រាជធានីភ្នំពេញ ៖ អ្នកនាំពាក្យរដ្ឋបាលរាជធានីភ្នំពេញលោក ម៉ត មាសភក្តី បានឲ្យដឹងថា បើមិនមានការប្រែប្រួលនោះទេ សម្ដេចអគ្គមហាសេនាបតីតេជោ ហ៊ុន សែន…
រាជធានីភ្នំពេញ ៖ អ្នកនាំពាក្យរដ្ឋបាលរាជធានីភ្នំពេញលោក ម៉ត មាសភក្តី បានឲ្យដឹងថា បើមិនមានការប្រែប្រួលនោះទេ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជានឹងអញ្ជើញជាអធិបតីក្នុងពិធីបើកការដ្ឋានសាងសង់ស្ពានអាកាស និងផ្លូវក្រោមដីនៅរង្វង់មូលចោមចៅ នៅព្រឹកថ្ងៃទី២៩ ខែមិថុនា ឆ្នាំ២០១៨នេះ ។
លោកបន្តថា មុននឹងធ្វើពិធីបើកការដ្ឋានសាងសង់នៅព្រឹកថ្ងៃទី២៩ ខែមិថុនានោះនៅល្ងាចថ្ងៃទី២៨ ខែមិថុនា អាជ្ញាធររាជធានីភ្នំពេញដឹកនាំដោយឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញនឹងធ្វើពិធីក្រុងពាលី ដើម្បីសុំម្ចាស់ទឹកម្ចាស់ដីទៅតាមប្រពៃណី ។
លោក ម៉ត មាសភក្តី បានបញ្ជាក់ថា សំណង់ការរដ្ឋានសាងសង់ស្ពានអាកាស និងផ្លូវក្រោមដីនៅរង្វង់មូលចោមចៅនោះ គឺជាគម្រោងរបស់រដ្ឋបាលរាជធានីភ្នំពេញអនុវត្តដោយក្រុមហ៊ុន វិនិយោគទុនអនិកជនកម្ពុជា (O C I C ) មានរយៈពេល៣០ខែនឹងត្រូវបញ្ចប់ ដូចនេះសូមបងប្អូនប្រជាពលរដ្ឋដែលធ្វើដំណើរឆ្លងកាត់សំណង់ការរដ្ឋាននេះមេត្តាយោគយល់ និងអធ្យាស្រ័យ ។
សូមបញ្ជាក់ថា រដ្ឋបាលរាជធានីភ្នំពេញនៅថ្ងៃទី២៧ ខែមិថុនា ឆ្នាំ២០១៨នេះបានចេញ សេចក្ដីជូនដំណឹងឲ្យប្រជាពលរដ្ឋពង្វាងចរាចរណ៍ចេញ-ចូលរាជធានីភ្នំពេញត្រង់ចំណុចរង្វង់ មូលចោមចៅ ក្នុងពិធីបើកការដ្ឋានសាងសង់ស្ពានអាកាស និងផ្លូវក្រោមដីដែលនឹងធ្វើឡើង នៅថ្ងៃទី២៩ ខែមិថុនា ឆ្នាំ២០១៨នេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ។
រដ្ឋបាលរាជធានីភ្នំពេញសូមជម្រាបដល់ម្ចាស់រថយន្ដដឹកទំនិញគ្រប់ប្រភេទ និងម្ចាស់រថយន្ដដឹកអ្នកដំណើរដែលត្រូវចរាចរណ៍ចេញ-ចូលរាជធានីភ្នំពេញឆ្លងកាត់ទីតាំងរង្វង់មូលចោមចៅត្រូវពង្វាងចរាចរណ៍រួមមាន ចំពោះរថយន្ដចរាចរណ៍មកពីទិសខាងលិច តាមបណ្ដោយផ្លូវជាតិលេខ៤ ចូលរាជធានីភ្នំពេញត្រូវធ្វើដំណើរតាមផ្លូវពង្វាងទៅតាមផ្លូវបែកចានបត់ស្ដាំទៅទិសខាងត្បូង ឬផ្លូវកប់ស្រូវបត់ឆ្វេងទៅទិសខាងជើង ។ ចំពោះរថយន្តចរាចរណ៍មកពីផ្លូវជាតិលេខ៣ចូលរាជធានីត្រូវធ្វើដំណើរតាមផ្លូវពង្វាងបត់ស្ដាំទៅតាមផ្លូវព្រៃស មុខវត្តស្លែង ឬទៅតាមផ្លូវទួលពង្របត់ស្ដាំតាមផ្លូវ៣០ម៉ែត្រឆ្ពោះទៅផ្លូវចោមចៅ ។ ចំពោះរថយន្ដធ្វើចរាចរណ៍តាមផ្លូវចោមចៅចេញក្រៅរាជធានីទៅផ្លូវជាតិលេខ៣ត្រូវធ្វើដំណើរតាមផ្លូវទួលពង្របត់ឆ្វេងត្រង់ចំណុចស្ដុប ។ ចំពោះចរាចរណ៍ពីផ្លូវចោមចៅឆ្ពោះទៅផ្លូវជាតិលេខ៤ អនុញ្ញាតឲ្យចរាចរណ៍ធម្មតា ៕
ចែករំលែកព័តមាននេះ