រាជធានីភ្នំពេញ ៖ មន្ត្រីប៉ូលិសថ្នាក់វរសេនីយ៍ត្រី (ស័ក្តិ៤)ម្នាក់ ជាកូនស្នងការខេត្តកែប បានត្រូវប៉ូលិសខណ្ឌឫស្សីកែវ សហការជាមួយប៉ូលិសប៉ុស្តិ៍ទួលសង្កែចាប់ខ្លួន បន្ទាប់ពីបើករថយន្តកាមរីឆ្លាម ពណ៌ស្ករ ពាក់ស្លាកលេខ ភ្នំពេញ 2P-1896 ទៅបុករថយន្តម៉ាកហ៊ីយ៉ាន់ដាយមួយគ្រឿង ពណ៌ខៀវ ពាក់ស្លាកលេខ បាត់ដំបង 3A-1059 ពីក្រោយ ។ រថយន្តហុីយ៉ាន់ដាយនេះ ជារបស់ក្រុមហ៊ុនពន្លឺអង្គរដឹកអ្នកដំណើរ ដែលខូចកំពុងឈប់ចតតាមដងផ្លូវជាតិលេខ៥ ។ អ្វីដែលគួរឱ្យហួសចិត្តនោះគឺ ក្រោយពេលបើកបុកគេទាំងកំរោលពីក្រោយហើយបែរជាគេទារឱ្យសងទៀត លុះពេលគេមិនព្រមសង ក៏ដកកាំភ្លើងខ្លីបាញ់បុកដីគំរាមមួយគ្រាប់ ។ ប៉ុន្តែទោះបីជាបែបនេះក្តី បន្ទាប់ពីចាប់ខ្លួនបានតែប៉ុន្មានម៉ោងប៉ុណ្ណោះក៏ដោះលែងទៅវិញទៅ ។
គ្រោះថ្នាក់ចរាចរណ៍ឈានដល់ការផ្ទុះអាវុធនេះ បានកើតឡើងកាលពីវេលាម៉ោង១០ និង៣០នាទីយប់ ថ្ងៃទី២១ មីនា នៅតាមដងផ្លូវជាតិលេខ៥ មុខក្រុមហ៊ុនមេគង្គអុិចប្រេស ខាងត្បូងប៉ុស្តិ៍នគរបាលរដ្ឋបាលទួលសង្កែ ស្ថិតក្នុងភូមិផ្សារតូច សង្កាត់ទួលសង្កែ ខណ្ឌឫស្សីកែវ ។ ទោះជាយ៉ាងណា ការផ្ទុះអាវុធនេះពុំបណ្តាលឱ្យមានមនុស្សរងរបួសទេ ។ មន្ត្រីប៉ូលិសដែលត្រូវចាប់ខ្លួននេះ ឈ្មោះឯម បាណាន ភេទ្រប្រុស អាយុ៣៤ឆ្នាំ ឋានន្តរស័ក្តិវរសេនីយ៍ត្រី (ស័ក្តិ៤) ជានាយការិយាល័យផែនការគណនេយ្យនៃស្នងការដ្ឋានខេត្តកែប ហើយក៏ជាកូនលោកស្នងការផងដែរ ។
តាមព័ត៌មានឱ្យដឹងថា នៅមុនពេលកើតហេតុ មានរថយន្តដឹកអ្នកដំណើរមួយគ្រឿង របស់ក្រុមហ៊ុនពន្លឺអង្គរ ម៉ាកហុីយ៉ាន់ដាយ ពាក់ស្លាកលេខ បាត់ដំបង 3A-1059 បានធ្វើដំណើរតាមផ្លូវជាតិលេខ៥ ក្នុងទិសដៅពីត្បូងទៅជើង ។ នៅពេលធ្វើដំណើរមកជិតដល់ប៉ុស្តិ៍នគរបាលទួលសង្កែ ក៏បែកកាប៉ែនខូចដាក់លេខពុំចូល ហើយក៏បានឈប់ជួសជុល ។ នៅពេលកំពុងជួសជុល ស្រាប់តែមានរថយន្តកាមរីឆ្លាមមួយគ្រឿង ពណ៌ស្ករ ពាក់ស្លាកលេខ ភ្នំពេញ 2P-1896 បើកបរដោយលោកវរសេនីយ៍ត្រី ឯម បាណាន ដែលគេស្គាល់ថា ជាកូនប្រុសរបស់លោកស្នងការនគរបាលខេត្តកែប ធ្វើដំណើរពីត្បូងទៅជើង មកបុករថយន្តដឹកអ្នកដំណើរពីក្រោយពេញទំហឹង បណ្តាលឱ្យរថយន្តកាមរីស្រុញមុខ ។
