សមរភូមិបៃតងដ៏ក្តៅគគុក នៃការប្រកួតដណ្តើមពានរង្វាន់លំដាប់ពិភពលោក (World Cup) ២០១៨ បានឈានមកដល់វគ្គផ្តាច់ព្រ័ត្រហើយ បន្ទាប់ពីបានប្រើរយៈពេលមួយខែចាប់តាំងពីវគ្គចែកពូលកាលពីថ្ងៃទី១៤ ខែមិថុនា មក ។…
សមរភូមិបៃតងដ៏ក្តៅគគុក នៃការប្រកួតដណ្តើមពានរង្វាន់លំដាប់ពិភពលោក (World Cup) ២០១៨ បានឈានមកដល់វគ្គផ្តាច់ព្រ័ត្រហើយ បន្ទាប់ពីបានប្រើរយៈពេលមួយខែចាប់តាំងពីវគ្គចែកពូលកាលពីថ្ងៃទី១៤ ខែមិថុនា មក ។ ចំពោះសមាសភាពបេក្ខភាពដែលត្រូវប្រកួតស៊ីសាច់ហុតឈាមនៅវគ្គផ្តាច់ព្រ័ត្រនេះ លោកអ្នកច្បាស់ជាបានដឹងរួចហើយ គឺក្រុមមកពីទ្វីបអឺរ៉ុបដូចគ្នាបារាំង និងក្រូអាស៊ី ។
ក្រុមបារាំងដែលមានរហស្សនាមថា“មាន់គក”មួយនេះ ប្រិយមិត្តច្បាស់ជាបានស្គាល់រួចមកហើយនូវសមត្ថភាពដ៏ខ្លាំងក្លារបស់ពួកគេ ។ ចាប់តាំងពីវគ្គចែកពូលមក បារាំងមិនទាន់បរាជ័យម្តងឡើយ ពោលគឺឈ្នះ៥ដង និងស្មើតែម្តងប៉ុណ្ណោះ ដោយស៊ុតបាន១០គ្រាប់ និងរបូតវិញតែ៤គ្រាប់ ។ មុននឹងឡើងមកដល់វគ្គនេះ បារាំងបានទម្លាក់ក្រុមខ្លាំងៗដូចជា អាហ្សង់ទីន(វគ្គ១៦ក្រុម), អ៊ុយរូហ្គាយ(វគ្គ៨ក្រុម) និងបែលហ្ស៊ិក(វគ្គពាក់កណ្តាលផ្តាច់ព្រ័ត្រ) ។
វាជាលើកទី៣នៃការបង្ហាញខ្លួននៅវគ្គផ្តាច់ព្រ័ត្ររបស់ក្រុមមាន់គក ប៉ុន្តែពួកគេគ្រងជើងឯកពានរង្វាន់តែម្តងគត់នាឆ្នាំ១៩៩៨ ខណៈឆ្នាំ២០០៦បានត្រឹមជាជើងឯករង ។ បារាំងត្រូវបានគេដឹងថាជាក្រុមដែលសំបូរទៅដោយកីឡាករឆ្នើមៗ ហើយមានសមត្ថភាពខ្ពស់ដូចគ្នាទាំងខ្សែការពារ បម្រើ និងប្រយុទ្ធ ។ សម្រាប់ជំនួបប៉ះក្រូអាស៊ីនាយប់ស្អែកនេះ បារាំងមានទំនុកចិត្តរឹតតែខ្លាំងថានឹងអាចបង្កើតទំព័រប្រវត្តិសាស្ត្រថ្មីក្នុងសម័យកាលគ្រូបង្វឹក Didier Deschamps ស្របពេលកូនក្រុមនីមួយៗពុំមានរងរបួសនោះទេ ។
