ខេត្តព្រៃវែង ៖ រថយន្តកាមរីបាឡែនមួយគ្រឿង ត្រូវភ្លើងឆាបឆេះយ៉ាងសន្ធោសន្ធៅ រហូតនៅសល់តែគ្រោងឆ្អឹង ពេលកំពុងរត់នៅលើដងផ្លូវ និងបានធ្វើអោយម្ចាស់ដែលកំពុងជិះនៅក្នុងរថយន្តភ័យស្លន់ស្លោ ស្ទុះរត់ចេញពីក្នុងរថយន្តទាំងព្រលឹងចុងសក់។ ហេតុការណ៍នេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង៩និង៥០នាទីយប់ ថ្ងៃទី១៩កក្កដា នៅលើកំណាត់ផ្លូវជាតិលេខ៨A ត្រង់ចំណុចចន្លោះគីឡូម៉ែត្រលេខ៦៧ និង៦៨ ស្ថិតក្នុងភូមិវាល ឃុំកញ្ចំ ស្រុកពារាំង ខេត្តព្រៃវែង។
រថយន្តមួយគ្រឿងដែលត្រូវភ្លើងឆាបឆេះនេះម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ ២AM-៤៦៥៧ បើកបរដោយឈ្មោះ សេន សុភាព ភេទប្រុស អាយុ៣៦ឆ្នាំ មានទីលំនៅក្នុងសង្កាត់ឯករាជ្យ២ ខណ្ឌមានជ័យ រាជធានីភ្នំពេញ។
ប្រភពព័ត៌មានពីសមត្ថកិច្ចមូលដ្ឋានបានអោយដឹងថា នៅមុនពេលកើតហេតុ គេឃើញរថយន្តខាងលើបើកបរមកក្នុងទិសដៅពីលិចទៅកើត លុះពេលមកដល់ចំណុចកើតហេតុ ស្រាប់តែរថយន្តស្ទះម៉ាស៊ីនលែងទៅមុខ ហើយភ្លាមៗនោះស្រាប់តែឆ្លងចរន្តភ្លើងនៅក្នុងរថយន្ត ហើយផ្ទុះក្លាយទៅជាអណ្តាតភ្លើងឆាបឆេះយ៉ាងសន្ធោសន្ធៅ ធ្វើអោយអ្នកជិះនៅក្នុងរថយន្តចំនួន៤នាក់ រួមទាំងអ្នកបើកបរភ័យស្លន់ស្លោនាំគ្នាស្ទុះរត់ចេញពីរថយន្តទាំងព្រលឹងចុងសក់។
ភ្លាមៗក្រោយពីកើតហេតុ កំលាំងអធិការដ្ឋាននគរបាលស្រុកពារាំងបានចេញរថយន្តពន្លត់អគ្គីភ័យ១គ្រឿង ទៅអន្តរាគមន៍ជួយបាញ់ទឹកពន្លត់ ទើបភ្លើងរលត់ជាស្ថាពរដោយមិនបណ្តាលអោយឆេះរាលដាលដល់ថ្នល់កៅស៊ូនោះទេ តែរថយន្តត្រូវឆេះអស់ទាំងស្រុងនៅសល់តែគ្រោងឆ្អឹងប៉ុណ្ណោះ ហើយក្នុងហេតុ
ការណ៍នេះដែរមិនបង្កឱ្យនរណាម្នាក់រងគ្រោះថ្នាក់នោះឡើយ៕
ចែករំលែកព័តមាននេះ