ខេត្តក្រចេះ ៖ ពលរដ្ឋដែលរស់នៅក្នុងភូមិស្នួលវត្តកើត ឃុំស្នួល ស្រុកស្នួល ដែលរងអាការៈពុលស្រា.ស គឺមានមនុស្សយ៉ាងហោច៣នាក់បានស្លាប់ និងធ្លាក់ខ្លួនឈឺជាង៥០នាក់ ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល បានឱ្យដឹងនៅព្រឹកថ្ងៃទី១៦ កក្កដា នេះ ។
ការប្រកាសនេះ គឺធ្វើឡើងក្រោយពីការចុះស្រាវជ្រាវរយៈពេល៣ថ្ងៃ បន្ទាប់ពីមានការផ្ទុះបាតុភាពពុល និងបង្កការភ្ញាក់មួយសារជាថ្មីទៀត ដោយបញ្ជាក់ថា ការស្លាប់របស់ពលរដ្ឋ៣នាក់ ក្នុងនោះ មាន២នាក់ជាស្រី្ត គឺដោយសារពុលស្រា.ស ព្រោះស្រាដែលពួកគាត់ហូបនោះ មានសារធាតុមេតាណុល។
របាយការណ៍របស់ក្រសួងសុខាភិបាលដដែលឱ្យដឹងទៀតថា ក្រោយការចុះស្រាវជ្រាវ ក៏បានរកឃើញថា ការស្លាប់របស់ពលរដ្ឋ៣នាក់ និងការរងគ្រោះរបស់ប្រជាពលរដ្ឋមានជាង៥០នាក់ គឺផ្តើមចេញដោយសារតែពុលស្រានេះ ហើយក្រសួងក៏បានជម្រុញឱ្យអាជ្ញាធរ និងមន្ត្រីសុខាភិបាល ចុះអប់រំណែនាំដល់ពលរដ្ឋនៅតាមតំបន់គោលដៅងាយរងគ្រោះ ដោយសារទទួលទានស្រា.សនេះ ត្រូវតែបញ្ឈប់។
គួររំលឹកថា ពលរដ្ឋ៣នាក់ដែលបានរងគ្រោះពុលរហូតស្លាប់បន្តបន្ទាប់គ្នា ក្រោយពីពួកគាត់នាំគ្នាទៅហូបស្រា.ស នៅក្នុងកម្មវិធីជួបជុំមួយ កាលពីថ្ងៃ១២ កក្កដា ស្ថិតក្នុងឃុំស្វាយជ្រៈ ស្រុកស្នួល ។ ក្រោយពីហូបរួច មានស្ត្រីរងគ្រោះម្នាក់ ឈ្មោះព្រិច ណាត អាយុ៣៦ឆ្នាំ កើតអាការៈពុលឈឺស្លាប់ កាលពីថ្ងៃទី១២ កក្កដា ។ រហូតដល់ថ្ងៃទី១៣ កក្កដា រំលងបាន១ថ្ងៃ ក៏មានស្ត្រីម្នាក់ទៀតដែលបានហូបស្រាជាមួយគ្នា ឈ្មោះ ឡៃ អាយុ៣២ឆ្នាំ ក៏កើតអាការៈឈឺពុលស្លាប់ដូចគ្នា ។ ហើយនៅថ្ងៃទី១៤ កក្កដា ក៏មានបុរសរងគ្រោះម្នាក់ទៀតឈ្មោះ ហាន ហុន អាយុ៦០ឆ្នាំ ដែលរងអាការៈពុល ត្រូវបានស្លាប់ម្នាក់ទៀត ។
ទន្ទឹមគ្នានេះដែរ អាជ្ញាធរខេត្តក្រចេះ ក៏ត្រូវគេមើលឃើញថា កំពុងតែបង្កើនសកម្មភាពការ ចុះត្រួតពិនិត្យ លើទីតាំងផលិតស្រាតូចធំនានា នៅទូទាំងខេត្តក្រោយសង្ស័យថា ការផលិត គឺធ្វើឡើងមិនប្រក្រតី ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