ទីក្រុងប៉េកាំង ៖ កីឡាករបាល់ទាត់ Kylian Mbappé កំពុងតែជួបប្រទះនឹងការរិះគន់ដូចទឹកបាក់ទំនប់ និងការខឹងសម្បារយ៉ាងខ្លាំងនៅក្នុងប្រទេសចិន បន្ទាប់ពីខ្សែប្រយុទ្ធបារាំងរូបនេះ បានហៅអតីតមេដឹកនាំកំពូលចិន លោក ម៉ៅ សេទុង ថា «ជនផ្តាច់ការចិន» នៅក្នុងបទសម្ភាសន៍មួយ។ នេះបើតាមប្រភពពី Reuters និង BBC កាលពីថ្ងៃទី២៧ ខែតុលា កន្លងទៅ។
នៅក្នុងវីដេអូជជែកកម្សាន្ត (Podcast) ភាសាបារាំងមួយ ដែលក្រោយមកត្រូវបានលុបចេញវិញភា្លមៗ Mbappé បាននិយាយអំពីរូបថ្លុក (Meme) ដែលគេបានកាត់តមុខរបស់ខ្លួនយកទៅដាក់លើរូបភាពរបស់អតីតមេដឹកនាំចិន លោក ម៉ៅ សេទុង។ ខ្សែប្រយុទ្ធក្លិប Real Madrid និងក្រុមជម្រើសជាតិបារាំងរូបនេះ បាននិយាយថា «Meme ដែលធ្វើឱ្យខ្ញុំសើចខ្លាំងជាងគេ គឺវីដេអូបង្ហាញពីបុរសម្នាក់ ខ្ញុំគិតថាជាមេដឹកនាំផ្តាច់ការចិន»។ រូបថ្លុកនេះ គឺជាផ្នែកមួយនៃរឿងកំប្លែងដែលគេនិយាយលេងតៗគ្នាពីការហៅ Mbappé ថា ជនផ្តាច់ការ ដោយសាររូបគេមានឥទ្ធិពលខ្លាំងក្លានៅក្នុងពិភពបាល់ទាត់។
ទោះយ៉ាងក៏ដោយ ពាក្យសម្តី Mbappé បានបង្កជាកំហឹងយ៉ាងខ្លាំងនៅក្នុងប្រទេសចិន ដែលជាលទ្ធផលកីឡាករវ័យ២៧ឆ្នាំរូបនេះ បានចេញសេចក្តីថ្លែងការណ៍សូមទោសជាសាធារណៈ។ «ការបញ្ចេញមតិរបស់ខ្ញុំ គឺមិនបានគិតគូរឱ្យបានច្បាស់លាស់ទេ ហើយឥឡូវនេះខ្ញុំយល់ថាវាបានប៉ះពាល់ដល់មនុស្សជាច្រើននៅក្នុងប្រទេសចិន និងសហគមន៍ចិនជុំវិញពិភពលោក។ ខ្ញុំសូមទោសចំពោះអ្នកគ្រប់គ្នា ដែលពាក្យសម្ដីរបស់ខ្ញុំបានធ្វើឱ្យប៉ះពាល់ដល់អារម្មណ៍អ្នក»។ នេះបើតាមសេចក្តីថ្លែងការណ៍របស់ Mbappé។
ជាមួយគ្នានោះដែរ លីគបាល់ទាត់ La Liga របស់ប្រទេសអេស្ប៉ាញ ក៏បានចេញសេចក្តីសុំទោសផងដែរ ដោយបានបញ្ជាក់ថា ខ្លួនមានការសោកស្តាយយ៉ាងខ្លាំងចំពោះការអាក់អន់ស្រពន់ចិត្ត ដែលការអធិប្បាយថ្មីៗរបស់ Mbappé បានបង្កឡើងនៅក្នុងចំណោមអ្នកគាំទ្រជនជាតិចិន។
ប្រតិកម្មនៅក្នុងប្រទេសចិនមើលឃើញថា ការអត្ថាធិប្បាយនេះជាការប្រមាថដល់ប្រវត្តិសាស្ត្រ និងអារម្មណ៍របស់ប្រជាជនចិន ដោយសារតែលោកប្រធាន ម៉ៅ សេទុង នៅតែជារូបតំណាងប្រវត្តិសាស្ត្រដ៏សំខាន់នៅក្នុងប្រទេសយក្សនៅអាស៊ីមួយនេះ។
ការអត្ថាធិប្បាយនេះ ក៏បានធ្វើឱ្យ Mbappé ខាតបង់យ៉ាងធ្ងន់ធ្ងរ ដោយក្រុមហ៊ុនធំៗនៅ ចិនដូចជា ក្រុមហ៊ុនភេសជ្ជៈ Dongpeng, ក្រុមហ៊ុនផលិតផលទឹកដោះគោ Mengniu និង Shanghai Milkground បានប្រកាសផ្អាក ឬបញ្ចប់កិច្ចសន្យាពាណិជ្ជកម្មជាមួយខ្សែប្រយុទ្ធឆ្នើមលំដាប់ពិភពលោករូបនេះ ភ្លាមៗតែម្តង។
លើសពីនេះទៀត ស្ថានីយទូរទស្សន៍រដ្ឋ និងប្រព័ន្ធផ្សព្វផ្សាយចិនជាច្រើន បានប្រកាសផ្អាកផ្សាយការប្រកួតលីគកំពូលអេស្ប៉ាញ La Liga របស់ក្រុម Real Madrid និងកម្មវិធីទាំងអស់ពាក់ព័ន្ធនឹង Mbappé។ សហព័ន្ធបាល់ទាត់ចិន ក៏បានចេញមុខវាយប្រហារ និងទាមទារឱ្យមានការសុំទោសជាផ្លូវការផងដែរ (មុនពេល Mbappé ចេញសេចក្តីថ្លែងការណ៍សូមទោស)៕
ចែករំលែកព័តមាននេះ