រាជធានីភ្នំពេញ ៖ ជាទូទៅ មនុស្សភាគច្រើនតែងមានអារម្មណ៍រសាប់រសល់ នៅពេលជិតដល់ថ្ងៃចេញដំណើរតាមយន្ដហោះ ពិសេសអ្នកដែលមិនធ្លាប់ធ្វើដំណើរតាមផ្លូវអាកាស តែងតែគិត និងបារម្ភសព្វបែបយ៉ាង ។ ដើម្បីជាចំណេះដឹង និងចាត់ទុកជាការត្រួសត្រាយនូវអ្វីដែលអ្នកកំពុងគិត និងបារម្ភនោះ អត្ថបទនេះ នឹងរៀបរាប់លម្អិតចាប់តាំងពីមុនថ្ងៃចេញដំណើររហូតដល់ពេលឡើងយន្ដហោះ ដើម្បីឲ្យការធ្វើដំណើរទៅក្រៅប្រទេសរបស់លោកអ្នកប្រកបដោយភាពរីករាយ និងកក់ក្ដៅ បើទោះបីជាត្រូវធ្វើដំណើរជាលើកទីមួយតែម្នាក់ឯងក៏ដោយ ។
ជាធម្មតា ការធ្វើដំណើរតាមយន្ដហោះមានភាពស្មុគស្មាញបន្ដិច មិនដូចជាធ្វើដំណើរតាមផ្លូវគោកទេ ហេតុនេះលោកអ្នកត្រូវរៀបចំជាស្រេច និងអនុវន្តតាមវិធីដូចខាងក្រោម៖
១- ទិញសំបុត្រយន្តហោះ (Book your tickets) ៖ ប្រសិនបើអ្នកសម្រេចចិត្តធ្វើដំណើរតាមជើងយន្តហោះ អ្នកគួរតែផ្ទៀងផ្ទាត់ជាមួយភ្នាក់ងារលក់សំបុត្រយន្តហោះ ឬក៏ក្រុមហ៊ុនអាកាសចរ បញ្ជាក់ថា តើមានកៅអីទំនេរឬទេ នៅថ្ងៃដែលលោកអ្នកត្រូវធ្វើដំណើរ។ បើមានកៅអីទំនេរ អ្នកអាចកក់សំបុត្រ ឬក៏ទិញសំបុត្រយន្តហោះ ។ ក្នុងករណីខ្លះអ្នកមិនអាចទទួលសំបុត្របានទេ សម្រាប់ថ្ងៃដែលអ្នកកំពុងស្វែងរក។
ដូច្នេះដំបូន្មានល្អប្រសើរជាងគេ គឺត្រូវធ្វើដំណើរទៅក្រៅប្រទេស នូវរដូវកាលមិនសូវសំបូរភ្ញៀវធ្វើដំណើរទេសចរណ៍ (Low season) ព្រោះវាមានគុណសម្បត្តិចំនួន២ ៖ ទី១ អ្នកមានឱកាសទទួលបានសំបុត្រភ្លាមៗ ហើយទី២ អ្នកអាចទទួលបានការបញ្ចុះតម្លៃ ឬសំបុត្រដែលមានតម្លៃទាប។ បើចាំបាច់ត្រូវធ្វើដំណើរក្នុងរដូវកាល ទេសចរខ្ពស់ (high season) អ្នកអាចត្រូវចំណាយខ្ពស់លើសំបុត្រយន្តហោះ ។ ការកក់ ឬការទិញសំបុត្រយន្តហោះរបស់អ្នក គឺអាចជាវពីភ្នាក់ងារទេសចរណ៍នៅក្បែរអ្នក ឬអ្នកអាចកក់តាមអ៊ីនធឺណេត។
