រាជធានីភ្នំពេញ ៖ នគរបាលប៉ុស្ដិ៍ចោមចៅ៣ បានហៅបុរសម្នាក់និងប្រពន្ធទៅកាន់ប៉ុស្ដិ៍ ដើម្បីសួរនាំឱ្យដឹងរឿង បន្ទាប់ពីពួកគាត់២នាក់ប្ដី-ប្រពន្ធ ចូលទៅសួរនាំនិងទារលុយ១០០ដុល្លារ ពីម្ចាស់ទ្រូម៉ានីមួយកន្លែង ។ហើយដោយបានចោទថា ម្ចាស់ទ្រូម៉ានីថា បន្លំលួចលុយគាត់ ខណៈដែលគាត់យកលុយទៅវេរនៅទីនោះ។ប៉ុន្តែត្រូវម្ចាស់ទ្រូម៉ានី បានបដិសេធថា មិនបានប្រព្រឹត្តនូវអំពើថោកទាប ដូចជាការចោទប្រកាន់នេះឡើយ ថែមទាំងមានរូបភាពកាមេរ៉ាសុវត្ថិភាព ជាភស្តុតាងទៀតផង ។
ហេតុការណ៍នេះ បានកើតឡើងកាលពីវេលាម៉ោង០២រសៀលថ្ងៃទី២០ កក្កដា ស្ថិតនៅក្នុងផ្សារជម្ពូវ័ន ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ ដោយសារតែការប្រកែកគ្ នាយកត្រូវរៀងៗខ្លួនបែបនេះ ទើបបង្កឱ្យមានការឈ្លោះប្រកែកគ្នាបែកផ្សែង និងភ្ញាក់ផ្អើលយ៉ាងខ្លាំងនៅក្នុងផ្សារ ពេលនោះ ត្រូវនគរបាលប៉ុស្តិ៍ចុះទៅអន្តរាគមន៍ឃាត់ មិនឲ្យឈ្លោះគ្នា និងបាននាំពួកគាត់ទាំង២នាក់ប្ដីប្រពន្ធទៅធ្វើការសួរនាំតែម្ដង។
បុរសខាងលើនិងប្រពន្ធ មិនបានប្រាប់ឈ្មោះអ្វីនោះទេ គ្រាន់តែប្រាប់ថា គាត់គឺជាជាងមាស មានទីលំនៅក្នុងសង្កាត់ផ្សារកណ្ដាល ខណ្ឌដូនពេញ និងកំពុងលក់ផ្ទះនៅទីនោះហើយ ត្រៀមមកស្នាក់នៅម្ដុំផ្សារជម្ពូវ័ននោះដែរ ។ ចំណែកម្ចាស់ទីតាំងទ្រូម៉ានី ក៏មិនត្រូវបានស្គាល់ឈ្មោះច្បាស់ដែរ តែអ្នកផ្សារតែងហៅគាត់ថាចែបូរ៉ាគ្រប់ៗគ្នា ។
ក្រោយនាំទៅដល់ប៉ុស្ដិ៍នគរបាល បានសួរនាំបុរសនោះ បាននិយាយចោទប្រកាន់ទៅលើម្ចាស់ទ្រូម៉ានីនោះថា បានបន្លំយកលុយរបស់ខ្លួន១០០ដុល្លារ ខណៈដែលខ្លួននិងប្រពន្ធយកលុយទៅវេរនៅទីនោះ ។ កាលពីថ្ងៃទី១៩ កក្កដា ខ្លួនបានយកលុយចំនួន១ពាន់ដុល្លារទៅវេរ ហើយពេលទៅដល់ក្រោយពីសរសេរលេខទូរស័ព្ទនិងចំនួនទឹកប្រាក់លើក្រដាសរួច គាត់បានហុចទៅឱ្យម្ចាស់ទ្រូម៉ានី និងបានប្រគល់លុយ១ពាន់ដុល្លារផងដែរ ។
