ទីក្រុងយេរូសាឡឹម៖ អ៊ីស្រាអែលកំពុងរៀបចំផែនការធ្វើឃាតមេដឹកនាំកំពូលរបស់អ៊ីរ៉ង់។ ប៉ុន្តែលោកត្រាំចេញមុខជំទាស់នឹងគម្រោងនេះ។ ត្រាំបារម្ភថាបើអ៊ីស្រាអែលហ៊ានធ្វើដល់ថ្នាក់នេះ សង្គ្រាមនឹងផ្ទុះឡើងពេញទំហឹង ហើយតំបន់មជ្ឈិមបូព៌ានឹងធ្លាក់ទៅក្នុងវិបត្តិធ្ងន់ធ្ងរ។ ខាងលើនេះជាការបង្ហើបឱ្យដឹងពីមន្ត្រីរដ្ឋាភិបាលអាមេរិកដែលស្នើសុំមិនបញ្ចេញឈ្មោះ។ ដំណឹងស្ដីពីលោកត្រាំជំទាស់នឹងផែនការនេះត្រូវបានចុះផ្សាយដំបូងគេដោយទីភ្នាក់ងារព័ត៌មានរ៉យទ័រ។
នៅក្នុងបទសម្ភាសជាមួយទូរទស្សន៍ហ្វក់ (Fox) កាលពីពេលថ្មីៗនេះ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ មិនបានឆ្លើយត្រង់ៗទៅនឹងសំណួរធ្វើឃាតនេះទេ។ ប៉ុន្តែលោកនិយាយដោយប្រយោលថាអ៊ីស្រាអែលត្រូវធ្វើអ្វីដែលខ្លួនយល់ថាត្រូវតែធ្វើ។ លោកសង្ឃឹមថាពួកអាមេរិកាំងនឹងយល់ត្រង់ចំណុចនេះ។ សេតវិមានបានប្រាប់អ៊ីស្រាអែលច្បាស់ៗតែម្ដងថាលោកត្រាំប្រឆាំងនឹងផែនការរបស់អ៊ីស្រាអែលព្រោះគាត់មិនគាំទ្រការផ្លាស់ប្ដូររបបដឹកនាំទេ មិនថានៅអ៊ីរ៉ង់ ឬនៅប្រទេសដទៃទៀតនោះឡើយ។
ជាការពិត ត្រាំចង់ទប់ស្កាត់មិនឱ្យអ៊ីរ៉ង់មានអាវុធនុយក្លេអ៊ែរ។ គាត់អាចនឹងគាំទ្រឱ្យអ៊ីស្រាអែលវាយប្រហារអ៊ីរ៉ង់តាំងពីមុនផ្ទុះអាវុធទៅទៀត។ ប៉ុន្តែការផ្លាស់ប្ដូររបប ឬផ្ដួលរំលំរដ្ឋាភិបាលអ៊ីរ៉ង់មិនមែនជាអ្វីដែលត្រាំចង់បាននោះទេ។ ដូច្នេះ ផែនការរបស់អ៊ីស្រាអែលហាក់ដូចជាវែងឆ្ងាយពេក។ លោកណឺតាន់យ៉ាហ៊ូនៅតែនិយាយយ៉ាងទទូចថារបបអ៊ីរ៉ង់សព្វថ្ងៃនេះនៅមិនបានយូរទេព្រោះចាប់ផ្ដើមបង្ហាញសញ្ញាចុះខ្សោយជាបណ្ដើរៗទៅហើយ។
មន្ត្រីរដ្ឋាភិបាលអាមេរិកប្រាប់ទូរទស្សន៍ស៊ីប៊ីអែស (CBS) ថាអ៊ីស្រាអែលបើសិនចង់ធ្វើឃាតអគ្គមគ្គុទ្ទេសក៍អ៊ីរ៉ង់ ខាមេនី (Khamenei) អាចធ្វើបាន។ ប៉ុន្តែលោកត្រាំនៅតែរារាំងជានិច្ច។ ចាប់តាំងពីអ៊ីស្រាអែលវាយប្រហារអ៊ីរ៉ង់នៅថ្ងៃដំបូង លោកទាំង២បន្តទាក់ទងគ្នាតាមទូរស័ព្ទជាហូរហែ។ មន្ត្រីជាន់ខ្ពស់អ៊ីស្រាអែលប្រាប់ថាអ៊ីស្រាអែលមិនមានគោលការណ៍ធ្វើឃាតមេដឹកនាំនយោបាយទេ។
គោលដៅរបស់យើងគឺវាយប្រហារទីតាំងនុយក្លេអ៊ែរ និងយោធាតែប៉ុណ្ណោះ។ ប៉ុន្តែមេដឹកនាំដែលសម្រេចចិត្តនៅក្នុងកម្មវិធីនុយក្លេអ៊ែរក៏មិនអាចរស់នៅមានសេចក្ដីសុខបានឡើយ។ ជាក់ស្ដែង នៅអ៊ីរ៉ង់អ្នកសម្រេចចិត្តបង្កើតកម្មវិធីស្រាវជ្រាវនុយក្លេអ៊ែរគឺអគ្គមគ្គុទ្ទេសក៍អាយ៉ាតូឡា ខាមេនី (Ayatollah Khamanei)។ ដូច្នេះគាត់ត្រូវតែគិតអំពីចំណុចនេះឡើងវិញ។
លោកត្រាំមិនបានធ្វើអត្ថាធិប្បាយទៅលើព័ត៌មានស្ដីពីផែនការធ្វើឃាតនោះទេ។ ប៉ុន្តែលោកសូមព្រមានអ៊ីរ៉ង់ថាកុំវាយប្រហារទៅលើផលប្រយោជន៍របស់អាមេរិកនៅមជ្ឈិមបូព៌ា។ លោកត្រាំបញ្ជាក់ថាអាមេរិកមិនជាប់ពាក់ព័ន្ធនឹងការវាយប្រហាររបស់អ៊ីស្រាអែលទេ។ ប៉ុន្តែអ៊ីរ៉ង់យល់ថាអ៊ីស្រាអែលប្រាកដជាទទួលបានសញ្ញាភ្លើងខៀវពីអាមេរិក។ បើមិនដូច្នេះទេ ពួកគេមិនហ៊ានវាយប្រហារខ្លាំងដល់ថ្នាក់នេះឡើយ។ ហេតុនេះ អ៊ីរ៉ង់សម្រេចចិត្តលុបចោលគម្រោងចរចានុយក្លេអ៊ែរជាមួយអាមេរិកដែលរៀបចំនៅប្រទេសអូម៉ង់កាលពីថ្ងៃអាទិត្យ៕
ចែករំលែកព័តមាននេះ