ខេត្តស្ទឹងត្រែង ៖ សេចក្តីរាយការណ៍ឱ្យដឹងបន្ត នៅវេលាម៉ោង០៨ និង៤០នាទីយប់ថ្ងៃទី២៦ មិថុនា ថា ចំពោះវត្ថុតាងគ្រឿងញៀនដ៏សន្ធឹកសន្ធាប់ចំនួន១២០ដុំ និងជនសង្ស័យ៣នាក់ព្រមទាំងរថយន្តក្រុង
«សូរិយា» ត្រូវបានបញ្ជូនមកច្រកអន្តរជាតិត្រពាំងគ្រៀល ទៅចូលស្នងការនគរបាលខេត្ត ហើយត្រូវនគរបាលកំពុងសាកសួរនិងចាត់ការបន្តតាមនីតិវិធី ។
សេចក្តីរាយការណ៍បន្តថា ដោយឡែក មេការតំណាងរថយន្តក្រុងសូរិយា ដែលអង្គុយមុខស្នងការខេត្ត ដើម្បីរង់ចាំព័ត៌មាន ។ សមត្ថកិច្ចអន្តោប្រវេសន៍ប្រចាំការនៅច្រកទ្វារអន្តរជាតិត្រពាំងគ្រៀល(ព្រំដែនកម្ពុជា-ឡាវ) បានបង្ក្រាបគ្រឿងញៀនប្រភេទម៉ាទឹកកកចំនួន១២០គីឡូក្រាម (ស្មើនិង១២០ដុំ) ដែលជនល្មើសយកមកពីប្រទេសឡាវ បំណងចូលមកកម្ពុជា ដោយប្រើប្រាស់មធ្យោបាយរថយន្តក្រុងរបស់ក្រុមហ៊ុនភ្នំពេញ-សូរិយា មានស្លាកលេខភ្នំពេញ 3C-2671 និងឃាត់ខ្លួនជនសង្ស័យជាជនជាតិខ្មែរ៣នាក់ផងដែរ។
បើតាមខាងជំនាញគ្រឿងញៀនបានបញ្ជាក់ថា ជនសង្ស័យទាំង៣នាក់១-ឈ្មោះឈៀវ ធារ៉ូ ភេទប្រុស អាយុ៣៥ឆ្នាំ ២-ឈ្មោះ ហែម សាវ៉ន ភេទប្រុស អាយុ៣៥ឆ្នាំ និងទី៣-ធៀវ តុងហៃ ភេទប្រុស អាយុ៣៧ឆ្នាំ ។ វត្ថុតាងជាគ្រឿងញៀនប្រភេទម៉ាទឹកកក អ៊ិចស្ដាហ្ស៊ី មានទម្ងន់សរុបទាំងអស់ចំនួន១២០គីឡូ
ក្រាម ។
គួររំលឹកថា ថ្នាំញៀនចំនួន១២០ដុំ ក្នុងមួយដុំប្រហែល១គីឡូក្រាម ដែលតាមការប៉ាន់ស្មានអាចជាង១០០គីឡូក្រាម ត្រូវបានរកឃើញនៅក្នុងរថយន្តក្រុងដឹកអ្នកដំណើរសូរិយា ដែលធ្វើដំណើរចេញពីច្រកទ្វារអន្តរជាតិ និងមានគោលដៅឆ្ពោះទៅរាជធានីភ្នំពេញ ។
ប្រភពដដែលបន្តថា គ្រឿងញៀនដ៏សន្ធឹកសន្ធាប់នេះ ត្រូវបានក្រុមឧក្រិដ្ឋជននាំចេញពីប្រទេសឡាវកាលពីវេលាម៉ោងជាង៣រសៀលថ្ងៃទី២៦ មិថុនា ។ ទោះបីជាបែបណា ការបន្លំដឹកដូចទំនិញនេះ មិនអាចលាក់បាំងសមត្ថកិច្ចបានឡើយ ។ ក្រោយការឆែកឆេររកឃើញគ្រឿងញៀនប្រភេទមេតំហ្វេតាមីន(ម៉ាទឹកកក)ចំនួន១២០ដុំ ដែលមានទម្ងន់ជាង១០០គីឡូក្រាមនេះ សមត្ថកិច្ចក៏បានឃាត់ខ្លួនមនុស្សប្រុសចំនួន៣នាក់ ដែលមានការពាក់ព័ន្ធក្នុងករណីនេះគឺ ១-អ្នកបើកបររថយន្តដឹកអ្នកដំណើរសូរិយា ២-អ្នកបកប្រែភាសា និង៣-សង្ស័យជាម្ចាស់គ្រឿងញៀន ។
ទោះបីជាបែបណា មន្ត្រីមានសមត្ថកិច្ចក្នុងការបង្ក្រាបគ្រឿងញៀនដ៏ធំនេះ មិនបានផ្តល់ព័ត៌មានឱ្យដឹងទេពេលកំពុងធ្វើប្រតិបត្តិការ ។ គួរកត់សម្គាល់ថា នេះជាលើកដំបូងហើយដែលមានការបង្ក្រាបអំពើរត់ពន្ធគ្រឿងញៀនដ៏ច្រើនបំផុតមិនធ្លាប់មានពីមុនមកនៅប្រទេសកម្ពុជា ដែលកន្លងមកធ្លាប់បង្ក្រាបបានតែជាង៥០គីឡូក្រាមតែប៉ុណ្ណោះ ។
ការបង្ក្រាបនេះ ក៏ចំថ្ងៃដែលមានការប្រារព្ធទិវាអន្តរជាតិ ប្រយុទ្ធប្រឆាំងគ្រឿងញៀនផងដែរ ។ ខណៈប្រតិបត្តិការនេះ កំពុងប្រព្រឹត្តទៅ ការស្វែងរកព័ត៌មានលម្អិតមិនត្រូវបានមន្ត្រីសមត្ថកិច្ចផ្តល់ព័ត៌មានផ្លូវការនៅឡើយទេ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