ក្រូចវល្លិ៍ ឬក្រូចផាសសិនមានទីផ្សារ និងតម្លៃខ្ពស់

ថ្ងៃទី ២០ ខែ កក្កដា ឆ្នាំ ២០១៨
ម៉ោង ១៦:៤០
សាយ ករុណា

ខេត្តមណ្ឌលគិរី ៖ ក្រូចវល្លិ៍ ឬក្រូចផាសសិននៅខេត្តមណ្ឌលគិរី គឺជាដំណាំងាយស្រួលដាំមានតម្លៃខ្ពស់នៅលើទីផ្សារ ហើយមានតម្រូវការច្រើនរហូតដល់កសិកររអ៊ូរទ្រាំថា ពិបាករកផ្លែក្រូចផ្គត់ផ្គង់សម្រាប់អតិថិជន ព្រោះចម្ការដំណាំនេះនៅមានកម្រិតតិចតួចនៅឡើយ ។

ទោះជាយ៉ាងណានៅរដូវវស្សានេះកសិករហាក់សប្បាយចិត្តបន្តិច ព្រោះខែភ្លៀងក្រូចវល្លិ៍អាចហុចផលទ្វេគុណនឹងអាចធ្វើឲ្យកសិករបានបេះផលដំណាំរៀងរាល់ថ្ងៃយកទៅលក់លើទីផ្សារខុសគ្នាពីរដូវប្រាំងដែលដំណាំនេះហុចផលមិនសូវច្រើននឹងពុំអាចបេះផ្លែលក់រាល់ថ្ងៃនោះទេពោល គឺនៅរដូវប្រាំង២ទៅ៣ថ្ងៃ ទើបអាចបេះបានម្ដង ។

លោក សម សុភ័ក្ក្រ ជាម្ចាស់ចម្ការក្រូចវល្លិ៍នៅភូមិឡៅកា សង្កាត់សុខដុម ក្រុងសែនមនោរម្យបានឲ្យដឹងថា ដំណាំក្រូចវល្លិ៍នេះ គឺចាប់ផ្ដើមចេញផ្លែផ្កាច្រើននៅអំឡុងខែមេសា តែទាមទារឲ្យយើងស្រោចទឹកឲ្យបានច្រើន ហើយលុះចូលមកដល់ខែឧសភា នៅពេលមានភ្លៀងធ្លាក់ជោគជាំក្រូចវល្លិ៍នឹងចេញផ្លែមកច្រើនខ្លាំង តែម្ដងដែលអាចឲ្យយើងបេះទិន្នផលរបស់វាបានប្រហែល១០០ទៅជាង១០០គីឡូក្រាមឯណោះ ក្នុង១ថ្ងៃ លើផ្ទៃដីប្រហែល១ហិកតា ។ លោកបន្តថា ដំណាំក្រូវផាសិននេះបើធៀបរវាងរដូវវស្សា និងរដូវប្រាំងទិន្នផលដែលផ្ដល់ឲ្យ គឺខុសគ្នាច្រើនដោយក្នុងរដូវប្រាំងនៅចម្ការរបស់លោក ផល ដែលហុចឲ្យ គឺ២ទៅ៣ថ្ងៃ ទើបប្រមូលបានម្ដង និងទទួលបានផលប្រហែល៥០ទៅ៦០គីឡូក្រាមប៉ុណ្ណោះ ហើយក្នុងចន្លោះខែមីនា និងមេសា គឺពុំមានផ្លែនោះទេខុសពីរដូវវស្សាដែលទិន្នផល គឺផ្ដល់ឲ្យរាល់ថ្ងៃតែម្ដង ។

