ទីក្រុងវ៉ាស៊ីនតោន៖ លោកត្រាំថ្លែងថាលោកធ្លាប់បានទុកពេលឱ្យអ៊ីរ៉ង់ច្រើនគួរសមដែរដើម្បីពិចារណា និងសម្រេចទៅលើកិច្ចព្រមព្រៀងនុយក្លេអ៊ែរ។ នោះជាឱសានវាទ៦០ថ្ងៃដើម្បីចរចាជាមួយទីក្រុងវ៉ាស៊ីនតោន។ បើមិនដូច្នេះទេ ការវាយប្រហារទៅលើទីតាំងនុយក្លេអ៊ែរនឹងកើតមាន។ លោកត្រាំអះអាងថាករណីអ៊ីស្រាអែលវាយប្រហារថ្ងៃនេះជាកំហុសរបស់អ៊ីរ៉ង់ខ្លួនឯងតែប៉ុណ្ណោះដែលមិនព្រមចរចាត្រូវរ៉ូវគ្នាដើម្បីឱ្យមានកិច្ចព្រមព្រៀងនុយក្លេអ៊ែរ។
លោកត្រាំគិតថាអ្វីៗនៅល្អប្រសើរនៅឡើយទេ។ យើងទុកឱកាសឱ្យពួកគេ (អ៊ីរ៉ង់) ម្ដងហើយ ប៉ុន្តែពួកគេមិនព្រមក្ដាប់ឱកាសនោះឱ្យជាប់។ លោកយល់ថាមិនថាតែអ៊ីរ៉ង់ទេ សូម្បីតែប្រទេសដទៃទៀតក៏ដូចគ្នាដែរ។ បើនៅតែប្រកាន់ឥរិយាបថបែបនេះពួកគេនឹងរងការវាយប្រហារដូចគ្នា។ ត្រាំព្រមានថាអ៊ីរ៉ង់អាចនឹងរងការវាយប្រហារជាថ្មី ហើយអាចរឹតតែធ្ងន់ជាងនេះទៅទៀត។
លោកបានបង្ហោះសារនៅលើបណ្ដាញសង្គមថា «កាលពី២ខែមុន លោកទុកពេលឱ្យអ៊ីរ៉ង់៦០ថ្ងៃដើម្បីចរចាគ្នាឱ្យមានកិច្ចព្រមព្រៀង។ ពួកគេគួរណាស់ធ្វើកិច្ចការនេះចប់នៅក្នុងអំឡុងពេល៦០ថ្ងៃនោះ។ នេះជាថ្ងៃទី៦១ហើយ ហើយសង្ឃឹមថាពួកគេមានឱកាសជាលើកទី២»។ អាមេរិកប្រកាសថាខ្លួនមិនជាប់ពាក់ព័ន្ធនឹងការវាយប្រហាររបស់អ៊ីស្រាអែលទេព្រោះពួកគេធ្វើរឿងនេះជាឯកតោភាគីតែប៉ុណ្ណោះ។ ដូច្នេះអាមេរិកសូមផ្ដាំទៅអ៊ីរ៉ង់កុំខឹងគោវាយរទេះ។ កុំវាយប្រហារផលប្រយោន៍អាមេរិកនៅមជ្ឈិមបូព៌ា។
បន្ទាប់ពីទទួលរងការវាយប្រហារកាលពីយប់មិញ អ៊ីរ៉ង់ប្រកាសថាខ្លួននឹងសងសឹកករណីស្លាប់សុទ្ធតែមេទាហានធំៗរបស់ខ្លួន។ ដូច្នេះ អ៊ីរ៉ង់បញ្ជូនដ្រូនជាង១រយគ្រឿងទៅវាយប្រហារអ៊ីស្រាអែល។ ប៉ុន្តែពីអ៊ីរ៉ង់ទៅអ៊ីស្រាអែលមានរយៈចម្ងាយឆ្ងាយគួរសម និងត្រូវការពេលវេលាជាច្រើនម៉ោងទម្រាំហោះទៅដល់។ ដូច្នេះ ប្រព័ន្ធការពារដែនអាកាសរបស់អ៊ីស្រាអែលអាចបាញ់ទម្លាក់ស្ទើរតែទាំងអស់។ ហេតុនេះ គេឃើញថាត្រឹមម៉ោង៨ម៉ោងសាកល អ៊ីស្រាអែលលុបចោលការប្រកាសអាសន្ន។
ប្រធានាធិបតីអ៊ីរ៉ង់ លោកម៉ាស៊ូត ប៉េហ្សេស្គាន (Masoud Pezeshkian) អំពាវនាវឱ្យប្រជាជនអ៊ីរ៉ង់ទាំងអស់បន្តគាំទ្រថ្នាក់ដឹកនាំរបស់ខ្លួន ។ លោកព្រមានថាអ៊ីរ៉ង់នឹងវាយប្រហារទ្រង់ទ្រាយធំ ហើយនឹងធ្វើឱ្យអ៊ីស្រាអែលមានវិប្បដិសារីចំពោះទង្វើដែលខ្លួនបានសាង។ ក្រោយព្រឹត្តិការណ៍វាយប្រហារនោះ ប្រេងឆៅឡើងថ្លៃ៨%ព្រោះគេបារម្ភថាទីតាំងផលិតប្រេងសំខាន់ៗអាចនឹងរងការខូចខាត។ ប៉ុន្តែទីតាំងផលិតប្រេងរបស់អ៊ីរ់ង់នៅល្អទាំងអស់ព្រោះអ៊ីស្រាអែលវាយទីតាំងយោធា និងទីតាំងនុយក្លេអ៊ែរតែប៉ុណ្ណោះ។
ប្រភពសម្ងាត់ពីអ៊ីស្រាអែលបង្ហើបឱ្យដឹងថាកងកុម្ម៉ង់ដូម៉ូសាត (Mossad) របស់អ៊ីស្រាអែលបានបើកប្រតិបត្តិការសឹកចូលជ្រៅៗនៅក្នុងប្រទេសអ៊ីរ៉ង់មួយសាហើយ ហើយទីភ្នាក់ងារសម្ងាត់អ៊ីស្រាអែលក៏បានបើកប្រតិបត្តិការជាច្រើនដំណាក់កាលទៀតដើម្បីរំខានប្រព័ន្ធគ្រប់គ្រងមីស៊ីលរបស់អ៊ីរ៉ង់។ បន្ទាប់មកទើបអ៊ីស្រាអែលបើកយុទ្ធនាការទម្លាក់គ្រាប់បែក និងវាយប្រហារតាមអាកាស៕
ចែករំលែកព័តមាននេះ