Jack Ma ភ្ញាក់ផ្អើលនឹងចំណេះដឹងខាងបច្ចេកវិទ្យារបស់នាយករដ្ឋមន្ត្រី
ទីក្រុងគូឡាឡាំពួ ៖ មហាសេដ្ឋីចិន លោក Jack Ma ស្ថាបនិកក្រុមហ៊ុន Alibaba កាលពីព្រឹកថ្ងៃទី១៨ មិថុនា…
ទីក្រុងគូឡាឡាំពួ ៖ មហាសេដ្ឋីចិន លោក Jack Ma ស្ថាបនិកក្រុមហ៊ុន Alibaba កាលពីព្រឹកថ្ងៃទី១៨ មិថុនា ម្សិលមិញ បានជួបជាមួយនាយករដ្ឋមន្ត្រីម៉ាឡេស៊ី លោក មហាធា មហាម៉ាត់ (Mahathir Mohamad) នៅឯការិយាល័យរបស់លោក ស្ថិតក្នុងទីក្រុងពូត្រាចាយ៉ា (Putrajaya) ។
លោក ជេក ម៉ា ត្រូវបានទីភ្នាក់ងារសារព័ត៌មានជាតិរបស់ប្រទេសនេះស្រង់សម្ដីថា មានបំណងចង់ជួបលោកមហាធា ចាប់តាំងពីការវិលត្រឡប់របស់លោកជានាយករដ្ឋមន្ត្រី ក្រោយរដ្ឋាភិបាលUMNO ត្រូវបានទម្លាក់នៅក្នុងការបោះឆ្នោតជាប្រវត្តិសាស្ត្រ ។បន្ទាប់ពីជំនួបនេះ លោកម៉ា បានប្រាប់ទីភ្នាក់ងារសារព័ត៌មាន Bernama ថា ៖« ពិតជាភ្ញាក់ផ្អើលនឹងចំណេះដឹងរបស់លោកនាយករដ្ឋមន្ត្រីមហាធា អំពីបច្ចេកវិទ្យា » ។
លោកម៉ា និយាយថា ៖« រយៈពេល១ម៉ោងនៃជំនួបនេះ ពួកយើងបានចែករំលែកនូវគំនិតយ៉ាងច្រើន និងពិភាក្សាធ្វើយ៉ាងណា លើកកម្ពស់ប្រជាពលរដ្ឋម៉ាឡេស៊ីឲ្យចាកផុតពីភាពក្រីក្រ និងគាំទ្រយុវជនវ័យក្មេង ព្រមទាំងអាជីវកម្មខ្នាតតូចឲ្យកាន់តែច្រើនថែមទៀត» ។ លោកថា ៖« វាជាជំនួបដ៏មានអត្ថន័យបំផុត ខណៈដែលលោកបានបើកការិយាល័យក្រុមហ៊ុន Alibaba នៅភាគខាងត្បូងនៃទីក្រុងបង់សា (Bangsar)» ។ លោកនាយករដ្ឋមន្ត្រីមហាធា បានឲ្យដឹងនៅក្នុងបណ្ដាញសង្គម Twitter របស់លោកថា ៖«យើងទាំងពីរបានផ្លាស់ប្ដូរផ្នត់គំនិតជាច្រើនទៅលើប្រធានបទដ៏ទូលំទូលាយមួយ » ។
យោងតាមប្រព័ន្ធផ្សាព្វផ្សាយក្នុងប្រទេសនេះ បានស្រង់សម្ដីលោក ជេក ម៉ា ដោយលើកឡើងថា មហាសេដ្ឋីចិនរូបនេះមានបំណងចង់ជួបលោកនាយករដ្ឋមន្ត្រីមហាធា តាំងពីដើមខែនេះមកម្ល៉េះ ប៉ុន្ដែសំណើជំនួបនេះត្រូវបានពន្យារពេល ដោយសារលោកនាយករដ្ឋមន្ត្រីកំពុងមមាញឹកនឹងការងាររៀបចំរដ្ឋាភិបាលថ្មីរបស់លោក ៕
ចែករំលែកព័តមាននេះ