ខេត្តកំពង់ស្ពឺ ៖ បុរសម្នាក់ត្រូវបានសាច់ញាតិប្រទះឃើញដេកក្នុងថ្លុកឈាម ក៏បានរាយការណ៍ ទៅសមត្ថកិច្ចឲ្យចុះមកអន្តរាគមន៍បញ្ជូនទៅសង្គ្រោះនៅមន្ទីរពេទ្យ។ ការប៉ុនប៉ងធ្វើអត្តឃាត នេះត្រូវបានសង្ស័យថា ទំនងជនរងគ្រោះតូចចិត្តរឿងប្រពន្ធលែងក៏គិតខ្លីបែបនេះ។ ករណីអត្តឃាតនេះកើតឡើងកាលពីរសៀល ថ្ងៃទី០៩ កក្កដា ២០១៨ ករណីអារកប៉ងសម្លាប់ខ្លួនឯង នៅចំណុចផ្ទះបាយរបស់ជនរងគ្រោះនៅភូមិសំបួរ សង្កាត់ច្បារមន ក្រុងច្បារមន ខេត្តកំពង់ស្ពឺ។ជនរងគ្រោះឈ្មោះ សុខ ខែម ភេទប្រុស អាយុ២៦ឆ្នាំ រស់នៅកន្លែងកើតហេតុខាងលើ។
ប្រភពពីសមត្ថកិច្ចបានឲ្យដឹងថា មុនពេលកើតហេតុជនរងគ្រោះនៅផ្ទះជាធម្មតា ដោយដាច់ញាតិ មិនបានចាប់អារម្មណ៍ថា ជនរងគ្រោះមានបំណងសម្លាប់ខ្លួនបែបនេះទេ។ ប្រភពបន្តថា លុះដល់ពេលកើតហេតុ ស្រាប់តែសាច់ញាតិចូលទៅក្នុងផ្ទះបាយ ក៏ប្រទះឃើញមានឈាមហូរក្រោមគ្រែ ក៏ស្រែកឆោឡោផ្អើលដល់អ្នកភូមិ ហើយក៏រាយការណ៍ទៅសមត្ថកិច្ចឲ្យចុះមកអន្តរាគមន៍។
សមត្ថកិច្ចបានឲ្យដឹងថា ករណីប៉ុនប៉ងធ្វើអត្តឃាតនេះបណ្តាលឲ្យជនរងគ្រោះរងរបួសធ្ងន់។ ចំពោះមូលហេតុ ត្រូវបានសាច់ញាតិប្រាប់ថា ប្រហែលជាជនរងគ្រោះ មានវិបត្តិគ្រួសារ(ប្រពន្ធលែង) ទើបគិតខ្លីចង់សម្លាប់ខ្លួនបែបនេះ។ គ្មាននរណាម្នាក់ដឹងថា បណ្តាលមកពីមូលហេតុអ្វីនោះទេ ទើបប្រពន្ធជនរងគ្រោះសុំលែងបែបនេះ។ ក្រោយកើតហេតុជនរងគ្រោះត្រូវបានសមត្ថកិច្ច និងក្រុមគ្រួសារបញ្ជូនទៅមន្ទីរពេទ្យខេត្តដើម្បីធ្វើការសង្គ្រោះជីវិត៕
ចែករំលែកព័តមាននេះ