រាជធានីភ្នំពេញ ៖ ការប្រកួតអន្តរជាតិរបស់កីឡាករ សុខ សាវិន នៅលើសង្វៀនទូរទស្សន៍ SEATV នៅតែធ្វើឱ្យអ្នកទស្សនាដក់អារម្មណ៍ ដោយសារតែលោកទើបតែមានឱកាសឡើងប្រកួតនៅលើសង្វៀនអន្តរជាតិអាស៊ីអាគ្នេយ៍ជាលើកទី១ប៉ុណ្ណោះ ប៉ុន្តែគេអាចប្រើស្នៀតពិសេសវាយឱ្យកីឡាករថៃដែលគេស្គាល់ថា ជាជើងខ្លាំងមួយរូបដែរឱ្យសន្លប់ឈរត្រឹមតែរយៈពេល២នាទី មានន័យថា ការប្រកួតមិនទាំងចប់ទឹកទី១ផងក៏ត្រូវបញ្ចប់។ នេះជាលទ្ធផលដែលកម្រកើតឡើង ប៉ុន្តែក៏ត្រូវខាងភាគីថៃបញ្ជាក់ឱ្យដឹងពីមូលហេតុដែលបានកើតឡើងផងដែរ។
ជ័យជម្នះដែលបានលេចឡើងកាលពីថ្ងៃទី២៤ មិថុនានោះ ធ្វើឱ្យម្នាក់ៗមានការចាប់អារម្មណ៍យ៉ាងខ្លាំង ដោយសារតែកីឡាករ សុខ សាវិន មកពីក្លិបអេលីតគុនខ្មែរ អាចប្រើបច្ចេកទេសនាគវ័ធកន្ទុយ ហើយកម្លាំងជើងដែលបានវ័ធទៅ គឺត្រូវចំកញ្ចឹង.កកីឡាករថៃ Pin Ngen ធ្វើឱ្យគេសន្លប់ឈរដល់ថ្នាក់លោកអាជ្ញាកណ្ដាលដល់១០ទៅហើយ នៅតែភ្នែកសឆ្កឹងមិនទាន់ដឹងស្មារតីក្នុងពេលត្រូវជួយសង្គ្រោះនោះ។
រីឯអ្នកស្នេហាវិស័យប្រដាល់សុទ្ធតែដឹងថា កីឡាករថៃ ដែលបានឡើងប្រកួតជាមួយលោកនៅក្នុងថ្ងៃនោះ គឺជាជើងខ្លាំងម្នាក់ដែរ ដោយមានទាំងប្រវត្តិវាយផ្ដួលកីឡាករបរទេសរាប់មិនអស់នោះផង អ៊ីចឹងហើយទើបម្នាក់ៗស្រឡាំងកាំងនៅពេលប៉ះជាមួយកីឡាករកម្ពុជារូបនេះ ស្រាប់តែរងបច្ចេកទេស ហើយត្រូវសន្លប់ឈរតែម្ដងលើរេញក្នុងទឹកទី១ គឺតែប្រមាណជា២នាទីក្រោយប្រកាសអោយវាយគ្នា។
ការប្រកួតគូនេះ ត្រូវគេឃើញបើកឆាកលើរេញយ៉ាងស្វិតស្វាញភ្លាមៗតែម្ដង ហើយអ្វីដែលគេនឹកស្មានមិនដល់ គឺកីឡាករ សុខ សាវិន ស្រាប់តែអាចប្រើស្នៀតនាគវ័ធកន្ទុយ ហើយធ្វើឱ្យត្រូវចំចំណុចសំខាន់របស់កីឡាករជាគូប្រកួត បណ្ដាលឱ្យកីឡាករថៃត្រូវពេញទំហឹង ហើយចំកញ្ចឹង.កឈានដល់ភ្នែកសឆ្កឹងបន្តការប្រកួតលែងកើតតែម្ដង។ ក្រុមអ្នកឱ្យទឹក និងគ្រូពេទ្យជំនាញត្រូវគេឃើញស្ទុះធ្វើចលនាឱ្យកីឡាករថៃ Pin Ngen ក្រោយគេបញ្ឈភ្នែករហូតដល់មួយសន្ទុះធំ ទម្រាំតែកីឡាកររូបនេះគេដឹងស្មារតី ហើយអាចឈរបាន និងអាចដើរចុះពីលើរេញបាន។
ការប្រកួតដែលបានធ្វើឡើងត្រូវបានបញ្ចប់មុនចប់ទឹកទី១ ប៉ុន្តែមិនបានធ្វើឱ្យអ្នកគាំទ្រពោលថា មិនអស់ចិត្តនោះទេ ផ្ទុយទៅវិញ គឺម្នាក់ៗមានតែលាន់សរសើរដែលកីឡាកររូបនេះ ទើបតែមានមុខឡើងរេញអន្តរជាតិលើកទី១ នៅប៉ុស្ដិ៍ SEATV តែអាចបង្កការភ្ញាក់ផ្អើលឱ្យម្នាក់ៗដក់អារម្មណ៍បាន ខណៈដែលខាងពិធីករក៏សរសើរដាក់ក្បាលមេក្រូក្ដែងៗថា សុខ សាវិន ពិតជាមិនធម្មតា ដែលអាចប្រើស្នៀតនាគវ័ធកន្ទុយធ្វើឱ្យកីឡាករថៃសន្លប់បានសម្រេចបែបនេះងាយៗ។
ចំណែកភាគីកីឡាករថៃ បានអះអាងថា បណ្ដាលមកពីការប្រកួតនៅក្នុងទឹកនោះ កីឡាករថៃមិនទាន់បញ្ចេញសមត្ថភាពខ្លាំង និងត្រៀមខ្លួនខ្លាំង ទើបបណ្ដាលឱ្យគេធ្វេសប្រហែស ហើយមិនបានប្រើស្នៀតទប់កម្លាំងវាយលុករបស់កីឡាករកម្ពុជាបានល្អ។ គាប់ជួនជាកីឡាករថៃ នៅក្នុងថ្ងៃនោះជិះឡានផ្លូវឆ្ងាយ ហើយមិនធ្លាប់ឡើងរេញពេលព្រឹកទាំងទើបហូបអាហារថ្មីៗឱ្យមានកម្លាំងផង ទើបត្រូវសន្លប់ ព្រោះតែត្រូវមួយជើងនោះ។
យ៉ាងណាមិញ លោកថៃ អ៊ូ អ្នកដឹកនាំកីឡាករថៃ ឱ្យមកប្រកួតនៅលើសង្វៀនទូរទស្សន៍អាស៊ីអាគ្នេយ៍ បានសរសើរថា កម្លាំងជើង និងបច្ចេកទេសនាគវ័ធកន្ទុយរបស់កីឡាករកម្ពុជាក៏មិនធម្មតាដែរ ទើបធ្វើឱ្យជើងខ្លាំងរបស់ខ្លួនសន្លប់ឈរក្នុងទឹកទី១ ទាំងនឹកស្មានមិនដល់៕
ចែករំលែកព័តមាននេះ