ខេត្តកំពង់ចាម ៖ ក្រុមការងារចុះពង្រឹងមូលដ្ឋានស្រុកអូររាំងឪ កាលពីថ្ងៃទី២៥ មីនា បានប្រារព្ធពិធីបុណ្យតាមទំនៀមទម្លាប់មួយ ហៅបុណ្យសាមគ្គីនៅភូមិព្រះធាតុថ្មដា ឃុំព្រះធាតុ ។ វត្តមានក្នុងពិធីផ្តួចផ្តើមធ្វើបុណ្យនោះមានលោកជំទាវសាន្ត អរុណ រដ្ឋលេខាធិកាក្រសួងកិច្ចការនារី លោកជំទាវលឹម ហ៊ន់ កងណែម លោកជំទាវឧកញ៉ាយីន ផាន្នី លោក ឯម សុគន្ធ ជំនួយការលោកសាយ សំអាល់ ប្រធានក្រុមការងារចុះជួយស្រុកអូររាំងឪ ព្រមទាំងសមាជិកគណៈពង្រឹងមូលដ្ឋានច្រើននាក់ទៀត ។ រដ្ឋអំណាចចូលរួមមាន លោកឯម ដេត សមាជិកក្រុមប្រឹក្សាខេត្ត អភិបាលស្រុកព្រមទាំងប្រជាពលរដ្ឋរាប់រយនាក់ ។
លោកជំទាវលឹម ហ៊ន កងណែម ដែលជាអ្នកផ្តួចផ្តើមកម្មវិធីបុណ្យនេះមានប្រសាសន៍ឱ្យដឹងថា នៅកន្លែងដែលប្រារព្ធធ្វើបុណ្យនេះ ជាកន្លែងដែលប៉ុល ពត តាមសម្លាប់លោកជំទាវផ្ទាល់តែសំណាងត្រូវបានប្រជាជន ដែលស្រលាញ់បានជួយយកមកលាក់នៅកន្លែងសុវត្ថិភាពមួយ គេចផុតពីការតាមសម្លាប់ ហើយក៏ដោយសារគុណបុណ្យដ៏ថ្លៃថ្លារបស់គណបក្សប្រជាជនដែលមានសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានរំដោះប្រទេសជាតិធ្វើឱ្យរស់រានមានជីវិតរហូតមកដល់សព្វថ្ងៃ ។
លោកជំទាវលឹម ហ៊ន កងណែម មានប្រសាសន៍បន្តថា ក្នុងពេលដែលប្រទេសរបស់យើងធ្លាក់ក្នុងរបប៣ឆ្នាំ៨ខែ២០ថ្ងៃ ប្រជាពលរដ្ឋស្លូតត្រង់ សូម្បីតែប្អូនស្រីផ្ទាល់ម្នាក់ និងក្រុមសាច់ញាតិត្រូវបានគេយកទៅសម្លាប់ចោល ។ ក្នុងពេលនោះម្នាក់ៗ បានលើកដៃប្រណមសំពះបន់ស្រន់ សូមឱ្យទេវតាមេត្តាជួយដល់ពួកគាត់ផង នូវទីបំផុតទេវតាពីតជាបានជួយមែន នោះគឺគណបក្សប្រជាជនកម្ពុជាបានរំដោះប្រទេសជាតិ រហូតទទួលបានជ័យជំនះថ្ងៃទី៧ មករា ១៩៧៩។ជាមួយនោះដែរសូមឱ្យបងប្អូនត្រូវតែចេះរួបរួមសាមគ្គីគ្នាឡើងវិញ ព្រោះដំណាក់កាលបោះឆ្នោត ជ្រើសរើសតំណាងរាស្ត្រនៅក្នុងខែកក្កដា ខាងមុខកាន់តែខិតកៀកមកដល់ ហើយសូមនាំគ្នាបោះឆ្នោតជូនគណបក្សប្រជាជនកម្ពុជាដែលជាអ្នកផ្តល់កំណើតឱ្យយើងរស់ ហើយថែមទាំងមានអ្វីៗទាំងអស់ តាំងពីដីស្រែចម្ការផ្ទះសម្បែងជាដើម ។
លោកឯម ដេត សមាជិកក្រុមប្រឹក្សាខេត្ត មានប្រសាសន៍ឱ្យដឹងថា ក្មួយៗនៅជំនាន់ក្រោយនៅពេលដែលរូបលោកនិយាយពីរឿងប្រវត្តិទាក់ទិនទៅនឹងរបប ប្រល័យពូជសាសន៍ប៉ុល ពត នោះមិនជឿទេ ដោយសារតែកើតមិនទាន់ ។ ប្រទេសកម្ពុជាបានឆ្លងកាត់សង្គ្រាម លន់ ណុល បន្ទាប់មកទៀតនៅឆ្នាំ១៩៧៥ ចូលមករបបប៉ុល ពត ទៀតនៅក្នុងពេលនោះរូបលោកផ្ទាល់ ត្រូវបានគេចល័តដើរកាត់ព្រៃចេញពីកន្លែងមួយចូលទៅកន្លែងមួយប្រើពេលអស់២០ថ្ងៃ ដោយបានដកដំឡូងគ មកឈូសពូតហាលឱ្យស្ងួតសម្រាប់ទុកដាំហូបជំនួសបាយ ។ ដើរកាត់រហូតមកដល់ភូមិមាឃ ស្រុកស្ទឹងត្រង់ សំណាងជួបតែអ្នកចិត្តបុណ្យ និងដោយសារគុណបំណាច់ដ៏ថ្លៃថ្លារបស់គណបក្សប្រជាជន ទើបបានរស់រានមានជីវិតរហូតដល់សព្វថ្ងៃនេះ ។
