គ្រោះកាចចង្រៃបានរសាត់ទៅឆ្ងាយហើយក្រោយពីកីឡាករក្មេងទាំង១២នាក់ និងគ្រូបង្វឹករបស់ពួកគេម្នាក់របស់ក្លិបបាល់ទាត់ជ្រូកព្រៃថៃ ត្រូវបានអ្នកជំនាញមុជទឹកសង្គ្រោះចេញពីរូងភ្នំដែលត្រូវទឹកជន់លិច កាលពីល្ងាចថ្ងៃអង្គារម្សិលមិញ ។ ភ្លាមៗក្រោយចេញពីរូងភ្នំថាំលួង ពួកគេត្រូវបានក្លិបបាល់ទាត់ល្បីៗនៅអឺរ៉ុបផ្តល់ឱកាសមាសនឹកស្មានមិនដល់ ។ ជាក់ស្ដែងក្លិបល្បីព័រទុយហ្គាល់ Benfica ប្រកាសអញ្ជើញក្មេងៗ និងគ្រូបង្វឹករបស់ពួកគេមកលេងនៅទីតាំងហ្វឹកហាត់របស់ក្លិបដោយចំណាយលើការហូបចុកអំឡុងពេលស្នាក់នៅ ។
ក្លិប Manchester United និងក្លិបផ្សេងទៀតផ្តល់ឱកាសឱ្យពួកគេទស្សនាការប្រកួតនៅក្រប
ខ័ណ្ឌអង់គ្លសេប្រឺមីញេលីគ ។ កីឡាករក្រុមតោកំណាច់អង់គ្លេសដែលត្រៀមចូលសមរភូមិ World Cup វគ្គពាក់កណ្តាលផ្តាច់ព្រ័ត្រកាលពីយប់នេះ បានផ្ញើឈុតអាវក្រុមជម្រើសជាតិអង់គ្លេសទៅឱ្យក្មេងៗទាំងនោះបន្ទាប់ពីឃើញក្មេងប្រុសម្នាក់ពាក់អាវរបស់ពួកគេនៅក្នុងរូងភ្នំ ។
គួរបញ្ជាក់ថា ប្រធានជាន់ខ្ពស់របស់ស្ថាប័ន FIFA លោក Gianni Infantino ធ្លាប់សន្យាថាឱ្យក្មេងៗទាំង១២នាក់នោះមានសិទ្ធិចូលទស្សនាការប្រកួត World Cup វគ្គផ្តាច់ព្រ័ត្របើសិនជាពួកគេត្រូវបានយកចេញពីរូងភ្នំមុនការប្រកួត ។ ប៉ុន្តែពួកគេពេលនេះកំពុងស្ថិតក្នុងស្ថានភាពទន់ខ្សោយដែលតម្រូវឱ្យសម្រាកព្យាបាលនិងបំប៉នអាហារនៅក្នុងមន្ទីរពេទ្យថៃ ៕
ចែករំលែកព័តមាននេះ