ប្រទេសថៃ ៖ អ្នកជួយសង្គ្រោះជាច្រើនរយនាក់នាថ្ងៃទី២៦ មិថុនា បន្តខិតខំប្រឹងប្រែងដើម្បីតាមរកក្មេងជំទង់មួយក្រុមមានគ្នា១២នាក់ ព្រមទាំងគ្រូបង្ហាត់បាល់ទាត់របស់ពួកគេ ដែលជាប់ក្នុងរូងភ្នំមួយត្រូវទឹកជន់លិច ចាប់តាំងពីថ្ងៃទី២៣ មិថុនា មកនៅភាគខាងជើងថៃ។
នាព្រឹកព្រលឹមថ្ងៃទី២៥ មិថុនា ពួកអ្នកមុជទឹកបានចូលទៅដល់បន្ទប់ធំមួយខាងក្នុងរូងភ្នំ។ នេះជាការអះអាងរបស់លោក NARONGSAK OSOTTANAKORN អភិបាលខេត្តឈៀងរ៉ៃ ជាប់ព្រំដែនឡាវ។ លោកអភិបាលខេត្តរូបនេះបញ្ជាក់ថា យើងសិក្សាតំបន់នានានៅជុំវិញភ្ នំហើយយើងនឹងសាកល្បងស្វែងរកច្រកមួយទៀត ទោះបីពួកអ្នកជំនាញការអះអាងថា មានតែច្រកចូលរូងភ្នំតែមួយដែលទឹកជន់លិចក្ដី។
ការរុករកពុំបានផ្អាកឡើយនាពេលយប់ ហើយបណ្ដាឧបករណ៍មុជទឹកបញ្ជូនទៅដល់ ដើម្បីអាចនាំពួកគេចេញ ខណៈភ្លៀងបន្តធ្លាក់នាយប់ថ្ងៃទី២៥ មិថុនា។ យើងរៀបចំអ្វីគ្រប់យ៉ាងមានទាំងស្បៀង និងភេសជ្ចៈ ព្រមទាំងម៉ាស៊ីនបូមទឹក ដើម្បីបូមក្នុងករណីទឹកនៅតែមានកម្រិតខ្ពស់។
ក្មេងប្រុសទាំ១២នាក់នោះជាសមាជិកក្រុមបាល់ទាត់មានអាយុពី១១ទៅ១៦ឆ្នាំ បាននាំគ្នាចូលក្នុងរូងភ្នំ THAM LUANG ស្ថិតក្នុងស្រុក MAE SAI ជាមួយគ្រូបង្ហាត់បាល់ទាត់កាលពីថ្ងៃទី២៣ មិថុនា ហើយពេលនោះម្ដាយនៃគ្រួសារមួយដែលរាយកាណ៍ពីរឿងបាត់ខ្លួនពួកគេ ក្រោយពេលបាត់ពុំឃើញកូនប្រុសគាត់វិលត្រឡប់មកផ្ទះវិញ នាយប់ថ្ងៃទី២៣ មិថុនា ក្រោយហាត់ទាត់បាល់រួច។
ហើយរបស់របរពួកគេ មានកង់ និងស្បែកជើងត្រូវបានប្រទះឃើញប៉ុន្មានម៉ោងក្រោយមកនៅមាត់ច្រកចូលរូងភ្នំ ស្ថិតក្នុងឧទ្យានធំមួយ។ ទឹកទីនោះនៅតែឡើងខ្ពស់ក្នុងរូងភ្នំ ដែលញ៉ាំងឲ្យការរុករកមានការលំបាក ហើយចាំបាច់ហៅរកអន្តរាគមន៍របស់ពួកអ្នកមុជទឹក។ ខណៈភ្លៀងធ្លាក់ខ្លាំងរយៈពេលប៉ុន្មានថ្ងៃចុងក្រោយនេះនៅភាគខាងជើងថៃ ទើបបណ្ដាលឲ្យមានទឹកជន់លិចដល់រូងភ្នំនោះ៕
ចែករំលែកព័តមាននេះ