ដោយមុននិងហុចលុយឱ្យ គាត់បានរាប់គ្រប់ចំនួន១ពាន់ដុល្លារហើយ លុះក្រោយពេលទទួលលុយពីគាត់ រួច ត្រូវម្ចាស់ទ្រូម៉ានីយកទៅរាប់ ស្រាប់តែបាត់អស់១០០ដុល្លារទៅវិញ ឃើញតែ៩០០ដុល្លារប៉ុណ្ណោះ។ដែលជាហេតុធ្វើឱ្យគាត់សង្ស័យថា ម្ចាស់ទ្រូម៉ានីខាងលើបន្លំយកលុយគាត់១០០ដុល្លារ ទើបសួរនាំរហូតមានការឈ្លោះប្រកែកគ្នាបែបនេះតែម្ដង។ មិនតែប៉ុណ្ណោះ ពេលគាត់ទាមទារយកលុយ១០០ដុល្លារវិញម្ចាស់ទ្រូម៉ានីមិនព្រម និងបានយករូបភាពកាមេរ៉ាឱ្យមើល ដែលរូបភាពនោះមិនត្រឹមត្រូវថតឃើញតែ
១កំណាត់ៗ និងឃើញតែលុយខ្មែរអត់ឃើញដុល្លារសោះ ។
ទាក់ទិនទៅនិងហេតុការណ៍មួយនេះ ម្ចាស់ទ្រូម៉ានីបានបដិសេធប្រាប់នគរបាលថា គាត់មិនបានបន្លំយកលុយពីបុរសម្នាក់នេះឡើយ ហើយគាត់ក៏មានវីដេអូ ដែលថតបានដោយកាមេរ៉ាសុវត្ថិភាពពីសកម្មភាពរបស់បុរសនេះទាំងអស់ ។ តាំងពីពេលដែលបុរសនេះ ដើរជាមួយប្រពន្ធចូលទៅដល់ទីតាំងរបស់គាត់ និងសកម្មភាពផ្សេងៗទៀតជាច្រើនផងដែរ ដោយនៅក្នុងខ្សែវីដេអូរខាងលើនោះ គឺជាភស្តុតាងដ៏សំខាន់បំផុតមិនអាចចេះតែចោទប្រកាន់គាត់ផ្ដេសផ្ដាស់បានឡើយ ។ ប៉ុន្តែបុរសនេះអាងមានក្មួយជាចៅក្រម ទើបបានជាតាមរករឿងកន្លែងទ្រូម៉ានីរបស់គាត់២ថ្ងៃជាប់គ្នាមកហើយ មិនចេះខ្មាសអៀនសោះ ។
ប្រភពដដែលបន្តថា រូបភាពវីដេអូរកាមេរ៉ាសុវត្ថិភាពខាងលើបានបង្ហាញថា នៅពេលដែលបុរសនេះ និងប្រពន្ធដើរចូលទៅដល់ បុរសជាប្ដីឈរខាងមុខ ដកលុយចេញពីក្នុងហោប៉ៅអាវកាន់លាត ។ ខណៈនោះស្ត្រីជាប្រពន្ធបានលូកយក ហើយប្ដីបានឱ្យក្រដាសរាយមិនយកទេ ប្រពន្ធបានទាញយកក្រដាស១០០ដុល្លារ
១សន្លឹក ចេញពីក្នុងខ្ទាស់លុយ១ពាន់ដុល្លារនោះ ។ បន្ទាប់មក បុរសជាប្ដីបានរាប់លុយម្ដងហើយម្ដងទៀត២ដង គឺលើកទី១ រាប់ឃើញ៩០០ដុល្លារ គាត់ក៏រាប់លើកទី២ម្ដងទៀត ក៏នៅតែឃើញ៩០០ដុល្លារដដែលហើយគាត់ឈប់រាប់ និងមូរលុយក្ដាប់ក្នុងដៃ ។
