មើលមុខទៅ... ពួកទីទុយដើរបំបែកកញ្ចក់ឡានលួចទ្រព្យគេ

មើលមុខទៅ… ពួកទីទុយដើរបំបែកកញ្ចក់ឡានលួចទ្រព្យគេ

ថ្ងៃទី ២១ ខែ កក្កដា ឆ្នាំ ២០១៨

ម៉ោង ១៤:១០

ខេត្តបាត់ដំបង ៖ សមត្ថកិច្ចបានឱ្យដឹងថា យុវជន២នាក់ត្រូវបានកម្លាំងបង្ការបង្ក្រាបនៃការិយាល័យកម្រិតស្រាលឃាត់ខ្លួនជាបន្តបន្ទាប់ កាលពីរសៀលថ្ងៃទី២០ កក្កដា នៅក្នុងភូមិទួលតាឯក សង្កាត់ទួលតាឯក ក្រុងបាត់ដំបង ដែលពាក់ព័ន្ធនឹងករណីដើរគប់កញ្ចក់រថយន្តលួចយកទ្រព្យសម្បត្តិនៅពេលយប់ ។

សមត្ថកិច្ចបានឱ្យដឹងទៀតថា ជនសង្ស័យទាំង២នាក់នោះ ម្នាក់ឈ្មោះយឿង ម៉ៅ ភេទប្រុស អាយុ១៧ឆ្នាំ និងម្នាក់ទៀតឈ្មោះបឿ បារាំង ហៅជ្រូក ភេទប្រុស អាយុ២៤ឆ្នាំ នៅភូមិទួលតាឯក សង្កាត់ទួលតាឯក ក្រុងបាត់ដំបង។ ជនទាំង២នាក់ បានដើរគប់កញ្ចក់រថយន្តដែលម្ចាស់ចតទុកនៅខាងមុខផ្ទះ រួចនាំគ្នាលួចយកទ្រព្យសម្បត្តិនៅក្នុងរថយន្តតែម្ដង។

បើតាមឆ្លើយសារភាពរបស់ជនសង្ស័យទាំង២នាក់នេះ បានប្រាប់សមត្ថកិច្ចថា ពួកខ្លួនធ្លាប់ប្រព្រឹត្តបទល្មើសចំនួន២លើក គឺលើកទី១-នៅវេលារំអាធ្រាត្រ ឈានចូលថ្ងៃទី១៨ កក្កដា ពួកខ្លួនបានគប់បំបែកកញ្ចក់រថយន្តលួចយកទ្រព្យសម្បត្តិគេម្ដង ។ លុះលើកទី២-នៅវេលារំលងអធ្រាត្រឈានចូលថ្ងៃទី២០ កក្កដា ពួកខ្លួន បានយកដុំថ្មគប់ទៅលើកញ្ចក់រថយន្តមួយគ្រឿង ម៉ាកនីស្សាន់ម៉ាច ដែលចតទុកចោលនៅមុខផ្ទះ ស្ថិតក្នុងភូមិ២០ឧសភា សង្កាត់ស្វាយប៉ោ ក្រុងបាត់ដំបង លួចយកកាបូប ហើយនាំគ្នារត់ចូលក្នុងរ៉ារថភ្លើង ក្រោយមក ក៏បានឆែកមើល ។ ជនអន្ធពាលទាំងនេះ បានប្រាប់ថា ពួកខ្លួនលួចបានលុយនិងសម្ភារ:មួយចំនួនទៀត ដែលម្ចាស់ទុកក្នុងរថយន្ត ។

មន្ត្រីការិយាល័យព្រហ្មទណ្ឌកំរិតស្រាលបានបញ្ជាក់ដែរថា ក្រោយពេលកើតហេតុ កម្លាំងជំនាញបានធ្វើការស្រាវជ្រាវ រហូតឈានដល់ការកំណត់សញ្ញា និងបានឃាត់ខ្លួនជនសង្ស័យទាំង២នាក់ជាបន្តបន្ទាប់។ បច្ចុប្បន្ន មន្ត្រីជំនាញកំពុងសួរនាំជនសង្ស័យ ដើម្បីកសាងសំណុំរឿងបញ្ជួនទៅតុលាការចាត់ការតាមនីតិវិធីហើយ ។