ជាការពិតណាស់នៅក្នុងលោកយើងនេះ គេអាចពិសោធន៍ឃើញជាក់ច្បាស់ថា មានតែមនុស្សស្ទុះស្ទាប្រឹងប្រែង ពេញចិត្តធ្វើការ ប្រើពេលវេលាឱ្យជាប្រយោជន៍ប៉ុណ្ណោះទេ ដែលអាចទាំទ្រជាមួយនឹងជីវិតបាន។
ចំណែកជនដែលមិនធ្វើការអ្វី រង់ចាំតែលាភ សំណាង មកដល់ស្រាប់ៗនោះ បើនឹងមានផ្លូវបានលាភខ្លះ ក៏ប្រហែលជាមានតែក្នុងរឿងព្រេងប៉ុណ្ណោះឯង។ ចំពោះបញ្ហាជីវិតពិតប្រាកដនោះ មិនអាចនឹងសង្ឃឹមថាបានជួបលាភជោគដូចចិត្តប៉ងបាននោះឡើយ ។
សមនឹងសុភាសិតថា កុំស្លាប់ដូចពស់ កុំរស់ដូចកង្កែប គួរប្រឹងគប់សេពនឹងបណ្ឌិតអ្នកប្រាជ្ញ ប្រឹងសិក្សារៀនសូត្រ ប្រឹងប្រែងធ្វើការងារចិញ្ចឹមជីវិត កុំបណ្តោយជីវិតធ្លាក់ទៅតាមយថាកម្មា កុំដេកចាំព្រេងវាសនាលើកបាយបញ្ចុក។
ត្រង់នេះយើងងាកមកពិនិត្យនូវព្រះពុទ្ធដីកាដែលព្រះសម្មាសម្ពុទ្ធបរមគ្រូ ព្រះអង្គទ្រង់សម្តែងពន្យល់ដល់សត្វលោកឱ្យបានយល់ច្បាស់នូវបញ្ហាជីវិត ដូចមានជាអាទិ៍ថាៈ
អប្បមាទោ អមតំ បទំ អបមាទោ មច្ចុនោ បទំ អប្បមត្តា ន មិយ្យន្តិ យេ បមត្តា យថា មតា ប្រែថា សេចក្តីមិនធ្វេសប្រហែសជាផ្លូវនៃសេចក្តីមិនស្លាប់ សេចក្តីធ្វេសប្រហែសជាផ្លូវនៃសេចក្តីស្លាប់ ជនដែលមិនធ្វេសប្រហែសជាអ្នកមិនស្លាប់ ជនដែលមានសេចក្តីធ្វេសប្រហែសទុកណាជាមានជីវិតរស់នៅក៏ទុកដូចជាស្លាប់ទៅហើយ ។
ចែករំលែកព័តមាននេះ