ខេត្តក្រចេះ ៖ អ្នកភូមិថ្មគ្រែដែលភាគច្រើនមានរបរធ្វើនំក្រឡាន ចង់ឲ្យផលិតផលរបស់ពួកគាត់ទទួលបានសិទ្ធិប្រើប្រាស់ម៉ាកសម្គាល់ភូមិសាស្ត្រផ្តាច់មុខដូចផ្លែក្រូចថ្លុងកោះទ្រង់ដែរ ស្របពេលសព្វថ្ងៃនេះ នំក្រឡានថ្មគ្រែ កំពុងមានឈ្មោះបោះសំឡេង និងទទួលស្គាល់ថា មានរសជាតិឆ្ងាញ់ ប៉ុន្ដែត្រូវបានគេលួចផលិតចេញពីតំបន់ផ្សេង ខុសរសជាតិដើម ។
ការលើកឡើងបែបនេះបានធ្វើឡើងបន្ទាប់ពីរាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម បានសម្រេចដាក់បញ្ចូលក្រូចថ្លុងកោះទ្រង់ជាផលិតផលសម្គាល់ភូមិសាស្ត្រ(GI)ជាផ្លូវការកាលពីថ្ងៃទី២៥ មិថុនា កន្លងទៅ ។ផលិតផលនំក្រឡាន ក្រៅពីមានលក់តាមរោងតូចធំនៅពេញមាត់ផ្លូវក្នុងភូមិនេះ ក្នុងនោះមួយចំនួនធំទៀត ក៏ត្រូវបានសហគមន៍ចែកចាយលក់ដុំ និងរាយបន្តនៅតាមបណ្តាស្រុកក្រុងផ្សេងៗទៀតក្នុងខេត្តផងដែរ ជាពិសេស នៅតាមចំណតរថយន្ត និងតាមទីប្រជុំជនផ្សារ ជាដើម ។ ពលរដ្ឋរស់នៅក្នុងឃុំថ្មគ្រែ ស្រុកចិត្របុរី ជាច្រើនរយគ្រួសារបានចាប់យករបរផលិតនំក្រឡានលក់តាំងពីដើមមក ដោយក្នុង១ថ្ងៃៗ មាននំក្រឡានរាប់រយគីឡូក្រាមត្រូវបានផលិតចេញ និងខ្លះត្រូវបាននាំចេញទៅលក់នៅតំបន់ផ្សេងៗ ។
ស្ត្រីម្នាក់ក្នុងចំណោមអ្នកផលិតនំក្រឡានជាង២០០គ្រួសារនៅឃុំថ្មគ្រែ បានប្រាប់កោះសន្ដិភាពថា នាងឈ្មោះ ខៀវ ពិសិដ្ឋ មានវ័យ៣៥ឆ្នាំ ដែលបានប្រកបរបរធ្វើនំនេះលក់អស់រយៈពេលជាង១០ឆ្នាំហើយ ។
នាងនិយាយថា ៖« ប៉ុន្មានឆ្នាំចុងក្រោយនេះ ពួកយើងពិតជាព្រួយបារម្ភនៅពេលដែល នំក្រឡាន ត្រូវបានគេលួចផលិតនៅតំបន់ផ្សេងៗ ហើយប្រើប្រាស់ឈ្មោះនិងត្រាថាជា «ក្រឡានថ្មគ្រែ» តែរសជាតិមិនដូចគ្នានោះទេ » ។
ទន្ទឹមនឹងការព្រួយបារម្ភពីការប៉ះពាល់ឈ្មោះនំក្រឡានថ្មគ្រែនេះ ពួកគាត់បានសំណូមពរឲ្យអាជ្ញាធរពាក់ព័ន្ធគិតគូរដាក់បញ្ចូលផលិតផលប្រចាំតំបន់ឲ្យមានម៉ាកសញ្ញាសម្គាល់ភូមិសាស្ត្រផង ដើម្បីជាអត្តសញ្ញាណប្រជាពលរដ្ឋឃុំថ្មគ្រែនេះ ។