លោកបន្តថា លោកនឹងពង្រីកផ្ទៃដីដាំដុះបន្ថែមផងដែរ ព្រោះទិន្នផលក្រូចផាសិននេះ គឺមានទីផ្សារល្អខ្លាំងណាស់ ហើយអាចលក់បានក្នុងតម្លៃថ្លៃគួរសមដែរដោយផ្លែក្រូចធំៗជាប្រភេទទិន្នផលលេខ១លោកអាចលក់បាន៨ពាន់ទៅ១ម៉ឺនរៀលក្នុង១គីឡូក្រាម ចំណែកផ្លែតូចៗ គឺអាចលក់បានប្រហែល៦ពាន់រៀលក្នុង១គីឡូក្រាម ។

លោក សម សុភ័ក្ក្រ ក៏បានសំណូមពរដល់កសិករដាំដំណាំក្រូចវល្លិ៍សូមខិតខំពង្រីកផ្ទៃដីដាំដុះបន្ថែមទៀត ដើម្បីផ្គត់ផ្គង់ទិន្នផលឲ្យគ្រប់តាមតម្រូវការទីផ្សារ និងដើម្បីទប់ស្កាត់ការនាំចូលក្រូវវល្លិ៍នេះពីប្រទេសជិតខាង ព្រោះបច្ចុប្បន្នទិន្នផលក្រូចវល្លិ៍នៅខេត្តមណ្ឌលគិរីមិនអាចផ្គត់ផ្គង់ទីផ្សារគ្រប់គ្រាន់នោះឡើយ ។ ម្ចាស់ចម្ការខាងលើបន្ថែមទៀតថា ផលដំណាំក្រូចវល្លិរបស់លោកភាគច្រើន គឺបានលក់ទៅឲ្យបណ្ដាផ្សារទំនើបមួយចំនួននៅឯទីក្រុងភ្នំពេញ ។ លោកថា ដំបូងឡើយលោកដាំក្រូចវល្លិនេះ តែ២០០គុម្ពប៉ុណ្ណោះ ប៉ុន្តែដោយមើលឃើញថា ដំណាំប្រភេទនេះមានទីផ្សារល្អ ងាយស្រួលដាំ មិនពិបាកថែទាំខ្លាំងនោះ ទើបលោកសម្រេចចិត្តដាំបន្ថែមរហូតមកដោយបច្ចុប្បន្ននេះដំណាំក្រូចវល្លិនៅចម្ការរបស់លោកមានប្រមាណជាង២ពាន់គុម្ព គិតទាំងដំណាំចាស់ និងដំណាំទើបដាំ និងមានជាង១ពាន់គុម្ព គឺបានទទួលផលហើយ ។

លោក សម សុភ័ក្ក្រ បានលើកឡើងបន្តថា ដំណាំក្រូចវល្លិនេះដាំប្រើពេលវេលាតែ០៧ខែប៉ុណ្ណោះ ប៉ុន្តែដំណាំប្រភេទនេះ គឺត្រូវថមថយទិន្នផលនៅរដូវប្រាំង ចំណែករដូវវស្សាវិញទិន្នផលនឹងទទួលបានច្រើន ។

មន្ត្រីជំនាញកសិកម្មធ្លាប់បានឲ្យដឹងដែរថា ដំណាំប្រភេទនេះនៅមានចំនួនតិចតួចនៅឡើយ ក្នុងខេត្តមណ្ឌលគិរីដែលមិនអាចដឹងពីទំហំផ្ទៃដីសរុបដាំនោះទេ ភាគច្រើនដាំជាលក្ខណៈគ្រួសារ ។ ប៉ុន្តែដំណាំនេះមានទីផ្សារល្អ និងកំពុងពេញនិយមដូច្នេះលោកសូមជម្រុញឲ្យកសិករនៅក្នុងខេត្តមណ្ឌលគិរី គួរងាកមកដាំដំណាំប្រភេទនេះឲ្យបានច្រើន ព្រោះតែដំណាំនេះពឹងផ្អែកលើទីផ្សារក្នុងស្រុកមានតម្លៃថេរ កសិករមិនប្រឈម និងការខាតបង់ក្នុងការបង្កបង្កើនផល ៕