ខេត្តក្រចេះ ៖ សាច់សត្វព្រៃ និងសត្វព្រៃជាច្រើនប្រភេទត្រូវគេរាយការណ៍ថា កំពុងតែ ដាក់លក់យ៉ាងអនាធិបតេយ្យជាចំហរពីអាជីវកដែលភាគច្រើនជនជាតិវៀតណាមនៅផ្សារ សាមគ្គីក្រុងក្រចេះដែលជំនួញខុសច្បាប់នេះបាន និងកំពុងតែធ្វើឲ្យសាធារណៈ ជនរិះគន់មកលើអាជ្ញាធរថា គ្មានចំណាត់ការ…
ខេត្តក្រចេះ ៖ សាច់សត្វព្រៃ និងសត្វព្រៃជាច្រើនប្រភេទត្រូវគេរាយការណ៍ថា កំពុងតែ ដាក់លក់យ៉ាងអនាធិបតេយ្យជាចំហរពីអាជីវកដែលភាគច្រើនជនជាតិវៀតណាមនៅផ្សារ សាមគ្គីក្រុងក្រចេះដែលជំនួញខុសច្បាប់នេះបាន និងកំពុងតែធ្វើឲ្យសាធារណៈ ជនរិះគន់មកលើអាជ្ញាធរថា គ្មានចំណាត់ការ ខណៈដែលការដាក់លក់ត្រូវគេដឹងថា កើតមានជាយូរមកហើយនោះ ។
សាច់សត្វព្រៃជាច្រើនប្រភេទក្នុងនោះភាគច្រើនមាន ៖សាច់ឈ្លុស ជ្រូកព្រៃ អណ្តើក ត្រកួត កន្ឋាយ គឺត្រូវបានឈ្មួញកំពុងតែដាក់ទិញលក់យ៉ាងចំហរនៅកណ្តាលផ្សារជារៀងរាល់ថ្ងៃ ពិសេសនៅពេលព្រឹក គឺគ្មានការញញើត និងចំនួញខុសច្បាប់មួយនេះនោះទេ ។
សេចក្តីរាយការណ៍ពីអាជីវករលក់ត្រីនៅក្នុងផ្សារក្បែរ និងបណ្តុំលក់សាច់សត្វព្រៃបាន ប្រាប់ឲ្យដឹងថា មួយថ្ងៃៗមានសត្វព្រៃរាប់រយគីឡូក្រាមត្រូវបានឈ្មួញយកមកវះដាក់លក់នៅ តាមតូបលក់ក្នុងផ្សារត្រី ។ សាច់សត្វទាំងនោះមានភាគច្រើន សាច់ឈ្លូស ជ្រូកព្រៃ ប្រើស អណ្តើក កន្ឋាយ និងសត្វត្រកួត ។ ពួកគាត់ថា អ្នកលក់សាច់ព្រៃនេះភាគច្រើនជាជនជាតិវៀតណាម ហើយការលក់នេះ មិនមានការលាក់លាមអីនោះទេ ។ ពួកគាត់ថា សត្វព្រៃទាំងនេះ ភាគច្រើន គឺរងការជាប់អន្ទាក់ដោយឆក់ខ្សែភ្លើង ។ ដោយឈ្មួញខ្មែរបានយកមកបោះដុំឲ្យ អាជីវករវៀតណាម ដើម្បីកាត់លក់រាយនៅក្នុងផ្សារ ។
ក្រោយការធ្វើអាជីវកម្មកលក់សាច់សត្វព្រៃមានរយៈពេលជាយូរមកហើយនោះ ។ នៅថ្ងៃ ទី២២ កក្កដា មានការបង្ហោះរូបជាច្រើនសន្លឹកសារជាថ្មី ពីសកម្មភាពការកាប់ពន្លះសាច់សត្វ ឈ្លូសដ៍ធំមួយក្បាលរបស់ស្ត្រីជនជាតិវៀតណាមម្នាក់ ដើម្បីដាក់លក់យ៉ាងចំហរនៅកណ្តាល ផ្សារបានធ្វើឲ្យមានការភ្ញាក់ផ្អើល ។
ជុំការធ្វើជំនួញខុសច្បាប់របស់អាជីវករវៀតណាមនេះនាយសង្កាត់រដ្ឋបាលព្រៃឈើ ក្រចេះ លោក ម៉ី វុទ្ឋី បានឲ្យដឹងថា មេព្រៃបានចុះទៅពិនិត្យមើលដល់ទីតាំងតូបលក់នោះតែ មិនជួបប្រទះនោះទេ ខណៈការលក់បានធ្វើឡើងលឿនពេក ។ លោកនាយសង្កាត់ថា ខាង អាជ្ញាធរ មេព្រៃ និងចុះទៅធ្វើការផ្សព្វផ្សាយច្បាប់ស្តីពីសត្វព្រៃឲ្យបានទូលំទូលាយនៅក្នុងផ្សារ ដែលជាកន្លែងគោលដៅលក់សាច់ព្រៃឲ្យពួកគាត់យល់ជ្រួតជ្រាបឲ្យឈប់បន្តធ្វើអាជីវកម្ម ជំនួញខុសច្បាប់នេះទៀត ។ លោកអះអាងថា ក្រោយការចុះផ្សព្វផ្សាយកម្លាំងសមត្ថកិច្ច និងបន្តឃ្លាំមើល ប្រសិនបើរកឃើញថា ពួកគាត់នៅតែប្រព្រឹត្តជំនួញនេះទៀត គឺសមត្ថកិច្ច នឹងមានវិធានការតាមផ្លូវច្បាប់ ៕
ចែករំលែកព័តមាននេះ