ក្រុមបាល់ទាត់ជម្រើសជាតិក្រូអាស៊ី បានយកឈ្នះក្រុមបាល់ទាត់ជម្រើសជាតិអង់គ្លេសនៅក្នុងម៉ោងបន្ថែមដោយលទ្ធផល ២-១ ធ្វើឱ្យក្រុមរបស់លោក Zlatko Dalic ឡើងទៅវគ្គផ្តាច់ព្រ័ត្រWorld Cup ដោយជោគជ័យក្នុងជំនួបវគ្គពាក់កណ្ដាលផ្ដាច់ព្រ័ត្រកាលពីរាត្រីថ្ងៃទី១១ កក្កដា…
ក្រុមបាល់ទាត់ជម្រើសជាតិក្រូអាស៊ី បានយកឈ្នះក្រុមបាល់ទាត់ជម្រើសជាតិអង់គ្លេសនៅក្នុងម៉ោងបន្ថែមដោយលទ្ធផល ២-១ ធ្វើឱ្យក្រុមរបស់លោក Zlatko Dalic ឡើងទៅវគ្គផ្តាច់ព្រ័ត្រWorld Cup ដោយជោគជ័យក្នុងជំនួបវគ្គពាក់កណ្ដាលផ្ដាច់ព្រ័ត្រកាលពីរាត្រីថ្ងៃទី១១ កក្កដា ។
ជ័យជម្នះរបស់ក្រូអាស៊ីជារឿងមួយស្មានមិនដល់ដោយសារអង់គ្លេសគ្រាន់តែចាប់ផ្ដើមភ្លាមរកបាន១គ្រាប់កៅឆាយមុននៅនាទីទី៥ដោយកីឡាករ Kieran Trippier ធ្វើឱ្យអ្នកគាំទ្រក្រុមដែលមានរហស្សនាមថាតោកំណាចស្រែកហ៊ោអបអរយ៉ាងកងរំពង ។ នៅតង់ទី២ស្ថានការណ៍ប្រយុទ្ធនៅលើសមរភូមិវាលស្មៅកាន់តែឡើងកម្ដៅដោយសារក្រុមដែលមានរហស្សនាមថាក្រឡាអុកចាប់ផ្ដើមលេងសម្រុកខ្លាំងរហូតរកបាន១គ្រាប់តាមស្មើវិញនៅនាទីទី៦៨ដោយកីឡាករ Ivan Perisic និង១គ្រាប់ចុងក្រោយនៅនាទីទី១០៩ដោយកីឡាករ Mario Mandzukic ។
ទោះបីយ៉ាងណា ក្រូអាស៊ីមិនទាន់ចប់បេសកកម្មនៅឡើយទេព្រោះត្រូវត្រៀមកម្លាំងជាថ្មីប្រយុទ្ធ
នឹងក្រុមមាន់គកបារាំងនៅថ្ងៃទី១៥ កក្កដា ជាថ្ងៃកាត់សេចក្តីរកម្ចាស់ពានជើងឯកប្រចាំព្រឹត្តិការណ៍ World Cup ២០១៨ ។ តាមរយៈជ័យជម្នះលើកនេះ ធ្វើឱ្យគេមើលឃើញកំណត់ត្រាល្អៗជាច្រើនរបស់ក្រុមក្រូអាស៊ីដូចជា៖
-នេះគឺជាជំហានដំបូងរបស់ក្រូអាស៊ីដែលឡើងដល់វគ្គផ្តាច់ព្រ័ត្រនៅ World Cup ក្នុងចំណោមការបង្ហាញខ្លួនទាំង៥លើកក្នុងព្រឹត្តិការណ៍ធំនេះ ។
-គិតមកទល់ពេលនេះ ក្រូអាស៊ីបានបំបាក់អង់គ្លេស៣លើកហើយ ។
-គ្រាប់បាល់របស់ខ្សែប្រយុទ្ធ Mario Mandzukic ជាគ្រាប់បាល់ចុងក្រោយដែលអង់គ្លេសទទួលនៅនាទីទី១០៨ និង៣វិនាទី ។
-កីឡាករ Ivan Perisic បានរួមចំណែករកបាន១០គ្រាប់ឱ្យក្រុមជម្រើសជាតិខ្លួនក្នុងនោះ៦គ្រាប់រកបានដោយខ្លួនឯង និង៤គ្រាប់ទៀតតាមរយៈការបញ្ជូនបាល់(Assist) ឱ្យមិត្តរួមក្រុមស៊ុតបញ្ចូលទីគូប្រកួត ។