២- មុនថ្ងៃចេញដំណើរ ៖ ត្រូវរៀបចំទុកដាក់ឯកសារដែលចាំបាច់ ពិសេសលិខិតឆ្លងដែនដែលមានសុពលភាពយ៉ាងតិចបំផុត៦ខែឡើងទៅ និងសំបុត្រយន្ដហោះ ព្រមទាំងពិនិត្យទម្ងន់វ៉ាលិសដែលគេអនុញ្ញាតតាមជើងយន្តហោះដែលបានកំណត់ ព្រោះថា ក្រុមហ៊ុនអាកាសចរណ៍ខ្លះគេអនុញ្ញាតឲ្យចាប់ពី២០ទៅ៣០គីឡូក្រាម ហើយខ្លះទៀតមិនអនុញ្ញាតទេ គឺតម្រូវឲ្យទិញក៏មានដែរ ។
៣- រូតរះមកព្រលានយន្ដហោះ ៖ ដោយសារយើងត្រូវ Check-in នៅ Counter ជើងហោះហើរ និងបំពេញបែបបទមួយចំនួនផងនោះ លោកអ្នកត្រូវរូតរះធ្វើយ៉ាងណាមកដល់ព្រលានយន្ដហោះឲ្យបានមុនប្រមាណ២ម៉ោង មិនម៉ោងហោះហើរ ដើម្បីចៀសវាងបញ្ហាផ្សេងៗ, ប្រញាប់ប្រញាល់នាំភ្លេចរបស់ ឬខកជើងយន្ដហោះក៏ថាបាន ។
នៅពេលចូលដល់ព្រលានយន្តហោះ លោកអ្នកគួរឆែកមើលព័ត៌មានលើកញ្ចក់ទូរទស្សន៍ (information boards) នូវព័ត៌មាននានាពាក់ព័ន្ធនឹងការហោះហើរ ជើងយន្តហោះ និងប្រទេសគោលដៅ ជាពិសេសដើម្បីបានព័ត៌មានថា ជើងហោហើររបស់អ្នកត្រូវបានគេទទួល (open) សម្រាប់ទទួលការ check-in ហើយឬនៅ។
បន្ទាប់មកលោកអ្នកតម្រង់ទៅលេខ counter ហើយលោកអ្នកក៏អាចមើលជើងហោះហើរម្តងទៀតនៅលើស្គ្រីនទូរទស្សន៍ ដែលបង្ហាញនៅខាងក្រោយ Counter ប៉ុន្តែត្រូវមើលឲ្យច្បាស់ ចៀសវាងតម្រង់ជួរខុស ព្រោះពេលខ្លះ នៅពេលយើងទៅដល់ Counter នៅមិនទាន់បើកក៏មានដែរ ។ នៅផ្ទាំងស្គ្រីនខាងក្រោយនោះ ទោះបីបង្ហាញជើងហោះហើរដូចគ្នា តែមាន២ប្រភេទខុសគ្នា គឺសម្រាប់កៅអី Business Class និង Economy Class ។ ដូច្នេះបើយើងទិញ Economy Class គឺត្រូវតម្រង់ជួរនៅផ្នែកនេះ ។ យ៉ាងនេះក្ដី ពេលខ្លះអ្នកជិះកៅអី Economy Class ក៏អាចតម្រង់ជួរជាមួយអ្នកជិះ Business Class បានដែរ ដើម្បីកុំឲ្យរង់ចាំយូរ ។
៤-ពេល Check-in ៖ អ្នកត្រូវតម្រង់ជួរតាមលំដាប់លំដោយ ហើយនៅពេល Check-in អ្នកត្រូវហុចលិខិតឆ្លងដែន និងសំបុត្រយន្ដហោះដែលបានទិញរួច ។ ក្រោយពីបុគ្គលិកនៅ Counter ពិនិត្យ និងបំពេញបែបបទរួច គេនឹងផ្ដល់សំបុត្រឡើងយន្ដហោះមួយសន្លឹក ឬហៅថា (Boarding Pass) ដល់យើងដែលមានបញ្ជាក់លម្អិតពីទិសដៅហោះហើររបស់យើងដូចជា ច្រកចូលទៅកាន់យន្ដហោះ ឬហៅថា Gate និងលេខកៅអី (Seat) ជាដើម ។ លោកអ្នកត្រូវពិនិត្យមើល Gate និងពេលវេលាឡើងយន្តហោះឲ្យបានច្បាស់ផងដែរនៅក្នុងសំបុត្រយន្តហោះនោះ ។
