រាជធានីភ្នំពេញ ៖ កម្លាំងសមត្ថកិច្ចនគរបាលនាយដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ ដោយមានការសហការជាមួយមន្ត្រីជំនាញនាយកដ្ឋានកាំកុងត្រូលនៃក្រសួងពាណិជ្ជកម្ម កាលពីព្រឹកថ្ងៃទី១៥ មិថុនា ២០១៨ បានចុះទៅពិនិត្យទីតាំងឆាបាយក្ដាំងពិសេស ចំនួន៣ កន្លែង គ្មានច្បាប់អនុញាតិ និងគ្មានអនាម័យ ។
លោកឧត្តមសេនីយ៍ទោ ឡុង ស្រេង អនុប្រធាននាយកដ្ឋានប្រឆាំងបទល្មើសសេដ្ឋកិច្ចបានឲ្យដឹងថា ដោយបានការអនុញ្ញាតពីលោកឧត្តមសេនីយ៍ឯកចាន់ វ៉ាន់ធឿនប្រធាននាយកដ្ឋានឲ្យលោកដឹកនាំកម្លាំងសហការចុះទៅពិនិត្យទីតាំងឆាបាយក្ដាំងដាក់នៅលើដីគ្មានគ្រប ហើយត្រូវបានសត្វឆ្កែ៥ទៅ៦ក្បាលរត់ចុះរត់ឡើងកាត់លើបាយក្តាំងនោះក្នុងពេលយប់រួមទាំងត្រូវសត្វកណ្ដុរបានធ្វើសមយុទ្ធ និងមានកម្មករខ្លះបានយកខោអាវហាលពីលើនោះទៀត ។
លោកឡុង ស្រេងបន្តថា ទីតាំងធ្វើ ឬឆាបាយក្តាំងពិសេសនោះមិនត្រូវបានគេផលិតបាយក្តាំងនៅទីនោះទេ គឺគ្រាន់តែជាកន្លែងទទួលទិញបាយក្តាំងមកពីខាងក្រៅ ហើយយកប្រេងដែលជាកាកសំណល់មកបំពង នៅដីឡូត៍គ្មានលេខ ផ្លូវបេតុង សង្កាត់ច្បារអំពៅ២ រាជធានីភ្នំពេញ ។
លោកឡុង ស្រេងបន្តទៀតថា ក្រោយពេលសមត្ថកិច្ចចម្រុះបានចុះទៅពិនិត្យទីតាំងនោះសមត្ថកិច្ចសម្រេចឲ្យផ្អាកអាជីវកម្មនោះជាបណ្ដោះអាសន្ន ដើម្បីរង់ចាំធ្វើច្បាប់ និងរៀបចំកន្លែងឲ្យមានសោភ័ណ្ឌភាព និងមានអនាម័យត្រឹមត្រូវទើបអនុញ្ញាត្ដិឲ្យដំណើរការឡើងវិញ ។
សូមបញ្ជាក់ផងដែរថា ក្នុងនោះមន្ដ្រីជំនាញបានធ្វើការដកហូតយកទៅមន្ទីរពិសោធន៍ ដើម្បីពិនិត្យរកមើលកម្រិតមេរោគ និងសារធាតុគីមីហាមឃាត់ដាក់លើចំណីអាហារនោះ ។ នេះចាត់ទុកជាសារមួយសម្រាប់អ្នកនិយមទទួលទានបាយក្តាំង ពិសេសសម្រាប់ប្រជាពលរដ្ឋបានយល់ដឹងពីអនាម័យចំពោះអ្នកធ្វើបាយក្តាំងពិសេសនោះ ដើម្បីរក្សាការពារសុខមាលភាពលើអ្នកចូលចិត្តបាយក្តាំង ៕
ចែករំលែកព័តមាននេះ