ប្រទេសអេស្ប៉ាញ ៖ អតីតនាយករដ្ឋមន្ត្រីអេស្ប៉ាញ លោក Mariano Rajoy កំពុងរងការរិះគន់ដូចទឹកបាក់ទំនប់ចំពោះការលើកឡើងរបស់លោកថា ក្រុមបាល់ទាត់ជម្រើសជាតិបារាំងដែលប្រកួតព្រឹត្តិការណ៍ World Cup ឆ្នាំ២០២៦ គ្មានកីឡាករជនជាតិបារាំងសូម្បីម្នាក់។ ការលើកឡើងនេះ បង្កើតរលកយក្សនៃរិះគន់ពីមហាជន និងជំរុញឱ្យថ្នាក់ដឹកនាំបារាំង និងអេស្ប៉ាញបានថ្កោលទោសថា ការរើសអើងពូជសាសន៍។ នេះបើតាមប្រភពពីទីភ្នាក់ងារសារព័ត៌មាន AP ចេញផ្សាយនៅថ្ងៃទី១៤ ខែកក្កដា ឆ្នាំ២០២៦។
លោក Mariano Rajoy សមាជិកគណបក្សប្រជាជនរបស់អេស្ប៉ាញ បានធ្វើការអត្ថាធិប្បាយបែបនេះ នៅក្នុងអត្ថបទមួយសម្រាប់សារព័ត៌មានអេស្ប៉ាញ El Debate មុនការប្រកួតវគ្គពាក់កណ្តាលផ្តាច់ព្រ័ត្រ World Cup ឆ្នាំ២០២៦ រវាងក្រុមមាន់គកបារាំង និងក្រុមគោជល់អេស្ប៉ាញ នៅវេលាម៉ោង ២ ឈានចូលព្រឹកថ្ងៃទី១៥ ខែកក្កដា (ម៉ោងនៅកម្ពុជា)។ លោក Rajoy បានសរសេរកាលពីថ្ងៃទី១០ កក្កដា ថា «ពួកគេបានឈ្នះរាល់ប្រកួតដែលពួកគេបានលេងនៅ World Cup នេះ ហើយបច្ចុប្បន្នកំពុងស្ថិតនៅលំដាប់កំពូលនៃចំណាត់ថ្នាក់ពិភពលោក (FIFA Ranking)។ ពួកគេក៏មានក្រុមកីឡាករដ៏ខ្លាំងពូកែមួយផងដែរ។ ទោះយ៉ាងណាក៏ដោយ អ្វីដែលពួកគេមិនមាននោះ គឺកីឡាករជាតិបារាំង»។
ពាក់ព័ន្ធបញ្ហានេះ កាលពីថ្ងៃទី១៣ ខែកក្កដា រដ្ឋមន្ត្រីការបរទេសបារាំង លោក Jean-Noël Barrot បានប្រាប់ទូរទស្សន៍បារាំង BFM TV ថា ប្រទេសបារាំងគ្មានពណ៌សម្បុរឡើយ។ ការអះអាងណាមួយដែលផ្ទុយពីនេះ គឺកើតចេញពីភាពល្ងង់ខ្លៅ ការរើសអើងពូជសាសន៍ ឬការរួមបញ្ចូលគ្នានៃចំណុចទាំងពីរនេះ»។
១ថ្ងៃមុននេះ ប្រធានសហព័ន្ធបាល់ទាត់បារាំង លោក Philippe Diallo បានសរសេនៅលើបណ្តាញសង្គម X ដែរថា «សម្តីលោក Rajoy អំពីក្រុមជម្រើសជាតិបារាំង មានក្លិនភាយនៃការរើសអើងពូជសាសន៍ដែលមិនអាចអត់ឱនបាន។ កីឡាកររបស់យើងមិនត្រូវការវិញ្ញាបនបត្របញ្ជាក់សញ្ជាតិពីអតីតនាយករដ្ឋមន្ត្រីអេស្ប៉ាញនោះទេ។
រដ្ឋាភិបាលសង្គមនិយមកំពុងតែកាន់អំណាចរបស់ប្រទេសអេស្ប៉ាញ ក៏បានថ្កោលទោស ចំពោះការលើកឡើងរបស់លោក Rajoy ដែលជាអតីតនាយករដ្ឋមន្ត្រីពីឆ្នាំ ២០១១ ដល់ឆ្នាំ ២០១៨ ផងដែរ។ ជាក់ស្តែង កាលពីថ្ងៃទី១២ ខែកក្កដា នាយករដ្ឋមន្ត្រីអេស្ប៉ាញ លោក Pedro Sánchez បានយោងលើការអត្ថាធិប្បាយនោះ ដោយមិនបានបញ្ចេញឈ្មោះលោក Rajoy ដោយបានសរសេរលើបណ្តាញសង្គម X ថា «មានអ្នកខ្លះនៅតែវាស់វែងភាពជាម្ចាស់ស្រុកដោយផ្អែកលើនាមត្រកូល ទីកន្លែងកំណើត ឬពណ៌សម្បុរ។ បារាំង យើងនឹងជួបអ្នកក្នុងវគ្គពាក់កណ្តាលផ្តាច់ព្រ័ត្រ។ សូមឱ្យក្រុមដែលល្អបំផុតជាអ្នកឈ្នះ ហើយសូមឱ្យការរើសអើងពូជសាសន៍ជាអ្នកចាញ់»។
ស្របពេលដែលរដ្ឋមន្ត្រីការបរទេសអេស្ប៉ាញ លោក José Manuel Albares បានឡើងផងដែរថា មេដឹកនាំគណបក្សប្រជាជនអេស្ប៉ាញ ចាំបាច់ត្រូវតែបដិសេធមិនទទួលស្គាល់ចំពោះការលើកឡើងទាំងនោះ។ វាមិនមែនជាលើកទី១ទេ ដែលក្រុមជម្រើសជាតិបារាំងបានប្រឈមមុខនឹងការរើសអើងពូជសាសន៍ អំឡុងពេលការប្រកួត World Cup ឆ្នាំនេះ។
គួររំលឹកថា កាលពីដើមខែនេះ ប្រធានក្រុមបារាំង Kylian Mbappé បានថ្កោលទោសសមាជិកព្រឹទ្ធសភាម្នាក់របស់ប្រទេសប៉ារ៉ាហ្គាយ ចំពោះការលើកឡើងរបស់លោកស្រី បន្ទាប់ពីក្រុមប៉ារ៉ាហ្គាយចាញ់បារាំងក្នុងវគ្គ ១៦ ក្រុមចុងក្រោយ។ លោកស្រី Celeste Amarilla សមាជិកព្រឹទ្ធសភាមកពីគណបក្សសេរីនិយម Liberal Radical បានបង្ហោះមតិជាបន្តបន្ទាប់លើបណ្តាញសង្គម X ដោយចំអក និងបង្អាប់ពីដើមកំណើត ការចិញ្ចឹមបីបាច់ ការអប់រំ និងរូបរាងកាយរបស់កីឡាករបារាំងរូបនេះ បន្ទាប់ពីបារាំងឈ្នះការប្រកួតក្នុងលទ្ធផល ១-០ ដោយគ្រាប់បាល់ប៉េណាល់ទីរបស់ខ្សែប្រយុទ្ធឆ្នើម Mbappé៕
ចែករំលែកព័តមាននេះ