រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានឲ្យដឹងថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦មានភ្នាក់ងារគណបក្សនយោបាយជិត៨ម៉ឺននាក់ មកពីគណបក្សនយោបាយចំនួន១៤ចូលរួមសង្កេតការណ៍ ។
យោងតាមសេចក្តីជូនដំណឹងរបស់ គ.ជ.ប បានឲ្យដឹងថា គ.ជ.ប បានទទួលស្គាល់ជាផ្លូវការភ្នាក់ងារគណបក្សនយោបាយសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ឆ្នាំ ២០១៨ ដែលនឹងប្រព្រឹត្តិទៅនៅថ្ងៃទី២៩ ខែកក្ដដា ឆ្នាំ២០១៨ខាងមុខនេះមានចំនួន៧៩៨ ៤៩នាក់ ក្នុងនោះស្រីមានចំនួន១៨២០៣នាក់ ។ សម្រាប់ការបោះឆ្នោតនៅពេលខាងមុខនេះត្រូវបាន គ.ជ.ប បានឲ្យដឹងថា មានគណបក្ស នយោបាយចំនួន១៤ប៉ុណ្ណោះបានដាក់ភ្នាក់ងារសង្កេតការណ៍ក្នុងចំណោមគណបក្សនយោ បាយ២០ដែលដាក់បេក្ខជនឈរឈ្មោះ ជាអ្នកតំណាងរាស្ត្រ(គណបក្ស៦មិនបានដាក់ភ្នាក់ងារ) ។
សូមជម្រាបថា ក្រៅពីទទូលស្គាល់ភ្នាក់ងារសង្កេតការណ៍របស់គណបក្សនយោបាយ គ.ជ.ប ក៏បានសម្រេចអនុញ្ញាតឱ្យអ្នកសង្កេតការណ៍ជាតិនៃសមាគមអង្គការមិនមែនរដ្ឋាភិបាល ប្រមាណជិត៨០.០០០នាក់មកពី១០៧ស្ថាប័ន(គិតត្រឹមថ្ងៃទី១៦ កក្កដា ឆ្នាំ២០១៨) ។ ចំណែកអ្នកសង្កេតការអន្តរជាតិវិញត្រូវបានអ្នកនាំពាក្យគណៈកម្មាធិការជាតិរៀបចំការបោះឆ្នោតអះអាងថា អាចនឹងមានអ្នកសង្កេតការណ៍អន្តរជាតិប្រមាណជាង២០០នាក់ មកពី១៩ស្ថាប័ន ។ ក្នុងពិធីជួបសំណេះសំណាលជាមួយសមាជិក-សមាជិកាគណបក្សប្រជាជនកម្ពុជាស្រុកសំឡូត ខេត្តបាត់ដំបង កាលព្រឹកថ្ងៃទី២៣ ខែកក្កដា ឆ្នាំ២០១៨ សម្ដេចក្រឡាហោម ស ខេង ឧបកនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃនឹងជួបសំណេះសំណាលជាអ្នកអន្តរជាតិផងដែរ ។
សម្តេចបញ្ជាក់ថា«ខ្ញុំនឹងទទួលសម្ដែងការគួរសមពីសំណាក់អ្នកសង្កេតការណ៍អន្ដរជាតិដែលមកចូលរួមសង្កេតការណ៍បោះឆ្នោតនៅថ្ងៃទី២៨ កក្កដា» ។
សម្ដេចបន្ដថា នេះសបញ្ជាក់ឲ្យឃើញការបោះឆ្នោតមានការចូលរួមពីអ្នកសង្កេតការណ៍អន្តរជាតិច្រើន ។ ប្រសិនបើពួកគេមិនផ្ដល់តម្លៃឲ្យកម្ពុជាពួកគេមិនចំណាយពេលវេលាមកសង្កេតការណ៍នៅកម្ពុជាឡើយ ដូច្នេះការបោះឆ្នោតនេះនឹងប្រព្រឹត្តិទៅដោយរលូន ។ ឆ្លៀតឱកាសនោះផងដែរសម្តេចក៏បានលើកឡើងថា កម្ពុជារៀបចំការបោះឆ្នោតនាពេលខាងមុខមានក្រុមមួយចំនួនតូចបានរំខានការបោះឆ្នោតនៅកម្ពុជា ប៉ុន្តែការរំខានយ៉ាងណាក៏ដោយក៏មិនអាចរារាំងបានដែរ ៕
ចែករំលែកព័តមាននេះ