-ក្រូអាស៊ីបានក្លាយជាក្រុមបាល់ទាត់ដំបូងគេដែលលេងក្នុងម៉ោងបន្ថែមនៅ World Cup ៣លើកជាប់ៗគ្នា ។
*ក្រុមបាល់ទាត់កម្សត់
បើងាកទៅមើលប្រវត្តិសាស្ត្រនៃការបង្កើតក្រុមបាល់ទាត់ក្រូអាស៊ីបានដឹងថាកម្សត់វេទនាយ៉ាងណា ពោលក្រុមបាល់ទាត់មួយនេះបានលេងជាផ្នែកមួយរបស់ប្រទេសយូហ្គោស្លាវីហើយការបង្ហាញខ្លួននៅក្នុងការប្រកួតអន្តរជាតិធ្វើឡើងមុនទទួលបានឯករាជ្យនៅឆ្នាំ១៩៩០ ។ ៣ឆ្នាំក្រោយមកទើបក្រុមបាល់ទាត់ក្រូអាស៊ី ត្រូវបានទទួលស្គាល់ដោយសហព័ន្ធបាល់ទាត់ពិភពលោក FIFA និងសហព័ន្ធបាល់ទាត់អឺរ៉ុប UEFA ។
ចាប់តាំងពីបង្ហាញខ្លួនក្នុងព្រឹត្តិការណ៍ប្រកួតធំៗមក ក្រូអាស៊ីបានកត់ត្រារឿងរ៉ាវល្អៗជាច្រើនដូចជាចំណាត់ថ្នាក់លេខ៣នៅ World Cup ១៩៩៨ ឡើងដល់វគ្គ៨ក្រុមចុងក្រោយពីរដងនៅព្រឹត្តិការណ៍ជើងឯកអឺរ៉ុបឆ្នាំ១៩៩៦ និង ២០០៨ ។
ជាប់ឈ្មោះ «Best Mover Of The Year» ទាំងក្នុងឆ្នាំ១៩៩៤ និង១៩៩៨ ។ ប្រកួតក្នុងទឹកដីខ្លួនឯង៣៦លើក ក្រុមក្រូអាស៊ីមិនទាន់ភ្លក់រសជាតិចាញ់សោះរហូតដល់ឆ្នាំ២០០៨ ចាញ់ក្រោមដៃអង់គ្លេស ។
*ប្រទេសចូលចិត្តកីឡា
ក្រូអាស៊ីជាប្រទេសមួយនៅអឺរ៉ុបដែលមានផ្ទៃក្រឡា៥៦.៥៩៤គីឡូម៉ែត្រការ៉េ និងមានប្រជាជនចំនួន៤,២៨លាននាក់ដែលភាគច្រើនកាន់សាសនាគ្រិស្តនីកាយកាតូលិក ។ បើនិយាយពីវិស័យកីឡាក្នុងប្រទេសនេះវិញពិតជាមិនធម្មតាឡើយ ។ ជាក់ស្ដែងច្រើនជាង ៤០០.០០០ នាក់ជាអត្តពលិក ហើយ២៧៧.០០០នាក់ផ្សេងទៀតគឺជាសមាជិកនៃសមាគមកីឡា និងជិត ៤.០០០នាក់ទៀតជាសមាជិកសមាគមកីឡាអុក ។
សហព័ន្ធបាល់ទាត់ក្រូអាស៊ីហៅកាត់ថា «CFF» បច្ចុប្បន្នមានកីឡាករអាជីពចុះឈ្មោះលេងចំនួន១១៨.០០០នាក់ និងត្រូវចាត់ទុកជាសហព័ន្ធកីឡាធំជាងគេក្នុងប្រទេស ។ ក្របខ័ណ្ឌក្រូអាស៊ីប្រឺមីញេលីគ Prva HNLបានស្រូបទាញទស្សនិកជនច្រើនជាងគេក្នុងចំណោមលីគអាជីពផ្សេងទៀត ជាក់ស្តែងកាលពីរដូវកាល ២០១០-១០១១ មានអ្នកទស្សនាជាង៤សែននាក់ឯណោះ ៕
ចែករំលែកព័តមាននេះ