វាជារឿងដ៏គួរឱ្យភ្ញាក់ផ្អើល និងស្ងើចសរសើរយ៉ាងខ្លាំង ដែលក្រុមក្រូអាស៊ីអាចព័ទ្ធស៊ី និងទម្លាក់ក្រុមអង់គ្លេសកាលពីវគ្គពាក់កណ្តាលផ្តាច់ព្រ័ត្របានដោយជោគជ័យ ធ្វើឱ្យពិភពលោកវាយតម្លៃពួកគេក្នុងកម្រិតមួយផ្សេងទៀត ។ ទោះជាការឡើងមកដល់វគ្គផ្តាច់ព្រ័ត្ររបស់ក្រុមដែលមានរហស្សនាម“ក្រឡាអុក”ហាក់ប្រផិតប្រផើយជាងគូប្រកួតក្តី ប៉ុន្តែបើមើលឱ្យដិតដល់ទៅ ពួកគេក៏ខ្លាំងមិនធម្មតាដែរ ។
ជាក់ស្តែង ក្រូអាស៊ីបានទម្លាក់ក្រុមដាណឺម៉ាក(វគ្គ១៦ក្រុម), រុស្ស៊ី(វគ្គ៨ក្រុម) និងអង់គ្លេស (វគ្គពាក់កណ្តាលផ្តាច់ព្រ័ត្រ) ហើយអ្វីរឹតតែពិសេសនោះគឺពួកគេក៏ធ្លាប់លត់អាហ្សង់ទីនកាលពីវគ្គចែកពូលក្នុងលទ្ធផល៣ទល់០ផងដែរ ។ នេះជាលើកទីមួយហើយក្នុងប្រវត្តិ World Cup របស់ក្រូអាស៊ី ដែលមានវាសនាឡើងមកដល់វគ្គផ្តាច់ព្រ័ត្រ ខណៈការបង្ហាញខ្លួនសរុបវិញ ពួកគេទើបតែបានចូលរួម៥លើកប៉ុណ្ណោះ ។
សមាសភាពកូនក្រុមពួកគេបច្ចុប្បន្ន ក៏សុទ្ធតែខ្លាំង និងកំពុងលេងឱ្យក្លិបធំៗនៅទ្វីបអឺរ៉ុបដូចបារាំងដែរ ។ យ៉ាងណាមិញ ជំនួបប៉ះបារាំងនារាត្រីនេះ ក្រូអាស៊ីនឹងត្រូវធ្វើការរឹតតែធ្ងន់បន្ថែមទៀត ព្រោះសត្រូវនៅចំពោះមុខមិនមែនជាក្រុមអង់គ្លេសដែលគ្រាន់តែខ្លាំងពីសំបកក្រៅនោះទេ ។
ក្រុមខ្លាំងទាំងពីរខាងលើ ធ្លាប់ប៉ះគ្នាតែម្តងប៉ុណ្ណោះក្នុងព្រឹត្តិការណ៍ World Cup ឆ្នាំ១៩៩៨ នៅវគ្គពាក់កណ្តាលផ្តាច់ព្រ័ត្រ ដែលគ្រានោះបារាំងយកឈ្នះ២ទល់១ ហើយក៏ជាពេលបារាំងឈ្នះពានលើកទី១របស់ខ្លួនផងដែរ ។ ចំពោះប្រវត្តិជួបគ្នា៣លើកក្នុងលក្ខខណ្ឌប្រកួតមិត្តភាព បារាំងឈ្នះ២និងស្មើ១ ខណៈប៉ះគ្នាម្តងនៅយូរ៉ូឆ្នាំ២០០៤ ពួកគេទទួលបានលទ្ធផលស្មើ២-២ ។
នារាត្រីនេះ គេសង្កេតឃើញថា បារាំងនឹងអាចគ្រងពានជាលើកទី២ក្នុងប្រវត្តិសាស្ត្ររបស់ពួកគេ ផ្អែកតាមបច្ចេកទេសដឹកនាំដ៏ប៉ិនប្រសប់របស់គ្រូបង្វឹក គួបផ្សំនឹងសមត្ថភាពដ៏ជំនាញរបស់កីឡាករនីមួយៗ គឺសុទ្ធតែមានប្រៀបជាងក្រូអាស៊ី ។ នេះបើយោងតាមការទាយរបស់គេហទំព័រទស្សន៍ទាយកីឡា ៕
ចែករំលែកព័តមាននេះ