ប្រភពដដែលបន្ដថា បុរសនេះ ពិតជាបានដឹងយ៉ាងច្បាស់ថា លុយគាត់អត់គ្រប់ចំនួន១ពាន់ដុល្លារនោះទេ ប៉ុន្តែក្រោយរាប់រួច គាត់មិនបានបញ្ចូលឱ្យគ្រប់ចំនួនឡើយ ។ក្រោយមក បានកាន់លុយដៃឆ្វេង រីឯដៃស្ដាំសរសេរលេខទូរស័ព្ទ និងចំនួនទឹកប្រាក់នៅលើក្រដាស និងដកទូរស័ព្ទចេញពីក្នុងហោប៉ៅខល រួចទើបហុចលុយឱ្យកូនប្រុសគាត់ នៅក្នុងបន្ទប់វេរលុយ រួចទើបហុចលុយ១ខ្ទាស់៩០០ដុល្លារនោះ ទៅតាមក្រោយ។ពេលនោះកូនប្រុសគាត់ បានយកលុយរាប់មើលសារចុះសារឡើង២ដងទៀត ឃើញតែ៩០០ដុល្លារ និង១ម៉ឺនរៀល ថ្លៃសេវ៉ាវេរលុយប៉ុណ្ណោះ ទើបកូនប្រុសគាត់ហុចលុយត្រឡប់ទៅឲ្យបុរសនេះវិញ មិនអាចវេរឲ្យបានឡើយ ព្រោះលុយមិនគ្រប់ចំនួន មិនហ៊ានវេរឱ្យឡើយ ។ ហើយក៏ត្រូវបុរសនេះតាមរករឿងចោទថាគាត់បន្លំលុយ១០០ដុល្លារ ។
ជាងនេះទៀត អាងខ្លួនមានក្មួយធ្វើជាជាចៅក្រមនៅតុលាការ បានគំរាមថា នឹងប្ដឹងគាត់ឱ្យអស់សក់ក្បាលម្ដង ព្រមទាំងបានបបួលគាត់ស្បថថែមទៀត ពេលនោះគាត់ប្រាប់ថា «អញ្ចឹងទៅស្បថ នៅកន្លែងយាយម៉ៅតែម្ដងទៅបានស័ក្តសិទ្ធិ » ។ ស្រាប់តែបុរសនេះនិយាយថា «មិនបាច់ទៅទេ ព្រោះយាយម៉ៅមិនត្រឹមត្រូវឡើយ ទៅស្បថនៅព្រះអង្គដងកើរវិញ »។
ពេលនោះគាត់ក៏យល់ព្រមដែរ ប៉ុន្តែផ្ទុយទៅវិញ បែរជាបុរសនេះអត់ហ៊ានទៅស្បថទេ និងបានទាមទារយកលុយ១០០ដុល្លារពីគាត់វិញ តែគាត់ដាច់ខាតមិនព្រមឲ្យឡើយ ។ ខណៈនោះដោយសារតែមានការភ្ញាក់ផ្អើលខ្លាំងពេកទើប នគរបាលហៅបុរសនោះនិងប្រពន្ធទៅកាន់ប៉ុស្តិ៍ចោមចៅ៣ដើម្បីសួរនាំតែម្ដង។
បុរសនោះបានបញ្ជាក់ថា គាត់មិនស្ដាយទេ សម្បត្តិត្រឹមលុយ១០០ដុល្លារនោះ គាត់ចង់ហែកចោល៥០០ដុល្លារក៏បានដែរ ប៉ុន្តែនឹកទៅក្ដៅចិត្តណាស់ និងមិនចង់ឱ្យចាញ់ចិត្តម្ចាស់ទ្រូម៉ានីខាងលើ ដែលបន្លំយកលុយរបស់គាត់ស្រស់ៗពេក។ មិនតែប៉ុណ្ណោះ បុរសនោះបានប្រាប់នគរបាលថា រឿងប៉ុណ្ណឹងគាត់មិនចង់រំខានដល់បងប្អូនគាត់ឱ្យមកជួយដោះស្រាយទេ គាត់សុខចិត្តដោះស្រាយខ្លួនឯងចុះ។
គាត់ថា កាមេរ៉ាសុវត្ថិភាពដែលម្ចាស់ទ្រូម៉ានីបង្ហាញ គឺមិនត្រឹមត្រូវឡើយ ក្រោយមកគាត់បានសំណូមពរឲ្យនគរបាលហៅម្ចាស់ទ្រូម៉ានីទៅស្បថជាមួយគ្នា តែពេលនោះនគរបាល បានឱ្យគាត់ត្រឡប់ទៅផ្ទះវិញសិនរង់ចាំដោះស្រាយបន្តនៅពេលក្រោយទៀត ហើយនគរបាលក៏បានកំពុងធ្វើការស្រាវជ្រាវរឿងនេះហើយ ។
ចែករំលែកព័តមាននេះ