ខេត្តរតនគិរី ៖ កម្លាំងជំនាញបានចុះបង្គ្រាបករណីរក្សាទុក្ខជួញដូរ និងប្រើប្រាស់ដោយខុសច្បាប់នូវសារធាតុញៀន ឃាត់ខ្លួនបានជនសង្ស័យចំនួន០៣នាក់ជាបន្តបន្ទាប់ដកហូតបានវត្ថុតាងមួយចំនួនទៀត ។ ការចុះបង្ក្រាបនេះបានធ្វើឡើងនៅវេលាម៉ោង១៨និង៣០នាទីថ្ងៃទី៣០ ខែមិថុនា ឆ្នាំ២០១៨ នៅភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី ។
ប្រភពពីសមត្ថកិច្ចបានឱ្យដឹងថា ការចុះបង្ក្រាបនោះឃាត់ខ្លួនជនសង្ស័យបានចំនួន០២នាក់ ។ ទី១- ឈ្មោះ ព្រំ ចំនូល ភេទប្រុស អាយុ២៣ឆ្នាំ ជនជាតិខ្មែរ ទី២- ឈ្មោះ ពៅ ឆៃយ៉ា ភេទប្រុស អាយុ២០ឆ្នាំ ជនជាតិខ្មែរ ហើយក្រោយពីបានឃាត់ខ្លួនជនសង្ស័យទាំង០២នាក់ សមត្ថកិច្ចបានធ្វើតេស្តទឹកនោមលទ្ធផលវិជ្ជមាន ទាំង០២នាក់ ។ ចំណែកវត្ថុតាងដែលដកហូតបានរួមមាន ម្សៅក្រាមសថ្លាសង្ស័យសារធាតុញៀនចំនួន០១ថង់ធំ ល្មមទម្ងន់៤.៦៦ក្រាម ទាំងសំបកថង់ និងកញ្ចប់ខ្មៅ០១កញ្ចប់តូចសង្ស័យសារធាតុញៀនទម្ងន់០.៧១ក្រាម ទាំងសំបកថង់ ។
ក្រោយពីបានសាកសួរជនសង្ស័យទាំង០២នាក់ខាងលើនោះរួចមក នៅវេលាម៉ោង២៣និង០០នាទីថ្ងៃដដែលសមត្ថកិច្ចក៏បន្តឃាត់ខ្លួនជនសង្ស័យបានម្នាក់ទៀតឈ្មោះ ណូន នាង ភេទប្រុស អាយុ៣៥ឆ្នាំ ជនជាតិខ្មែរ នៅចំណុចផ្ទះជួលស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី ។ ចាប់ដកហូតយកវត្ថុតាងបានរួមមាន ម្សៅក្រាមសថ្លាសង្ស័យសារធាតុញៀន១០កញ្ចប់ធំ ល្មមទម្ងន់៣៨.២៤ក្រាម ទាំងសំបកថង់ ។ ជញ្ជីញថ្លឹងថ្នាំញៀន០១គ្រឿង និងដាវសាមេរ៉ៃ០១ដើម ។ បច្ចុប្បន្នជនសង្ស័យទាំង០៣នាក់ត្រូវបានឃាត់ខ្លួននៅការិយាល័យជំនាញ ដើម្បីបន្តអនុវត្តន៍នីតិវិធី ៕
ចែករំលែកព័តមាននេះ