ការដែលយើងត្រូវមើលនេះ ព្រោះថា យើងនឹងអាចដឹងមុន មិនចាំបាច់ប្រញាប់ ឬរត់ ខណៈដល់ពេលឡើងជិះ ។ ចំណែកវ៉ាលិសអីវ៉ាន់ឬសម្លៀកបំពាក់ អ្នកត្រូវលើកដាក់នៅកន្លែងថ្លឹងដែលនៅក្បែរ Counter នោះ ដើម្បីបញ្ជូនឡើងយន្ដហោះ ដោយទទួលបានកន្ទុយសំបុត្រវ៉ាលិសរបស់យើងមួយដែរ ។ រីឯកាបូបយួរដៃវិញ យើងអាចដាក់តាមខ្លួនបាន តែកុំឲ្យលើសពី៧ ឬ៨គីឡូក្រាម ។
ដើម្បីកាន់តែងាយស្រួលនោះ លោកអ្នកត្រូវមានភាពឆ្លាតវៃបន្ដិច ដោយអង្កេតមើលអ្នកនៅខាងមុខ ។
៥- បន្ទាប់ពី Check-in រួច ៖ សម្រាប់ប្រជាពលរដ្ឋកម្ពុជា អាចទៅដកលុយនៅកន្លែងគណនេយ្យបានចំនួន៧ដុល្លារវិញ មុនឡើងទៅជាន់ទី១ (សម្រាប់ព្រលានយន្ដហោះនៅភ្នំពេញ) ឬលោកអ្នកអាចសួរព័ត៌មានពីការដកលុយនេះពីបុគ្គលិកនៅកន្លែង Counter បាន ។ បន្ទាប់មកលោកអ្នកត្រូវឡើងទៅជាន់ទី១ ដោយបង្ហាញសំបុត្រយន្ដហោះទៅកាន់សមត្ថកិច្ចដែលឈរនៅជណ្ដើរយន្ដ ដើម្បីស្កេនចូលក្នុងប្រព័ន្ធស្វ័យប្រវត្តិមួយ ។
នៅពេលដល់ជាន់ទី១ អ្នកត្រូវបំពេញឯកសារពីការធ្វើដំណើររបស់យើង១សន្លឹកសិន មុនឆ្លងកាត់មន្ត្រីគយ ដោយមានថតរូប និងស្កេនម្រាមដៃ ដើម្បីបញ្ជាក់ថា យើងពិតជាបានចាកចេញពីប្រទេសកំណើតទៅកាន់ប្រទេសណាមួយតាមផ្លូវអាកាស ។
៦-ក្រោយឆ្លងកាត់ប្រព័ន្ធត្រួតពិនិត្យមន្ត្រីគយរួច ៖ លោកអ្នកត្រូវធ្វើដំណើរទៅកាន់ច្រកឡើងយន្ដហោះ (Gate) ប៉ុន្ដែត្រូវឆ្លងកាត់ការត្រួតពិនិត្យដោយប្រព័ន្ធសុវត្ថិភាពដំណាក់កាលចុងក្រោយមួយទៀត ទៅលើសម្ភារដែលដាក់ជាប់ខ្លួនដូចជាកាបូបយូរដៃ កាបូបលុយ និងសម្ភារផ្សេងៗ ហើយភាគច្រើនតម្រូវឲ្យដោះចេញ និងដាក់ចូលក្នុងកញ្ច្រែង ដើម្បីឆ្លងកាត់ប្រព័ន្ធត្រួតពិនិត្យសុវត្ថិភាព។ បន្ទាប់ពីអ្វីៗរួចរាល់ហើយ លោកអ្នកត្រូវធ្វើដើរទៅកាន់ច្រកឡើងយន្ដហោះ (Gate) របស់យើងដើម្បីអង្គុយរង់ចាំការហោះហើរ ។
