ខេត្តកំពង់ស្ពឺ ៖ សូមជម្រាបដល់ក្រុមអ្នកញៀនល្បែង បញ្ជល់មាន់និងអាប៉ោងថា ពេលនេះរកកន្លែងបើកសង្វៀនបញ្ជល់ថ្មីបានហើយ បើចង់ទៅលេងសូមទាក់ទងតាមខ្សែបណ្តោយ(មេ)នោះនឹងមានអ្នកនាំផ្លូវទៅជាក់ជាមិនខានឡើយ។បើធ្វើដំណើរចេញពីរង្វង់មូលវិមានឯករាជ្យកាត់មុខសាលាខេត្តឆ្ពោះទៅទិសខាងត្បូង ហួសឃុំស្គុះនឹងទៅដល់ឃុំក្រាំងអំពិល ស្ថិតក្នុងស្រុកសំរោងទងហើយ ។ ពេលទៅដល់មានអ្នកចាំនាំផ្លូវចូលទៅសង្វៀននោះជាក់ជាមិនខានឡើយតែបើមិនឃើញអ្នកនាំផ្លូវទេ គ្រាន់តែសួររកផ្លូវចូលទៅបន្ទាយទាហានដែលទើបនឹងមកដាក់ថ្មី(ថ្លុកតាសេក) នៅទីនោះអ្នកណាក៏ស្គាល់ដែរព្រោះនៅជិតបន្ទាយតែម្តង ។ មានផ្លូវមួយខ្សែទៀត គឺចេញពីផ្លូវសាលាស្រុកគងពិសី តាមផ្លូវទៅភ្នំជាលជិតដល់វត្តជ្រោះកន្លង អាចសួររកផ្លូវទៅសង្វៀននោះបានដូចគ្នា ។
សង្វៀនបញ្ជល់មាន់និងអាប៉ោងនេះត្រូវបានដឹងថា មានសុវត្ថិភាពគ្រប់គ្រាន់ព្រោះតែអ្នកកាងនៅទីនោះសុទ្ធតែមានឋានៈបុណ្យស័ក្តិធំៗសម្បើមណាស់ ដែលអាជ្ញាធរថ្នាក់ក្រោមល្មមៗមិនហា៑នឡើយ កុំថាបង្ក្រាបសូម្បីតែទៅអើតមើលក៏មិនហ៊ានដែរ ។ ប្រភពព័ត៌មានបានឲ្យដឹងថា អ្នកចូលចិត្តទៅលេងអាប៉ោងនិងបញ្ជល់មាន់ភាគច្រើនជាអ្នកចម្ងាយ អ្នកមូលដ្ឋានមិនសូវមានទេ ហើយបើមានក៏តិចតួចដែរ ។ មន្ត្រីនគរបាលមូលដ្ឋានមួយរូប ធ្លាប់ឮម្ចាស់ភាគហ៑ុនមួយរូបរអូ៊ថា រាល់ថ្ងៃនេះតុងមិនសូវបានទេព្រោះខាងទាហានគេចង់បាញ់អាប៉ោងតែឯង ឯខាងគាត់មានតែមាន់ ដូច្នេះចំណូលបានតិចជាងខាងទាហាន ។ ទោះជាយ៉ាងណាក៏ត្រូវតែខំ ព្រោះបានប្រមូលលុយបង់ឲ្យមេៗនៅខេត្តអស់ច្រើនគួរសមហើយដែរ បើមិនខំកៀរគរគ្នាមកលេងខ្លាចខាតដើម ។
មន្ត្រីដដែលនេះបន្តថា មិនដឹងថាតើការបើកឲ្យមានលេងល្បែងបញ្ជល់មាន់និងអាប៉ោងនេះ ថ្នាក់ដឹកនាំបានជ្រាបដែរឬទេថា ក្រុមអ្នកញៀនល្បែងទាំងនេះបានយកឈ្មោះអស់លោកមេៗមកបិទបាំងដើម្បីបន្លាចថ្នាក់ក្រោម ។ កូនចៅក្រោមៗឮតែឈ្មោះមេៗ តើអ្នកណាហា៑នសួរមេ ?បើតាមមន្ត្រីនគរបាលការិយាល័យបច្ចេកទេសមួយរូបបានបង្ហើបថា មេសង្វៀននេះគេបានរត់ការជាមួយមេៗអស់ហើយ ជាពិសេសខាងព្រហ្មទណ្ឌកម្រិតស្រាល ។ ចំពោះការបើកលេងគឺគេលេងបានមួយអាទិត្យហើយ ដោយចំណូលបានពីអាប៉ោងរាប់លានរៀលក្នុង១ថ្ងៃៗ ហើយចំពោះថ្ងៃសៅរ៍និងអាទិត្យគឺបានច្រើនជាងថ្ងៃធម្មតា ព្រោះថាមនុស្សទៅលេងច្រើន ។ប្រជាពលរដ្ឋរស់នៅក្បែរតំបន់ខាងលើ បានសំណូមពរទៅលោកអភិបាលខេត្ត មេត្តាចាត់វិធានការបង្ក្រាបសង្វៀនបញ្ជល់មាន់និងអាប៉ោងនេះផង បើមិនដូច្នោះទេប្រជាពលរដ្ឋច្បាស់ជាដេកមិនលក់ជាមិនខានឡើយ ព្រោះថាវង់ល្បែងបានមកបើកលេងនៅជិតភូមិ ឃុំរបស់ពួកគាត់បែបនេះ ។ ប្រជាពលរដ្ឋនៅមូលដ្ឋានខាងលើមានសង្ឃឹមនិងជឿជាក់តែលើលោកអភិបាលខេត្តម្នាក់គត់ ដែលអាចចាត់វិធានការបង្ក្រាបសង្វៀនបញ្ជល់មាន់និងអាប៉ោងនេះបាន ៕
ចែករំលែកព័តមាននេះ