្ទះប្រជាពលរដ្ឋនៅក្នុងឃុំខាងលើ មិនតែប៉ុណ្ណោះមានធ្លាក់ព្រិល ហើយគោមួយក្បាលដែលងាប់នោះគឺដោយសារដើមត្នោតរលំសង្កត់លើ ។
នៅវេលាម៉ោង២រសៀលថ្ងៃទី២៧ មីនា សាខាកាកបាទក្រហមកម្ពុជាខេត្តបាននាំយកអំណោយទៅផ្តល់ជូនជនរងគ្រោះដោយខ្យល់ព្យុះនៅស្រុកក្រគរដែលមាន អង្ករ មី ត្រីខ សារុង ក្រមា មុង តង់ ភួយ និងថវិកាមួយចំនួន ដើម្បីសង្គ្រោះបន្ទាន់តាមគោលការណ៍របស់កាកបាទក្រហម ដែលដឹកនាំដោយលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ។
លោកវ៉ាន់ ហ៊ាង នាយកប្រតិបត្តិសាខាកាកបាទក្រហមកម្ពុជាខេត្ត បានប្រាប់កោះសន្តិភាពថា តាមការពិនិត្យជាក់ស្តែងដល់កន្លែងកើតហេតុ ផ្ទះប្រជាពលរដ្ឋដែលខូចខាតទាំងស្រុងមានតែ៣៧គ្រួសារប៉ុណ្ណោះ ក្រៅពីនោះគ្រាន់តែរបើកដំបូលឬជញ្ជាំងបន្តិចបន្តួចគឺពុំមានអ្វីធ្ងន់ធ្ងរនោះទេ ។
ខេត្តព្រះវិហារ ៖ ភ្លៀងធ្លាក់យ៉ាងខ្លាំងលាយឡំនឹងខ្យល់បោកបក់ជាមួយនឹងរន្ទះបាញ់ឆុងឆាំងបានវាយប្រហារទៅលើក្រុងព្រះវិហារ បណ្ដាលឱ្យលំនៅឋានប្រជាពលរដ្ឋរងគ្រោះមហន្តរាយយ៉ាងធ្ងន់ធ្ងរខូចខាតទ្រព្យសម្បត្តិសាធារណៈ និងប៉ាណូមួយចំនួនរួមទាំងដំបូលសាលាខេត្តព្រះវិហារផងដែរ ។ នេះបើតាមរបាយការណ៍របស់សមត្ថកិច្ចប៉ូលិសក្រុងព្រះវិហារបានឱ្យដឹង ។
ហេតុការណ៍ខាងលើនេះបានកើតឡើងកាលពីវេលាម៉ោង៥ និង៣០នាទីរសៀលថ្ងៃទី២៦ មីនា បង្កឱ្យមានលំនៅឋានស័ង្កសីរលំអស់ចំនួន១២ខ្នង របើកដំបូលអស់៨៨ខ្នង ដាច់សំយាបបើងអស់៤ខ្នង និងមនុស្ស២នាក់រងរបួសស្រាល ព្រមទាំងខូចខាតសម្ភារប្រើប្រាស់មួយចំនួន ។
ក្រោយពីហេតុការណ៍នោះកើតឡើងសាខាកាកបាទក្រហមខេត្ត ក៏នាំយកនូវគ្រឿងឧបភោគបរិភោគទៅចែកជូនអ្នករងគ្រោះទាំងនោះផងដែរ ។ ប្រជាពលរដ្ឋរស់នៅក្នុងខេត្តព្រះវិហារបានឱ្យដឹងដែរថា មុនឧបទ្ទវហេតុនេះកើតឡើងមួយម៉ោងផ្ទៃមេឃក្ដៅខ្លាំង ហើយមានពណ៌ខ្មៅ ។ បន្ទាប់មកនៅលើផ្ទៃមេឃបានលាន់ស្នូរផ្គររន្ទះកក្រើកមេឃទើបមានភ្លៀងធ្លាក់លាយឡំជាមួយខ្យល់កួចអស់រយៈពេលប្រហែលជាងមួយម៉ោងទើបបានស្ងប់ស្ងាត់ទៅវិញ ។ នេះគឺជាលើកទីមួយហើយដែលមានគ្រោះធម្មជាតិគួរឱ្យភ័យខ្លាចបែបនេះនោះ ៕
ចែករំលែកព័តមាននេះ