រាជធានីភ្នំពេញ ៖ វិស័យធានារ៉ាប់រងអាយុ ជីវិត ជាវិស័យថ្មីមួយដែលទើបមានវត្តមានក្នុងប្រទេសកម្ពុជានាឆ្នាំ២០១២ តែវិស័យមួយនេះកំពុងទទួលបានការគាំទ្រពីសំណាក់ប្រជាពលរដ្ឋកម្ពុជា និងទទួលបានកំណើនគួរឲ្យកត់សម្គាល់ ។
ជាក់ស្តែង វិស័យធានារ៉ាប់រងអាយុជីវិត បានរួមចំណែកយ៉ាងខ្លាំងក្នុងការរីកចម្រើននៃវិស័យធានារ៉ាប់រងទូទៅ ជារួម ដោយទទួលបានបុព្វលាភរ៉ាប់រងដុលសរុបចំនួនប្រមាណ៦៧,៥ លានដុល្លារអាមេរិកក្នុងឆ្នាំ២០១៧ ដែលមានការកើនឡើង៥៦% ធៀបនឹងបុព្វលាភរ៉ាប់រងដុលក្នុងរយៈពេលដូចគ្នាក្នុងឆ្នាំ២០១៦ ។ នេះបើយោងតាមសេចក្តីប្រកាសព័ត៌មានរបស់សមាគមធានារ៉ាប់រងកម្ពុជា ចេញផ្សាយនាពេលថ្មីៗនេះ ។
ប្រាកដណាស់ វិស័យធានារ៉ាប់រងអាយុជីវិតដែលមានវត្តមានក្នុងដំណាក់កាលបឋមនាឆ្នាំ២០១២ មិនសូវទទួលបានការគាំទ្រប៉ុន្មាននោះទេ ដោយប្រជាពលរដ្ឋភាគច្រើនយល់ថា នៅពេលនិយាយពីវិស័យធានារ៉ាប់រងអាយុជីវិត គឺជារឿងមិនល្អ ព្រោះវាពាក់ព័ន្ធនឹងហេតុការណ៍អកុសលនានា ឬក៏ពាក់ព័ន្ធនឹងគ្រោះថ្នាក់ចរាចរណ៍ ជាដើម ។
តែយ៉ាងណាមិញ តាមរយៈការជំរុញឲ្យមានការយល់ដឹងជាសាធារណៈពីគុណសម្បត្តិសំខាន់ៗមួយចំនួន ដែលវិស័យធានារ៉ាប់រងអាយុជីវិតនេះបានផ្តល់ឲ្យប្រជាពលរដ្ឋកម្ពុជានោះ បានធ្វើឲ្យវិស័យធានារ៉ាប់រងអាយុជីវិត កើនឡើងជារៀងរាល់ថ្ងៃ ។គុណសម្បត្តិចម្បងមួយចំនួនរួមមាន ៖ (១) ការទទួលបានថវិកាសម្រាប់ដោះស្រាយបញ្ហាទាក់ទិននឹងអាយុជីវិត ឬសុខភាព ដោយមិនចាំបាច់លក់ទ្រព្យសម្បត្តិដោយប្រញាប់ប្រញាល់ក្រោមតម្លៃទីផ្សារ ឬជាប់ជំពាក់បំណុលអ្នកដទៃ ឬធនាគារ ជាដើម ។ (២) ការទទួលបានថវិកាដែលបានបង់សម្រាប់ការធានារ៉ាប់រងនោះត្រឡប់មកវិញ ប្រសិនបើមិនមានហេតុអកុសលកើតឡើង ដូចជាការសន្សំថវិកាផងដែរ ដោយមានការធានាមកជាមួយ ។ ប្រាកដណាស់ ការអភិវឌ្ឍក្របខ័ណ្ឌគតិយុត្តដ៏ល្អក្នុងវិស័យធានារ៉ាប់រងទូទៅ បានដើរតួនាទីយ៉ាងសំខាន់ក្នុងការរីកចម្រើនចំពោះការរីកលូតលាស់នេះនៃវិស័យធានារ៉ាប់រងអាយុជីវិតនៅប្រទេសកម្ពុជា ។
យោងតាមព័ត៌មានរបស់សមាគមធានារ៉ាប់រងកម្ពុជា (IAC) បានឲ្យដឹងថា នាពេលបច្ចុប្បន្ន មានក្រុមហ៊ុនធានារ៉ាប់រងកំពុងធ្វើប្រតិបត្តិការអាជីវកម្មនៅកម្ពុជា កើនឡើងដល់១៣ក្រុមហ៊ុន ក្នុងនោះ ៦ក្រុមហ៊ុនស្ថិតក្នុងវិស័យធានារ៉ាប់រងអាយុជីវិត ដែលជាវិស័យថ្មីទើបកើតមានឡើងក្នុងឆ្នាំ២០១២ ក្នុងនោះគឺមានក្រុមហ៊ុនធានារ៉ាប់រងជីវិត AIA ដែលចូលមកក្នុងទីផ្សារក្រុមហ៊ុនធានារ៉ាប់រងអាយុជីវិតក្រោយគេនៅកម្ពុជា កាលពីពាក់កណ្តាលឆ្នាំមុននេះ ។