តាមព័ត៌មានឱ្យដឹងទៀតថា បន្ទាប់ពីមានគ្រោះថ្នាក់ មន្ត្រីប៉ូលិសរូបនោះបានចុះពីលើរថយន្ត ហើយទៅរករឿងខាងរថយន្តដឹកអ្នកដំណើរ ដោយទារឱ្យសងការខូចខាត តែខាងរថយន្តដឹកអ្នកដំណើរមិនព្រមសង ព្រោះបើកបុកពីក្រោយហើយទារសងទៀត ។ ដោយសារតែខឹងពុំសង មន្ត្រីប៉ូលិសដែលស្ថិតក្នុងស្ថានភាពស្រវឹង បានចូលទៅក្នុងរថយន្តវិញ ហើយរូតកាបូបយកកាំភ្លើងខ្លីម៉ាកកា៥៤ មួយដើម ភ្ជង់បាញ់១គ្រាប់បុកដីគំរាមអ្នកបើកបរ ។ នៅពេលមានការផ្ទុះអាវុធ ប៉ូលិសប៉ុស្តិ៍ទួលសង្កែ និងខណ្ឌឫស្សីកែវ បានចុះទៅអន្តរាគមន៍ចាប់ឃាត់ខ្លួនបញ្ជូនទៅកាន់អធិការដ្ឋាន ។
តាមបុរសឈ្មោះឈឹម បូរ៉ន អាយុ៥៤ឆ្នាំ នៅភូមិស្តុក ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ជាអ្នកបើកបររថយន្តដឹកអ្នកដំណើរ ឱ្យដឹងថា នៅមុនពេលកើតហេតុ គាត់បានបើករថយន្តចេញពីចំណតក្រុមហ៊ុននៅខាងជើងផ្សារដើមគ ក្នុងដំណើរទៅកាន់ក្រុងប៉ោយប៉ែត ។ ពេលមកដល់ផ្សារតូច រថយន្តខូចដាក់លេខមិនចូល ក៏ឈប់ជួសជុលដោយបើកភ្លើងស៊ីញ៉ូត្រឹមត្រូវ ស្រាប់តែមានរថយន្តកាមរីឆ្លាមមួយគ្រឿងមកបុកពីក្រោយពេញទំហឹងតែម្តង ធ្វើឱ្យម្នាក់ៗភ័យព្រលឹងចុងសក់ ។ អ្នកបើកបរបន្តទៀតថា ពេលបើកបុកពីក្រោយហើយទារសងការខូចខាតទៀត តែដោយគាត់ពុំព្រមសង ក៏ទៅយកកាំភ្លើងមកអាមេបញ្ចូលគ្រាប់ រួចបាញ់បុកដីគំរាមមួយគ្រាប់ ។
តាមព័ត៌មានឱ្យដឹងថា មន្ត្រីប៉ូលិសរូបនោះស្ថិតក្នុងភាពស្រវឹងដាប ព្រោះទើបតែចេញពីផឹកជាមួយមិត្តភក្តិនៅម្តុំផ្សារដេប៉ូ ហើយធ្វើដំណើរត្រឡប់ទៅផ្ទះវិញនៅភូមិបឹងសាឡាង សង្កាត់ឫស្សីកែវ ក៏ជួបគ្រោះថ្នាក់បុករថយន្តដឹកអ្នកដំណើរដែលកំពុងឈប់ជួសជុលចំពីក្រោយពេញទំហឹង រួចទាមទារឱ្យគេសងទៀត ។ ពេលគេមិនព្រមសងខឹងបាញ់បុកដីគំរាមមួយគ្រាប់ ហើយត្រូវប៉ូលិសចាប់ខ្លួនបញ្ជូនទៅកាន់អធិការដ្ឋានខណ្ឌឫស្សីកែវ តែត្រូវបានដោះលែងវិញនៅវេលាម៉ោង៣ទៀបភ្លឺ គឺដោះលែងទាំងយប់ស្ងាត់ស្មានថាអត់មានអ្នកណាដឹង ។
លោកវរសេនីយ៍ទោ ទៀង ច័ន្ទខន្តិសារ អធិការនគរបាលខណ្ឌឫស្សីកែវ បានឱ្យដឹងថា ការដោះលែងមន្ត្រីប៉ូលិសបង្កការផ្ទុះអាវុធនេះ ដោយមានបញ្ជាពីថ្នាក់លើ ។ ម៉្យាងទៀតការផ្ទុះនេះពុំបង្កឱ្យមានរបួស ហើយសាមីខ្លួនមានអង្គភាពត្រឹមត្រូវគ្រាន់តែទទួលពិន័យកងកម្លាំងប៉ុណ្ណោះ ។ ទោះបីជាយ៉ាងណា លោកអធិការបានត្អូញត្អែរថា លោកមានការពិបាកនៅពេលដែលខំប្រឹងបង្ក្រាបជនបង្កការផ្ទុះអាវុធបានហើយ បែរជាប៉ះចំគ្នាឯងបែបនេះ ។
បើទៅណាប៉ះតែគ្នាឯងបែបនេះ ថ្ងៃក្រោយបាញ់ទៀត និងសុំកុំរាង! ម៉្យាងទៀត បើមិនមែនគ្នាឯងប្រហែលជាចូលទ្រុង…៕
ចែករំលែកព័តមាននេះ