៧-ពេលចាប់ផ្ដើមឡើងយន្តហោះ ៖ យើងត្រូវតម្រង់ជួរម្ដងទៀតដោយភាគច្រើនចែកជា២ជួរ សម្រាប់អ្នកទិញកៅអី Business Class និង Economy Class ប៉ុន្ដែដើម្បីកុំឲ្យយូរការបុគ្គលិកក្រុមហ៊ុនអាកាសចរណ៍អាចសម្រួលបានទៅតាមស្ថានភាពជាក់ស្ដែង ។
ពេលចូលដល់យន្ដហោះ យើងត្រូវពិនិត្យមើលកៅអីរបស់យើង និងសូមអង្គុយតាមលេខកៅអី ។ ចំណែកកាបូបត្រូវដាក់នៅថ្នាក់ខាងលើក្បាល ប៉ុន្តែបើជាកាបូបឯកសារ ចូរយកវាជាប់ខ្លួននៅផ្នែកខាងក្រោមជើង ឬក្រោមកៅអីអ្នកជួរមុខ តែត្រូវដាក់ឲ្យមានរបៀបរៀបរយ ។
៨-នៅលើយន្ដហោះ ៖ បុគ្គលិកក្រុមហ៊ុនអាកាសចរណ៍ នឹងចែកក្រដាសដើម្បីបំពេញព័ត៌មាន ដែលអ្នកទៅក្រៅប្រទេសដែលជាឯកសារចាំបាច់ត្រូវបំពេញ និងប្រគល់ជូនមន្ត្រីគយរបស់ប្រទេសគេ ។ ឯកសារនេះត្រូវដាក់ជាមួយ passport សម្រាប់ប្រគល់ឲ្យទៅផ្នែកពិនិត្យមើល ពេលយើងចូលព្រលានយន្ដហោះនៃប្រទេសគោលដៅចុងក្រោយរបស់យើងនោះ បន្ទាប់មកយើងត្រូវពិនិត្យមើលសម្ភារ និងឯកសារផ្សេងៗ ដើម្បីត្រៀមខ្លួនចូលច្រកពិនិត្យទាំងនេះ ។ បញ្ជាក់ ៖ ដាច់ខាតត្រូវពាក់ខ្សែក្រវ៉ាត់ពេលយន្តហោះឡើង និងចុះចត។
៩-នៅពេលចុះពីលើយន្តហោះ ៖ យើងអាចដើរតាមអ្នកដទៃក៏បានដែរ ព្រោះសំដៅទៅរកកន្លែងត្រួតពិនិត្យដូចគ្នា ឬមើលស្លាកសញ្ញាសរសេរថា «Arrival» តែបើយើងត្រូវប្ដូរជើងហោះហើរទៅកាន់គោលដៅប្រទេសទី៣ ទើបយើងងាកទៅផ្លូវផ្សេងទៀត ដែលមានស្លាកសរសេរថា ជាភាសាអង់គ្លេសថា «Transit» ។
១០-កុំភ្លេចយកវ៉ាលិស ៖ នៅពេលយើងពិនិត្យរួចរាល់ហើយ គឺត្រូវទៅយកវ៉ាលិស ឬសម្ភាររបស់យើងដែលកំពុងវិលនៅខ្សែក្រវាត់ដាក់វ៉ាលីស ។ យើងអាចដឹងថា កន្លែងយកវ៉ាលិសបានតាមរយៈមើលស្លាកសញ្ញាដោយសរសេរជាភាសាអង់គ្លេសថា «Baggage » ។ ដោយសារនៅព្រលានយន្ដហោះគេមានកន្លែងដាក់វ៉ាលីសច្រើន ដូច្នេះលោកអ្នកត្រូវពិនិត្យកន្ទុយសំបុត្រវ៉ាលីសរបស់យើង ដើម្បីដឹងថា វ៉ាលិសរបស់យើងនៅកន្លែងណា ។ នៅពេលយកសម្ភារ ឬវ៉ាលិសហើយ គឺចប់ក្បួនក្នុងការធ្វើដំណើរតាមយន្តហោះហើយ ។
សូមលោកអ្នកធ្វើដំណើរប្រកបដោយសេចក្ដីសុខ និងសប្បាយរីករាយ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