សង្គ្រាមអីុស្រាអែល-អីុរ៉ង់ ៖ ប្រធានាធិបតីអាមេរិកលោកដូណាល់ត្រាំកាលពីថ្ងៃ១៥មិថុនា បានអំពាវនាវដល់អីុស្រាអែលនិងអីុរ៉ង់ ឲ្យស្វែងរកកិច្ចព្រមព្រៀងមួយក៏ទោះបីប្រទេសទាំង២អាចត្រូវវាយប្រហារគ្នាជាមុនក្ដី។ លោកថ្លែងបែបនេះក្នុងពេលដែលប្រទេសទាំង២ជាសត្រូវជូរចត់ បន្តវាយប្រហារគ្នាទៅវិញទៅមកកាន់តែខ្លាំងចូលដល់យប់ទី៤ជាប់គ្នា។
នាព្រឹកថ្ងៃទី១៥មិថុនានោះតាមបណ្ដាញសង្គមTRUTH SOCIALលោកត្រាំសរសេរថា អីុរ៉ង់និងអីុស្រាអែលត្រូវស្វែងរកកិច្ចព្រមព្រៀងមួយ ហើយកិច្ចព្រមព្រៀងនោះនឹងអាចរកឃើញ។ លោកបន្តថាមានការអំពាវនាវព្រមទាំងការជួបគ្នាជាច្រើនត្រូវបានធ្វើនាពេលនេះ។
មុនពេលលោកចេញដំណើរទៅចូលរួមប្រជុំក្រុមប្រទេសអ្នកមានG7នៅកាណាដា លោកត្រាំបានលើកជាថ្មីការអំពាវនាវដល់ប្រទេសទាំង២ ថា ខ្ញុំគិតថាដល់ពេលដែលត្រូវចុះហត្ថលេខាលើកិច្ចព្រមព្រៀងមួយហើយ ហើយខ្ញុំរង់ចាំមើលថាតើនឹងមានអ្វីកើតឡើងខ្លះ។ ជួនកាលពួកគេត្រូវច្បាំងគ្នាតែខ្ញុំរង់ចាំមើលថាតើមានអ្វីខ្លះនឹងកើតមាន។ ខ្ញុំក៏គិតដែរថាមានភ័ព្វវាសនាល្អដែលមានកិច្ចព្រមព្រៀងមួយ។
ម្យ៉ាងវិញទៀតលោកត្រាំចង់រារាំងនាយករដ្ឋមន្ត្រីអីុស្រាអែល លោកបេនចាមីននេតាន់យ៉ាចៀសវាងកុំដើរឆ្ងាយជ្រុល ក្នុងការវាយប្រហារប្រឆាំងរបបអីុរ៉ង់។ ប្រធានាធិបតីអាមេរិកប្រឆាំងនឹងផែនការអីុស្រាអែល ដែលតាមធ្វើឃាតមេដឹកនាំកំពូលអីុរ៉ង់ លោកអាយ៉ាតុលាអាលីខាមេនី។ អ្នកទទួលខុសត្រូវអាមេរិកម្នាក់ ថ្លែងកាលពីថ្ងៃទី១៥មិថុនាថា យើងបានដឹងថាអីុស្រាអែលគ្រោងប្រកាន់យកគោលដៅតាមសម្លាប់មេដឹកនាំកំពូលអីុរ៉ង់។ លោកប្រធានាធិបតីត្រាំបានប្រឆាំងហើយនិយាយប្រាប់ថាមិនត្រូវធ្វើឡើយ៕
ចែករំលែកព័តមាននេះ