ខេត្តសៀមរាប ៖ ហាងកាហ្វេនិងហាងផ្សេងៗទៀតក្នុងក្រុងសៀមរាប ទំនងបំភ្លេចអក្សរសាស្ត្រជាតិរបស់ខ្លួនហើយមើលទៅ ទើបប្រឹងរំលេចសុទ្ធតែអក្សរបរទេស ធ្វើឱ្យពលរដ្ឋក្នុងខេត្តសៀមរាបរិះគន់ទៅលើអាជ្ញាធរខេត្ត ដែលមិនបានយកចិត្តទុកដាក់ពីអក្សរសាស្ត្រជាតិ ដែលមិនមាននៅតាមយីហោហាងនានា ។
ប្រជាពលរដ្ឋនៅក្នុងក្រុងសៀមរាប បានរៀបរាប់ប្រាប់កោះសន្តិភាពថា អ្នកដែលមានលុយបើកហាងគឺសុទ្ធតែសុំច្បាប់ពីខាងរដ្ឋបាលសាលាខេត្តនៅច្រកចេញចូលតែមួយទាំងអស់ ហើយចំពោះការធ្វើស្លាកយីហោវិញ គឺបានសុំច្បាប់ពីខាងមន្ទីរវប្បធម៌និងវិចិត្រសិល្បៈខេត្ត ទីចាត់ការអន្តរវិស័យខេត្ត និងមន្ទីរព័ត៌មានខេត្ត បើពុំដូច្នេះទេពិតជាមិនអនុញ្ញាតឱ្យលើកស្លាកឡើយ ។
ប្រភពដដែលនិយាយទៀតថា ចំពោះស្លាកយីហោដែលសរសេរអក្សរបរទេស គ្មានអក្សរខ្មែរនោះ គឺជាហាងកូនថ្នាក់ដឹកនាំខេត្តទៀតផង ហេតុអ្វីបានជាមិនប្រាប់ឱ្យរៀបរៀងអក្សរខ្មែរឱ្យធំនៅពីលើអក្សរបរទេសទៅ បែរជាគ្មានអក្សរខ្មែរឃើញតែអក្សរបរទេសទៅវិញ ។
នេះជាបញ្ហាដដែលៗតែងកើតមានរឿងបែបនេះ ធ្វើឱ្យប្រជាជាតិខ្មាសជនបរទេស ឬមួយយល់ថា ការសរសេរអក្សរបរទេសនិងនិយាយភាសាបរទេសជាអំនួតរបស់ខ្លួន ? ផ្ទុយទៅវិញជាប្រការដែលមិនគប្បីទាល់តែសោះ ។
បើតាមប្រភពពីមន្ត្រីអន្តរវិស័យសាលាខេត្តបានប្រាប់តាមទូរស័ព្ទនៅព្រឹកថ្ងៃទី១ ខែកក្កដា ថា បើអក្សរទាំងអស់នោះជាពាណិជ្ជនាមមកពីក្រៅតែម្តង ចេញដោយក្រសួងវាអត់អីទេ តែប្រសិនបើពួកគាត់អត់មានពាណិជ្ជនាម ដូចជាកម្មសិទ្ធិរបស់ខ្លួនអត់មានអក្សរខ្មែរលើអក្សរបរទេសនោះ បានន័យថាអក្សរខ្មែរត្រូវធំជាងអក្សរបរទេសពាក់កណ្តាល ។
ប្រភពដដែលបញ្ជាក់ទៀតថា ចំពោះការចេញសេចក្តីជូនដំណឹងដល់សាធារណជនដែលជាអាជីវករទាំងអស់នោះ ខាងរដ្ឋបាលសាលាខេត្តបានចេញជាយូរឆ្នាំមកហើយ ប៉ុន្តែថ្មីៗនេះក៏បានចេញម្តង និងកែតម្រូវម្តងទៀតដែរ ។
ជុំវិញករណីខាងលើនេះ លោក លី សំរិទ្ធ អ្នកនាំពាក្យសាលាខេត្តនិងជាអភិបាលរងខេត្ត បានប្រាប់តាមទូរស័ព្ទនៅព្រឹកថ្ងៃទី១ ខែកក្កដា ថា បើអាជីវករណាបើកហាង គ្មានអក្សរខ្មែរនៅលើស្លាកយីហោទេនោះ គឺវាខុសនឹងច្បាប់របស់រាជរដ្ឋាភិបាលកម្ពុជាហើយ ។
ចំពោះករណីខាងលើនេះដែរ កោះសន្តិភាពមិនអាចសុំការបំភ្លឺពីប្រធានមន្ទីរវប្បធម៌និងវិចិត្រសិល្បៈខេត្តបានទេនៅព្រឹកថ្ងៃទី១ ខែកក្កដា ដោយសារទូរស័ព្ទរបស់លោកនៅក្រៅតំបន់សេវា ។ ទោះបីជាបែបណា សង្ឃឹមថា អាជ្ញាធរនឹងយកចិត្តទុកដាក់ពីបញ្ហានេះ ៕
ចែករំលែកព័តមាននេះ