ភាគីថៃបំភ្លឺមូលហេតុកីឡាករជើងខ្លាំងរបស់ខ្លួនសន្លប់ឈរ
- ភ្នំពេញ
រាជធានីភ្នំពេញ ៖ ការប្រកួតអន្តរជាតិរវាងកីឡាករកម្ពុជា សុខ សាវិន នៅលើសង្វៀន ទូរទស្សន៍អាស៊ីអាគ្នេយ៍ ជាមួយនឹងកីឡាករថៃ Pin Ngen…
រាជធានីភ្នំពេញ ៖ ការប្រកួតអន្តរជាតិរវាងកីឡាករកម្ពុជា សុខ សាវិន នៅលើសង្វៀន
ទូរទស្សន៍អាស៊ីអាគ្នេយ៍ ជាមួយនឹងកីឡាករថៃ Pin Ngen នៅតែធ្វើឱ្យអ្នកទស្សនាដក់អារម្មណ៍ភាគច្រើននៅឡើយ ដោយសារតែកីឡាករកម្ពុជា បើទោះជាធ្លាប់ឡើងរេញអន្តរជាតិខ្លះៗមុនមកដល់សង្វៀនទូរទស្សន៍អាស៊ីអាគ្នេយ៍ក៏ត្រូវគេចាត់ទុកថាជាជើងថ្មី ដែលមិនគួរណាមានសមត្ថភាពវាយជើងខ្លាំងថៃម្នាក់ដល់ថ្នាក់សន្លប់ឈរលើរេញ ត្រឹមតែរយៈពេល២នាទីបើកឆាកប៉ុណ្ណោះ។
លោកបានប្រើបច្ចេកទេសពិសេសធ្វើឱ្យកីឡាករថៃបញ្ឈរភ្នែកទោះបីលោកអាជ្ញាកណ្ដាលរាប់ដល់១០ទៅហើយក៏មិនអាចទប់ជំហរបានដែរ ។ ពាក់ព័ន្ធនឹងការបរាជ័យដ៏គួរឱ្យភ្ញាក់ផ្អើលនេះ ភាគីកីឡាករថៃ ក៏បានចេញមុខបញ្ជាក់មូលហេតុ ដើម្បីកុំឱ្យមានការយល់ច្រឡំថា កីឡាកររបស់ខ្លួនអន់នោះផងដែរ។
ការប្រកួតកាលពីថ្ងៃទី២៤ មិថុនានោះ ម្នាក់ៗមានការចាប់អារម្មណ៍ហួសប្រមាណ ជាពិសេសការប្រកួតមិនទាន់ក្ដៅសាច់ផងស្រាប់តែកីឡាករ សុខ សាវិន មកពីក្លិបអេលីតគុនខ្មែរ ហ៊ានប្រើបច្ចេកទេសនាគវ័ធកន្ទុយត្រូវចំកញ្ចឹងកកីឡាករថៃ Pin Ngen បណ្ដាលឱ្យសន្លប់ឈរនៅលើរេញ និងត្រូវគ្រូពេទ្យធ្វើចលនាអស់មួយសន្ទុះធំទើបដឹងស្មារតីមកវិញ ។ ស្នៀតដែលកម្ពុជាបានប្រើត្រូវគេមើលឃើញថា បើគ្មានសំណាងទេគឺពិតជាត្រូវកីឡាករថៃទាត់ពីក្រោយក្នុងពេលបង្វិលខ្លួនបណ្ដាលឱ្យសន្លប់ឈរដូចគ្នា ទើបជ័យជម្នះមួយនេះម្នាក់ៗសរសើរកីឡាករកម្ពុជាថា ពិតជាហ៊ានមែន ។ ម្នាក់ៗស្រឡាំងកាំងនៅពេលឃើញកីឡាករជើងខ្លាំងថៃត្រូវសន្លប់ឈរក្នុងទឹកទី១ ក្រោមដៃកីឡាករជើងថ្មីកម្ពុជា ។
អ្នកគាំទ្របានលាន់មាត់សរសើរកីឡាកររូបនេះ ទើបតែមានមុខឡើងរេញអន្តរជាតិលើកទី១នៅប៉ុស្តិ៍អាស៊ីអាគ្នេយ៍សោះ តែអាចបង្កការភ្ញាក់ផ្អើលរហូតដល់ពិធីករប្រកាសដាក់ក្បាលមេក្រូក្ដែងៗថា សុខ សាវិន ពិតជាខ្លាំងមិនធម្មតាដែលអាចប្រើស្នៀតនាគវ័ធកន្ទុយធ្វើឱ្យកីឡាករថៃសន្លប់យ៉ាងងាយបែបនេះ។
តំណាងភាគីថៃ បានអះអាងថា ការបរាជ័យរបស់កីឡាករថៃបណ្ដាលមកពីការធ្វេសប្រហែស នៅទឹកដំបូងដែលកីឡាករភាគច្រើនមិនទាន់បញ្ចេញស្នៀតនៅឡើយ ។ គាប់ជួនជាកីឡាករថៃនៅក្នុងថ្ងៃនោះជិះឡានផ្លូវឆ្ងាយ ហើយមិនធ្លាប់ឡើងរេញពេលព្រឹកទាំងទើបហូបអាហារថ្មីៗឱ្យមានកម្លាំងផង ទើបត្រូវសន្លប់ព្រោះតែត្រូវមួយជើងនោះ ។
ទោះបីយ៉ាងណា លោក ថៃ អ៊ូ អ្នកដឹកនាំកីឡាករថៃឱ្យមកប្រកួតនៅលើសង្វៀនទូរទស្សន៍អាស៊ីអាគ្នេយ៍ បានសរសើរថា កម្លាំងជើង និងបច្ចេកទេសនាគវ័ធកន្ទុយរបស់កីឡាករកម្ពុជាក៏មិនធម្មតាដែរ ទើបធ្វើឱ្យជើងខ្លាំងរបស់ខ្លួនសន្លប់ឈរក្នុងទឹកទី១ ទាំងនឹកស្មានមិនដល់។ ភាគីថៃបន្តថា បើការប្រកួតនេះមិនធ្វើឡើងចំពេលព្រឹក គឺសមត្ថភាពត្រឹមសុខ សាវិន មិនអាចទៅរួចជាមួយកីឡាករខ្លួននោះទេដោយសារតែគេក៏ជាជើងខ្លាំងម្នាក់ ។ លោកមានគម្រោងពិភាក្សាជាមួយអ្នករៀបចំកម្មវិធីប្រកួតដើម្បីឱ្យកីឡាកររបស់លោកឡើងប្រកួតសងសឹក ប៉ុន្តែសុំឱ្យប៉ះគ្នាម៉ោងផ្សេងវិញចៀសវាងពេលព្រឹកបែបនេះទៀត៕
ចែករំលែកព័តមាននេះ