មូលហេតុ​កីឡាប្រដាល់សាកល​មិន​មាន​ទីផ្សារក្នុង​ស្រទាប់​មហាជន


រាជធានី​ភ្នំពេញ ៖ មក​ទល់​ពេល​នេះ គេ​កត់​សម្គាល់ថា កីឡាប្រដាល់​មានការ​រីក​ចម្រើន​យ៉ាង​ខ្លាំង ប៉ុន្តែ​ក្នុង​ចំណោម​កីឡាប្រដាល់​មាន​តែ​កីឡាប្រដាល់​សេរី ឬ​ហៅ​ថា​ប្រដាល់​ក្បាច់​គុន​បុរាណ​ខ្មែរ​ប៉ុណ្ណោះ​ដែល​មានការ​គាំទ្រ​ខ្ពស់​ចំណែកឯ​ប្រដាល់​សាកល​មិនសូវ​មាន​នោះ​ទេ ។

មាន​មូលហេតុ​មួយ​ចំនួន​ដែល​ធ្វើ​ឱ្យ​កីឡាប្រដាល់​សាកល​មិន​មានការ​រីក​ចម្រើន តើ​មូលហេតុនោះ​គឺជា​អ្វី​ទៅ?

លោក វ៉ា​ត់ ចំរើន អគ្គលេខាធិការ​នៃ​គណៈ​ក​ម្មា​ធិ​ការ​ជាតិ​អូ​ឡាំ​ពិ​ក​កម្ពុជា ថ្លែង​ថា ការ​ពិត​សហព័ន្ធ​កីឡាប្រដាល់​សាកល​មានការ​រីក​ចម្រើន​គួរ​ឱ្យ​កត់សម្គាល់ ប៉ុន្តែ​បណ្ដាល​មក​ពី​កីឡា​មួយ​នេះ​មិនសូវ​មាន​ទីផ្សារ​ឡើង​ប៉ុស្ដិ៍​ទូរទស្សន៍​ដូច​គ្នា​នឹង​កីឡាប្រដាល់​សេរី​ប៉ុណ្ណោះ ទើប​បណ្ដាល​ឱ្យ​មហាជន​ភាគច្រើន​មិនសូវ​បានឃើញ​កីឡាប្រដាល់​សាកល​បង្ហាញ​ខ្លួន​ជា​ប្រចាំ ។

យ៉ាងណាមិញ កីឡា​មួយ​នេះ​មានមុខ​ចេញ​ប្រកួត​លើ​ឆាក​អន្តរ​ជាតិ​ញឹកញាប់​ចង់​ជាង​កីឡា​ផ្សេង​ផង ប៉ុន្តែ​អាច​មក​ពី​កីឡាប្រដាល់​សាកល​នៅ​មិន​ទាន់​មាន​កីឡាករ​ណា​ម្នាក់​លេចធ្លោ​ឱ្យ​ខ្លាំង​ដូច​គ្នា​នឹង​កីឡាករ​តេ​ក្វា​ន់​ដូ កីឡាករ​ប្រដាល់សេរី ឬ​កីឡាករ​ល្បី​ៗ​មួយ​ចំនួន​ទើប​បណ្ដាល​ឱ្យ​មហាជន​ខ្លះ​មិនសូវ​មាន​ការ​ចាប់អារម្មណ៍ ។ លោក​ថា ការ​ពិត​ប្រដាល់​សាកល​ចេញ​ប្រកួត​នៅ​ក្រៅ​ស្រុក​ឆ្ងាយ​ណាស់ ខណៈ​ដែល​ការ​ប្រកួត​ក្នុងស្រុក ក៏​មាន​ប្រកួត​ធំ​រៀង​រាល់​មួយ​ឆ្នាំ​ម្ដង ដើម្បី​ជ្រើសរើស​ជើងឯក​ក្នុង​ប្រភេទ​ទម្ងន់​ផ្សេង​ៗ​ពី​គ្នា​ស្វែងរក​ជើង​ខ្លាំង​តំណាង​ប្រទេស​កម្ពុជា​ទៅ​ប្រកួត​នៅ​ក្រៅ​ប្រទេស ។

