មេត្តាទាំងបីប្រការខាងក្រោមនេះ ជាហេតុធ្វើឱ្យប្រជារាស្ត្ររុងរឿងក្នុងនោះ ៖
១-មេត្តាមនោកម្ម គឺមេត្តាតាមផ្លូវចិត្ត តាមការគិតគឺៈ
គិតតែរឿងដែលនាំឱ្យរាស្ត្របានសុខ, គិតតែរឿងណាមិនឱ្យរាស្ត្រមានការចងគំនុំ ព្យាបាទគ្នានិងគ្នា, គិតតែរឿងណា ដែលឱ្យរាស្ត្រសម្បូរសប្បាយ មានទ្រព្យ, សម្បត្តិ មិនមានជំងឺ មានការចេះដឹង បានចម្រុងចម្រើនក្នុងការងារ, គិតតែពីរឿងណា ដែលអាចការពារមិនឱ្យឧបសគ្គ, សត្រូវទាំងឡាយចូលមកបំផ្លាញសេចក្តីសុខ, សិទ្ធិសេរីភាព, សីលធម៌ប្រជាធិបតេយ្យរបស់រាស្ត្រប្រជាខ្លួនបាន ។
ភាវនាទន្ទេញ ផ្សាយមេត្តាដល់រាស្ត្រប្រជាខ្លួនជាប់ជានិច្ចថា សូមឱ្យរាស្ត្រប្រជាទាំងឡាយដែលនៅទិសខាងកើត ខាងលិច ខាងជើង ខាងត្បូងកុំបីមានពៀរវេរានឹងគ្នាឡើយ សូមឱ្យបាននូវសេចក្តីសុខ សូមកុំឱ្យមានសេចក្តីទុក្ខ សូមកុំមានការព្យាបាទគ្នា សូមឱ្យបានអាយុវែង សូមកុំឱ្យមានរោគ សូមឱ្យបរិបូណ៌ដោយទ្រព្យសម្បត្តិ សូមឱ្យបានសុខគ្រប់ៗគ្នាទាំងអស់ បើទុក្ខមានក៏សូមឱ្យអស់ទៅ ភ័យឯណាដែលមាន ក៏សូមឱ្យអស់ទៅ សេចក្តីសោកសៅដែលកំពុងមាន ក៏សូមឱ្យអស់ទៅហោង ។
២-មេត្តាវចីកម្ម គឺមេត្តាតាមផ្លូវសំដី តាមវាចា គឺបានដល់ៈ
និយាយតែពាក្យពិរោះ មិនទ្រគោះបោះបោក, និយាយតែពាក្យពិត ពាក្យមិនបោកបញ្ឆោត ភូតភរ, និយាយតែពាក្យដែលនាំឱ្យគេស្រឡាញ់គ្នា មានសាមគ្គី, និយាយតែពាក្យដែលមានប្រយោជន៍, ពាក្យដែលនាំឱ្យចម្រើនដល់ជីវិតរស់នៅរបស់រាស្ត្រប្រជា ។
៣-មេត្តាកាយកម្ម គឺមេត្តាតាមទង្វើដែលប្រព្រឹត្តដោយកាយៈ
ធ្វើតែកម្មណា ដែលមិនប៉ះពាល់ដល់ជីវិត រាងកាយរបស់រាស្ត្រប្រជា ដូចជា មិនប្រើអំពើឃោរឃៅ អំពើអមនុស្សធម៌ ផ្តាច់ការដោយអាវុធជាដើម។ ធ្វើតែកម្មណា ដែលមិនប៉ះពាល់ដល់សេចក្តីសុខ ទ្រព្យសម្បត្តិរបស់រាស្ត្រដូចជា ស៊ីសំណូក លួចទ្រព្យជាតិ រឹបអូសទ្រព្យរាស្ត្រដោយអាងអំណាចទាំងខុសច្បាប់ យកពន្ធ ភាស៊ី អាករធ្ងន់ពេកជាដើម ។ ធ្វើតែអំពើណា ដែលធ្វើឱ្យសុភមង្គលក្នុងគ្រួសាររបស់រាស្ត្រប្រជា រឹងប៉ឹង សុខដុមរមនា។
ធ្វើតែអំពើណា ដែលមេត្តាមនោកម្មបានគិត មេត្តាវចីកម្មបាននិយាយដោយការមានមេត្តាស្រឡាញ់រាស្ត្រស្មើនឹងស្រឡាញ់ខ្លួនឯង ។
ចែករំលែកព័តមាននេះ