អ្នកផលិតនំក្រឡាន ឈ្មោះ ប្លោក សម្ផស្ស អាយុ៣៥ឆ្នាំ បានអំពាវនាវថា ៖« សូមអាជ្ញាធរជួយផ្តល់សិទ្ធិការប្រើប្រាស់ម៉ាកសញ្ញាសម្គាល់បិទលើនំក្រឡាន ដូចក្រូចថ្លុងកោះទ្រង់ផង ដើម្បីគេចពីការក្លែងបន្លំនេះ » ។
នាងបានឲ្យដឹងកាលពីថ្ងៃទី២ កក្កដា ថា នំក្រឡាន ជាផលិតផលដែលអ្នកភូមិថ្មគ្រែ បានធ្វើតាំងពីយូរណាស់មកហើយ ។ ការលក់ដាច់ភាគច្រើនគឺនៅរដូវបុណ្យទាន ដែលមានភ្ញៀវទេសចរធ្វើដំណើរឆ្លងកាត់ទៅលេងតំបន់រមណីយដ្ឋាននៅប៉ែកខាងលើច្រើន ។ នាងថា ៖«នៅក្នុងរដូវវស្សានេះ សម្រាប់តូបខ្ញុំលក់បានតែ១៥គីឡូក្រាមប៉ុណ្ណោះក្នុង១ថ្ងៃ ខណៈរដូវប្រាំងលក់បានរហូតដល់ជាង៣០គីឡូក្រាម ។
ចំណែកការផលិតមានបញ្ហាប្រឈមច្រើនដូចជា ខ្វះឫស្សី និងអង្ករដំណើបដែលសុទ្ធល្អ ជាដើម ហើយពេលនេះ មានគេលួចផលិត ដោយដាក់ឈ្មោះថា ក្រឡានថ្មគ្រែទៀត ដែលធ្វើឲ្យការលក់របស់ពួកយើងកាន់តែធ្លាក់ចុះ » ។ នាងកត់សម្គាល់ថា ៖« ពលរដ្ឋក្នុងភូមិមានការកែប្រែជីវភាពច្រើនពីមួយឆ្នាំទៅមួយឆ្នាំ បន្ទាប់ពីពួកគាត់បាននាំគ្នាចាប់របរធ្វើនំក្រឡានលក់តៗគ្នា » ។
គួរបញ្ជាក់ថា កាលពីថ្ងៃទី២៥ មិថុនា ២០១៨ រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម បានសម្រេចដាក់បញ្ចូលជាផ្លូវការក្រូចថ្លុងកោះទ្រង់ ជាផលិតផលសម្គាល់ភូមិសាស្ត្រ (GI) ។ ការដាក់បញ្ចូលនេះ អាចទទួលបានផលប្រយោជន៍បន្ថែមទៀតដូចជា ទទួលបានកេរ្តិ៍ឈ្មោះកាន់តែល្បី និងកាន់តែមានអ្នកស្គាល់ពីគុណភាពក្រូចថ្លុងនៅកោះទ្រង់ ។ អ្វីដែលពិសេសនោះ នឹងជួយលើកកម្ពស់ជីវភាពអ្នកដាំក្រូចថ្លុងកោះទ្រង់បានមួយកម្រិតទៀតផងដែរ ។ យ៉ាងណាមិញ ប្រសិនបើក្រឡានថ្មគ្រែ ត្រូវបានអាជ្ញាធរគិតគូរដាក់បញ្ចូលដូចការចង់បានរបស់សហគមន៍ថ្មគ្រែមែននោះ នឹងជួយឲ្យផលិតផលមួយនេះកាន់តែល្បីឈ្មោះ និងធ្វើឲ្យអាជីវកម្មរបស់ពួកគាត់កាន់តែដំណើរការល្អមិនខាន ៕
ចែករំលែកព័តមាននេះ