លោក​ថា កីឡា​មួយ​នេះ ការ​ពិត​ក៏​មាន​បើក​ក្លិប​ដើម្បី​ទទួល​បង្ហាត់​សិស្ស​ឱ្យ​បាន​ច្រើន​ដើម្បី​បំផុស​ឱ្យ​មាន​ធនធាន​អ្នក​ប្រដាល់​សាកល​ឱ្យ​បាន​ច្រើន​ក្នុង​ពេល​ខាង​មុខ​ដែរ ។ ក្នុង​នោះ ការ​បំផុស​ឱ្យ​កីឡាករ​ប្រដាល់​សាកល​មាន​ទីផ្សារ​ការងារ​ដូច​គ្នា​នឹង​កីឡាករ​ប្រដាល់សេរី​ដែល​មាន​សង្វៀន​ជា​ប្រចាំ​ក៏​មិន​ត្រូវ​មើល​រំលង ។ លោក​សំណូមពរ​ឱ្យ​ប៉ុស្ដិ៍​ទូរទស្សន៍​មានការ​រៀបចំ​ប្រដាល់​សាកល​ឱ្យ​បាន​ច្រើន​ដូច​គ្នា​នឹង​ប្រដាល់សេរី បើ​មិន​ដូច្នោះ​ទេ គឺ​កីឡាករ​ស្រករ​ក្រោយ​ភាគច្រើន នឹង​មិន​អាច​មក​ចង់​ហ្វឹកហាត់​ដូច​គ្នា​នឹង​កីឡាប្រដាល់​សេរី​បាន​ទេ ស្របគ្នា​ដែល​ទីផ្សារ​កីឡាប្រដាល់​សេរី​ក៏​មាន​ចំនួន​កំណត់​ដែល​មិនសូវ​ផ្ដល់​ឱកាស​ឱ្យ​អ្នក​ថ្មី​អាច​រក​ចំណូល​បាន​។

លោក ញាណ សុធី អ្នក​រៀបចំ​ការ​ប្រកួត​ប្រចាំ​សង្វៀន​ទូរទស្សន៍​អាស៊ី​អាគ្នេយ៍​បាន​អះ​អាង​ថា លោក​ធ្លាប់​បើក​ការ​ប្រកួត​ប្រដាល់​សាកល​នៅ​លើ​សង្វៀន​របស់​លោក​ច្រើន​ដង​មក​ហើយ ប៉ុន្តែ​មក​ពី​ឱ្យ​ឡើង​ប្រកួត​យូរ​ទៅ​មិន​មាន​កីឡាករ​សម្រាប់​ការ​ប្រកួត​ឱ្យ​បាន​ច្រើន​នាក់ ទើប​ការ​ប្រកួត​បាន​តែ​មួយ​រយៈ ដល់​ថ្នាក់​រក​អ្នក​ប្រកួត​លែង​បាន ។ លោក​ថា លោក​ចង់​លើក​ស្ទួយ​កីឡាប្រដាល់​សាកល​ខ្លាំង​ណាស់ ប៉ុន្តែ​បណ្ដាល​មក​ពី​ការ​ប្រកួត​ក៏​មិនសូវ​មាន​កីឡាករ​ល្អ ហើយ​កីឡាករ​ទៀត​សោត​ក៏​មិនសូវ​មាន​ច្រើន​ដើម្បី​ងាយស្រួល​រៀបចំ ក៏​សម្រេច​បិទ​ចោល​តែ​ម្ដង​មក​ដល់​បច្ចុប្បន្ន ។

យ៉ាងណាមិញ​លោក​ថា ឱ្យ​តែ​មាន​កីឡាករ​ល្អ លោក​រមែង​សៀត​ចូល​មួយគូ​ៗ​ក្នុង​​ពេល​ប្រដាល់សេរី​ផង​ដែរ ដោយ​លោក​ប្រកាស​ថា ឱ្យ​តែ​មាន​កីឡាករ​សម្រាប់​ប្រកួត​ច្រើន គឺ​លោក​នឹង​បើក​ទទួល​ភ្លាម ដើម្បី​ជា​ការ​លើកទឹកចិត្ត​។

ដូច​គ្នា​នឹង​ការ​លើក​ឡើង​ខាងលើ លោក សេង ក​ដិ​កា អ្នក​រៀបចំ​ការ​ប្រកួត​ប្រចាំ​នៅ​ប៉ុស្ដិ៍​លេខ​៥ បាន​អះអាង​ថា លោក​ក៏​ធ្លាប់​បើក​ប្រកួត​ខាង​ផ្នែក​ប្រដាល់​សាកល​នោះ​ដែរ ប៉ុន្តែ​បណ្ដាល​មក​ពី​អ្នក​ទស្សនា​ហាក់​មិនសូវ​ចង់​មើល ហើយ​កម្មវិធី​របស់​លោក​ក៏​ត្រូវធ្វើ​ដើម្បី​តម្រូវ​ភាគី​ខាង​ស្ពុ​ន​ស័​រ​ផង ទើប​លោក​សម្រេច​ផ្អាក​ចោល ។ លោក​ថា ខាង​ប៉ុស្ដិ៍​លេខ​៥​នៅ​តែ​លើកទឹកចិត្ត​ដោយ​ឱ្យ​តែ​មានការ​ប្រកួត​ប្រដាល់​សាកល​ដែល​រៀបចំ​ដោយ​សហ​ព័ន្ធ​ប្រដាល់​សាកល​ត្រូវការ​ឱ្យ​ប៉ុស្ដិ៍​លេខ​៥​ធ្វើការ​ផ្សាយ​បន្ត​ផ្ទាល់​លោក​ពិតជា​ពេញចិត្ត​ធ្វើ​តាម​៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

កីឡាជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