ខេត្តសៀមរាប ៖ បុគ្គលិកផ្ទះសំណាក់មួយត្រូវបានប្រទះឃើញសាកសពស្ត្រីម្នាក់ចង.កសម្លាប់ខ្លួនដោយយកក្រម៉ា និងខ្សែកាបូបចងជាប់ទ្វារបន្ទប់ទឹកនៅក្នុងផ្ទះសំណាក់របស់ខ្លួនធ្វើការ ខណៈកំពុងដើររៀបចំបន្ទប់ បង្កឱ្យមានការភ្ញាក់ផ្អើលពេញផ្ទះសំណាក់ព្រមទាំងដឹងដល់សមត្ថកិច្ចមូលដ្ឋានផងដែរ នេះបើតាមការអះអាងពីសមត្ថកិច្ចមូលដ្ឋាន ។
ហេតុការណ៍បុគ្គលិកប្រទះឃើញសាកសពនៅក្នុងបន្ទប់ទឹកផ្ទះសំណាក់មួយកន្លែង នារសៀលថ្ងៃទី៦ ខែកក្កដា ឆ្នាំ២០១៨ នោះស្ថិតនៅចំណុចក្រុមទី២ ភូមិមណ្ឌល៣ សង្កាត់ស្លក្រាម ក្រុងសៀមរាប ។
លោកអនុសេនីយ៍ត្រី ធឹម រិទ្ធា នាយរងប៉ុស្តិ៍សង្កាត់ស្លក្រាមបានប្រាប់ឱ្យដឹងនៅរសៀលថ្ងៃទី៧ ខែកក្កដា ឆ្នាំ២០១៨ ថាមានករណីធ្វើអត្តឃាតចង.កនឹងក្រម៉ាពណ៌ក្រហម និងខ្សែកាបូបចងជាប់ទ្វារបន្ទប់ទឹកក្នុងផ្ទះសំណាក់យីដែលមានកម្ពស់ប្រហែល១.៩០ម៉ែត្រ ។ មូលហេតុព្រោះខឹងសង្សារៀបការចោលទើបសម្រេចចិត្តធ្វើដូច្នេះ ។
លោកបានបញ្ជាក់ថា សាកសពស្ត្រីជនរងគ្រោះមានឈ្មោះ ដឿន ហូ អាយុ២៧ឆ្នាំ ស្រុកកំណើតនៅឃុំសំបួរ ស្រុកមង្គលបូរី ខេត្តបន្ទាយមានជ័យ មានទីលំនៅបច្ចុប្បន្នភូមិស្រះជីក ឃុំស្រះជីក ស្រុកភ្នំស្រុក ខេត្តបន្ទាយមានជ័យ ហើយបានមកដេកស្នាក់នៅ នឹងផ្ទះសំណាក់ខាងលើនេះបណ្តោះអាសន្នក៏សម្រេចចិត្តចង.ក ។
ក្រោយការពិនិត្យសាកសពខាងលើកម្លាំងជំនាញបានឃើញជាំ.កក្រៅពីនោះពុំមានស្នាកស្នាមអ្វីដែលពាក់ព័ន្ធនឹងបទល្មើសអ្វីផ្សេងឡើយ ។ បច្ចុប្បន្នកម្លាំងជំនាញបានប្រគល់សាកសពស្ត្រីរងគ្រោះជូនដល់ក្រុមគ្រួសារចាត់ចែងតាមប្រពៃណី ៕
ចែករំលែកព័តមាននេះ