ចំណុចពិសេសរបស់ក្រុមហ៊ុនធានារ៉ាប់រងជីវិតAIAបន្ថែមពីលើគុណសម្បត្តិទូទៅខាងលើនោះ គឺការផ្តល់សេវាដំណោះស្រាយធានារ៉ាប់រងបែបថ្មីមួយដំបូងបង្អស់នៅកម្ពុជា ដែលមិនធ្លាប់មានពីមុនមក គឺការធានារ៉ាប់រងសម្រាប់ជំងឺធ្ងន់ធ្ងរ (Insurance for Critical Illness) ធានារ៉ាប់រងលើការព្យាបាលជំងឺធ្ងន់ធ្ងរដល់ប្រជាពលរដ្ឋកម្ពុជា ដែលជាសេវាកម្មសម្រាប់ដំណោះស្រាយការការពារ គឺការពារខ្លួនអ្នក និងការពារការរស់នៅរបស់មនុស្សជាទីស្រឡាញ់របស់អ្នកជាមួយនឹងតម្លៃបុព្វលាភសមរម្យ ។
យោងតាមការផ្សព្វផ្សាយរបស់ក្រុមហ៊ុនធានារ៉ាប់រងជីវិតAIAបានឲ្យដឹងថា អត្ថប្រយោជន៍មួយក្នុងចំណោមអត្ថប្រយោជន៍ជាច្រើនសម្រាប់អតិថិជននៃធានារ៉ាប់រងសម្រាប់ជំងឺធ្ងន់ធ្ងររបស់ខ្លួននោះ គឺការធានារ៉ាប់រងទៅលើការចំណាយក្នុងការព្យាបាលស្ថានភាពជំងឺរហូតដល់១២ប្រភេទនៃជំងឺមហារីក ជំងឺបេះដូង ជំងឺដាច់សរសៃឈាមក្នុងខួរក្បាល ជំងឺថ្លើម និងជំងឺសួតពីដំណាក់កាលដំបូង រហូតដល់ដំណាក់កាលធ្ងន់ធ្ងរ ។ ដោយមានការធានារ៉ាប់រងលើការចំណាយចាប់ផ្តើមព្យាបាលជំងឺដំណាក់កាលដំបូង អ្នកនឹងអាចទទួលបានទឹកប្រាក់អត្ថប្រយោជន៍ ហើយការធានារ៉ាប់រងនោះ រួមបញ្ចូលទាំងសម្រាប់ការព្យាបាលនៅមន្ទីរពេទ្យក្នុងស្រុក និងនៅបរទេស ។
អ្វីដែលអ្នកគួរតែផ្តោតសំខាន់នោះ គឺការមើលថែទាំខ្លួនឲ្យបានឆាប់ជាសះស្បើយ ជាជាងព្រួយបារម្ភអំពីការចំណាយទៅលើការព្យាបាលរបស់អ្នក ។ ដំណោះស្រាយធានារ៉ាប់រងនេះបានធ្វើឡើងដោយផ្អែកលើការសិក្សាស្រាវជ្រាវមួយចំនួនដូចជា របាយការណ៍របស់អង្គការសុខភាពពិភពលោក ដែលបង្ហាញឲ្យឃើញថា ៥២% នៃការស្លាប់របស់ប្រជាពលរដ្ឋខ្មែរជារៀងរាល់ឆ្នាំ គឺបណ្តាលមកពីជំងឺធ្ងន់ធ្ងរខាងលើ។ តួលេខនេះ ច្រើនជាងការស្លាប់ដែលបណ្តាលមកពីគ្រោះថ្នាក់ចរាចរណ៍ និងជំងឺឆ្លងរួមបញ្ចូលគ្នា។ ការស្រាវជ្រាវផ្ទាល់របស់ក្រុមហ៊ុននេះ ក៏បានឲ្យដឹងថា ប្រជាពលរដ្ឋខ្មែរប្រមាណជាង៨០% មានក្តីបារម្ភលើសុខភាពរបស់ខ្លួនជាចម្បង ។
បើទោះបីជាវិស័យធានារ៉ាប់រងជីវិតនៅកម្ពុជាបច្ចុប្បន្ន នៅមានទំហំតូចក៏ពិតមែន តែសន្ទុះនៃការលូតលាស់ និងការអភិវឌ្ឍបន្ថែមដោយផ្អែកលើតម្រូវការរបស់ប្រជាពលរដ្ឋខ្មែរអាចនឹងជំរុញឲ្យវិស័យនេះរីកធំធាត់ និងមានភាពចាស់ទុំក្នុងរយៈពេលយ៉ាងខ្លីខាងមុខ ៕
ចែករំលែកព័តមាននេះ