លោកជំទាវយីន ផានី្ន តំណាងសារព័ត៌កោះសន្តិភាព មានប្រសាសន៍ឱ្យដឹងដែរថា ចំពោះពិធីបុណ្យដែលត្រូវបានរៀបចំ ជាហូរហែរនាពេលកន្លងមកនេះមានរហូតដល់ទៅ៤ដងហើយ នៅឃុំព្រះធាតុ ស្រុកអូររាំងឪ ។ ចំពោះបច្ច័យដែលបានមក គឺមានការចូលរួមសហការគ្នា រវាងលោកជំទាវជាច្រើនរូប ទើបមានពិធីបុណ្យនេះឡើង ។ លោកជំទាវឧកញ៉ាថ្លែងថា កាលដែលរូបលោកជំទាវ នៅវ័យជំទង់ក្នុងពេលនោះម្តាយជាអាជីវករលក់ដូរសម្លៀកបំពាក់នៅផ្សារអូររាំងឪ ហើយតែងតែយកមកលក់នៅឃុំព្រះធាតុនេះដោយបានអ្នកព្រះធាតុស្រឡាញ់រាប់អានគ្រប់ គ្នា ។ ក្រោយមកទៀតនៅពេលដែលពេញវ័យក៏បានចូលបម្រើជាគ្រូពេទ្យស្រុកអូររាំងឪ ហើយនៅពេលដែលជួបជាមួយនិងអ្នកជំងឺនោះមិនដែលរំលងម្នាក់ណានោះទេ ដោយប្រកាន់យកនូវក្រមសីលធម៌គ្រូពេទ្យ ប្រកាន់មេត្តាធម៌ព្រមទាំងមានមនុស្សជាច្រើនស្រលាញ់រាប់អាន ព្រមទាំងបានស្គាល់រាប់អានគ្នារហូតមក ។
លោកជំទាវឧកញ៉ាថ្លែងថា សម្តេចតេជោ ដែលប្រសូតពីត្រកូលកូនកសិករសុទ្ធសាធ ព្រមទាំងមានប្រាជ្ញាឈ្លាសវៃក្នុងការដឹកនាំប្រទេស មានការរីកចម្រើនគ្រប់ហេដ្ឋារចនាសម្ព័ន្ធតាំងពីទីក្រុងរហូតដល់ជនបទ ។ សម្រាប់វត្តអារាមវិញ មានរហូតដល់ទៅជាង៤.៣០០វត្ត ។ ពេលដែលដំណាក់កាលបោះឆ្នោតជិតមកដល់មានបក្សផ្សេងៗ គេដើរមកឃោសនាអូសទាញសន្យាដូច្នេះ ដូច្នោះ សុទ្ធតែកុហកបោកប្រាស់ និងគ្មានអ្វីដែលល្អជាងគណបក្សប្រជាជននោះទេ ។
លោកជំទាវសាន្ត អរុណ រដ្ឋលេខាធិការក្រសួងកិច្ចការនារីមានប្រសាសន៍ឱ្យដឹងដែរថា កាលពីឆ្នាំ១៩៧២ លោកជំទាវត្រូវបានចាកចេញពីប្រទេសកម្ពុជា ទៅរស់នៅសហរដ្ឋអាមេរិករៀនសូត្រទទួលបានចំណេះដឹង ក្រោយមកបានមករស់នៅស្រុកទេសវិញ បម្រើការងារនៅក្រសួងកិច្ចការនារីពិតជារវល់ច្រើន ក្នុងការចុះបំពេញការងារជួយគណបក្សប្រជាជនកម្ពុជា ដោយចុះគ្រប់ឃុំនៅក្នុងស្រុកអូររាំងឪ និងនៅតាមបណ្តាខេត្តផ្សេងៗទៀតនោះ គឺដើម្បីមកជួយដោយផ្ទាល់ដល់បងប្អូនយើង ។ លោកជំទាវបានបញ្ជាក់ថា បុណ្យដែលត្រូវធ្វើឡើងក្នុងពេលនេះជាបុណ្យសាមគ្គី បុណ្យកម្សាន្តភូមិ បុណ្យដឹងគុណ បុណ្យរំលឹកទៅដល់វិញ្ញាណក្ខន្ធដល់បុព្វការីជន និងអ្នកដែលបានស្លាប់ នៅក្នុងរបបប្រល័យពូជសាសន៍ប៉ុល ពត សូមឧទ្ទិសកុសលនិងវិញ្ញាណក្ខន្ធឱ្យទៅកាន់សុគតិភព ។ ជាការពិតណាស់ទេវតា បានជួយយើងឱ្យរួចផុតពីសេចក្តីស្លាប់ ។
ដូច្នេះបើបងប្អូនគ្រប់គ្នា អាណិត ស្រលាញ់ ពេញចិត្ត និងជឿជាក់លើសម្តេចតេជោហ៊ុន សែន នាយករដ្ឋមន្ត្រី នោះក្នុងពេលខាងមុខសូមបោះឆ្នោតឱ្យគណបក្សប្រជាជនកម្ពុជា ។ចំពោះប្រជាជនដែលបានចូលរួមទាំង២៩៣គ្រួសារ ទទួលបានសារុងម្នាក់១ និងប៊ីចេង១ថង់ផងដែរ ជួយដល់ចាស់ជរាគ្មានទីពឹង ហើយលោកតាម្នាក់អាយុ១០០ឆ្នាំ ត្រូវបានលោកជំទាវឧកញ៉ាយីន ផាន្នី បានផ្តល់ថវិកាឧបត្ថម្ភមួយចំនួនផងដែរ ៕
ចែករំលែកព័តមាននេះ