ទីក្រុងប៉េកាំង ៖ ក្រសួងពាណិជ្ជកម្មរបស់ចិនបាននិយាយថា ប្រទេសចិននឹងចេញវិធានការឆ្លើយតបការដាក់ពន្ធរបស់អាមេរិកលើផលិតផលចិនប្រមាណ៣៤ប៊ីលានដុល្លារ ដែលបានអនុវត្តកាលពីថ្ងៃសុក្រកន្លងមក ។
យោងតាមសេចក្តីថ្លែងការណ៍មួយពីក្រសួងពាណិជ្ជកម្មថា ពន្ធនេះល្មើសនឹងច្បាប់របស់អង្គការពាណិជ្ជកម្មពិភពលោក (WTO) និងបានបង្កើតជាសង្គ្រាមពាណិជ្ជកម្មធំជាងគេក្នុងប្រវត្តិសាស្ត្រសេដ្ឋកិច្ច ។
ក្រសួងនេះបន្តថា ការសម្រេចចិត្តរបស់សហរដ្ឋអាមេរិកលើការធ្វើពាណិជ្ជកម្មខាងលើនឹងប៉ះពាល់ដល់ភាពល្អប្រសើរឡើងនៃសេដ្ឋកិច្ចពិភពលោក ហើយចិននឹងរាយការណ៍ទៅកាន់ WTO ពីសកម្មភាពរបស់សហរដ្ឋអាមេរិក ។
ក្រសួងពាណិជ្ជកម្មបាននិយាយក្នុងសេចក្តីថ្លែងការណ៍ថា ការសម្រេចចិត្តរបស់អាមេរិក ក៏នឹងប៉ះពាល់ដល់ក្រុមហ៊ុន និងអតិថិជនអាមេរិកផងដែរ ។ សេចក្តីថ្លែងការណ៍ថា ៖ «ពួកយើងនឹងពង្រឹងការធ្វើកំណែទម្រង់, ជំរុញការបើកទូលាយ, ការពារភាពជាសហគ្រិន និងពង្រឹងដល់ការការពារសិទ្ធិកម្មសិទ្ធិបញ្ញា ដើម្បីបង្កើតបរិស្ថានអាជីវកម្មដ៏ល្អសម្រាប់ក្រុមហ៊ុនបរទេសនៅចិន ។ ពួកយើងនឹងបន្តវាយតម្លៃលើឥទ្ធិពលនៃពន្ធនេះមកលើក្រុមហ៊ុន និងចេញវិធានការជួយដល់ពួកគេ » ។
វាជាសកម្មភាពដំបូងរបស់ប្រទេសចិន ខណៈកំពុងមានភាពតានតឹងផ្នែកពាណិជ្ជកម្មរវាងប្រទេសទាំងពីរ (អាមេរិក-ចិន) ។
ការដាក់ពន្ធរបស់អាមេរិកមានគោលដៅលើផលិតផលចិនក្នុងវិស័យជាច្រើនរួមមាន វិស័យអាកាសចរណ៍, បច្ចេកវិទ្យាព័ត៌មាន, គ្រឿងយានយន្ត និងឧបករណ៍ព្យាបាល ជាដើម ។
មន្ត្រីរ៉ាប់រងពន្ធរបស់ចិនបាននិយាយថា ប្រទេសចិនសន្យាថា នឹងអនុម័តពន្ធបន្ថែមលើផលិតផលនាំចូលមួយចំនួនពីអាមេរិកភ្លាមៗ បន្ទាប់ពីអាមេរិកអនុម័តពន្ធនៅម៉ោង១២ថ្ងៃត្រង់ កាលពីថ្ងៃសុក្រកន្លងមក ។
ដើម្បីឆ្លើយតបនឹងការប្រកាសដាក់ពន្ធបន្ថែមលើផលិតផលចិន គណៈកម្មការពន្ធនាំចូលនៃក្រុមប្រឹក្សារដ្ឋបានប្រកាសថា នឹងដាក់ពន្ធលើផលិតផលអាមេរិកចំនួន៥៤៥មុខបន្ថែម ក្នុងតម្លៃប្រមាណ៣៤ប៊ីលានដុល្លារ រួមមាន កសិផល យានយន្ត និងផលិតផលសមុទ្រ ចាប់ពីថ្ងៃទី៦ ខែកក្កដា ឆ្នាំ២០១៨ នេះតទៅ៕
ចែករំលែកព័តមាននេះ