រាជធានីភ្នំពេញ ៖ នារីវ័យក្មេងរូបស្រស់ឆោមម្នាក់ បានព្យាយាមរត់គេចខ្លួនពីម្តាយបង្កើត និងបុរសជាពូ ហើយប៉ងរត់ចូលរថយន្តដែលកំពុងធ្វើដំណើរលើដងផ្លូវជាច្រើនលើក បង្កការភ្ញាក់ផ្អើលជាខ្លាំងដល់ អ្នកដំណើ រួមទាំងប្រជាពលរដ្ឋក្បែរនោះ ពិសេសមន្ត្រីនគរបាលចរាចរណ៍ អន្តរាគមន៍ជួយឃាត់ភ្លាមៗ ផងដែរ។ ហេតុការណ៍នេះ កើតឡើងនៅចំណុចគល់ស្ពានព្រះមុនីវង្សត្រើយខាងកើត ក្នុងសង្កាត់ច្បារអំពៅទី១ ខណ្ឌច្បារអំពៅ កាលពីវេលាម៉ោង៤ និង៣០នាទីល្ងាច ថ្ងៃទី១២ ខែកក្កដា ឆ្នាំ២០១៨នេះ។
នារីរូបស្រស់ដែលប៉ងរត់ចូលឲ្យរថយន្តបុកខាងលើនោះ ពុំត្រូវបានស្គាល់អត្តសញ្ញាណ ឡើយ ដោយនាងមានវ័យប្រមាណជិត២០ឆ្នាំ ប៉ុន្តែប្រភពឲ្យដឹងថា នាងជាកម្មការនីរោងចក្រ។ នៅពេលកើតហេតុ គេក៏ឃើញមានវត្តមានស្ត្រីជាម្តាយបង្កើតនារីខាងលើ រួមជាមួយបុរសម្នាក់ទៀត ដែលអះអាងជាពូផងដែរ ដោយពួកគេព្យាយាមសម្របសម្របសម្រួលនារីខាងលើ ឲ្យត្រឡប់ទៅផ្ទះសិន ចាំនិយាយគ្នា កុំគិតធ្វើរឿងផ្តេសផ្តាសបែបនេះ។
បើតាមស្ត្រីជាម្តាយឲ្យដឹងយ៉ាងខ្លីថា កូនស្រីគាត់ខឹង សម្បារនឹងសាច់ឈាមរបស់ខ្លួនដែលតែងតែមើលងាយមើលថោកទៅលើរូបនាង ជាហេតុធ្វើឲ្យនាងអាក់អន់ស្រពន់ចិត្ត ក៏សម្រេចចាកចេញទៅស្នាក់នៅផ្ទះជួលខាងក្រៅតែឯង។ លុះស្នាក់នៅតែឯងមិនបានប៉ុន្មានផងនោះ ស្ត្រីជាម្តាយក៏ទូរស័ព្ទណាត់ជួបនៅចំណុចគល់ស្ពានច្បារអំពៅ ដោយសុំឲ្យកូនស្រីទៅនៅផ្ទះជួលជាមួយបងប្អូនដូចមុនវិញ តែនាងមិនព្រម ក៏សម្រេចប៉ងរត់ចូលឲ្យ រថយន្តបុក បង្កការភ្ញាក់ផ្អើលឡើងតែម្តងទៅ។
យ៉ាងណាមិញ ក្រោយការអន្តរាគមន៍ និងសម្របសម្រួលពីសំណាក់សមត្ថកិច្ចចរាចរណ៍រួចមក នាងក៏ព្រមជិះម៉ូតូជាមួយបុរសជាមួយពូ ចាកចេញទៅបាត់តែម្តង ដោយស្ត្រីជាម្តាយជិះរ៉ឺម៉កកង់បីតាមក្រោយ។ សូមបញ្ជាក់ថា ទម្រាំនារីរូបស្រស់ខាងលើ យល់ព្រមចាកចេញ និងឈប់រត់ចូលរថយន្តទៀតនោះ គឺសមត្ថកិច្ច និងសាច់ញាតិព្យាយាមនិយាយលួងលោមអស់រយៈពេលជាង១ម៉ោង៕
ចែករំលែកព័តមាននេះ