ប្រភពព័ត៌មានយោធារាយការណ៍កាលពីថ្ងៃទី២៧ កុម្ភៈថា ក្រោយ បាញ់បង្ហោះកាំជ្រួចមួយ និងការសាកល្បងនុយក្លេអ៊ែរនាពេល ថ្មីៗនេះសមយុទ្ធយោធារដូវរងារបស់កូរ៉េខាងជើងត្រូវបាន បង្កើនជាមួយសមយុទ្ធកាំភ្លើងធំឆ្ពោះដោយផ្ទាល់ទៅរកក្រុង សេអ៊ូល ។
ការវិភាគមួយលើការហ្វឹកហ្វឺនកងទ័ពនារដូវរងា របស់កូរ៉េខាងជើងបង្ហាញថា សមយុទ្ធបាញ់គ្រាប់ពិតខាងកាំភ្លើងធំ និងសមយុទ្ធដាក់ទ័ពតាមយន្តហោះមានការកើនឡើងបើប្រៀបធៀបកាលពីពេលមុន ។ រយៈពេល២ខែចុងក្រោយនេះកងទ័ពកូរ៉េខាងជើងបានធ្វើសមយុទ្ធដាក់ទ័ពតាមយន្តហោះជាច្រើនលើកដោយប្រើប្រាស់ទាំងយន្តហោះប្រយុទ្ធទាំងយន្តហោះដឹកជញ្ជូនហើយធ្វើការហ្វឹកហ្វឺនដល់កងកម្លាំងពិសេស ។
សមយុទ្ធកាំភ្លើងធំរបស់កូរ៉េខាងជើងធ្វើត្រាប់ដូចការវាយប្រហារលើរដ្ឋធានីកូរ៉េខាងត្បូងជាមួយគ្រាប់ផ្លោងដាក់ប៉េតុងជំនួសគ្រាប់ពិត ។ សមយុទ្ធទាំងនេះធ្វើឡើងខណៈក្រុងព្យុងយ៉ាងរងការរិះគន់យ៉ាងខ្លាំងពីសំណាក់សហគមន៍អន្តរជាតិ ក្រោយការសាកល្បងនុយក្លេអ៊ែរលើកទី៣ ។
កាលពីថ្ងៃទី២៦ កុម្ភៈ កន្លងមកនេះម៉ាស៊ីនឃោសនាផ្លូវការកូរ៉េខាងជើងគូសបញ្ជាក់ថា មេដឹកនាំរបស់ខ្លួនលោកគីមជុងអ៊ុន បានទៅពិនិត្យមើលសមយុទ្ធបាញ់កាំភ្លើងធំគ្រាប់ពិតធ្វើត្រាប់ដូចសង្គ្រាមពិតប្រាកដមួយ ដោយគូសបញ្ជាក់ថា កងកាំភ្លើងធំទាំងនោះត្រៀមជានិច្ចបាញ់ប្រហារសត្រូវដោយមិនត្រាប្រណី ។ក៏មានសេចក្តីរាយការណ៍ផងដែរពីការបង្ហាញយន្តហោះ និងសមយុទ្ធឆត្រយោងដោយប្រើយន្តហោះធុនស្រាលAN-2 មានល្បឿនខ្ពស់បំផុត២៥០គីឡូម៉ែត្រក្នុងមួយម៉ោងហើយអាចដឹកកងកុំម៉ង់ដូបាន១៣នាក់ ។
យោងតាមសៀវភៅសខាងកិច្ចការពាររបស់ក្រុងសេអ៊ូលចេញផ្សាយកាលពីខែធ្នូកន្លងមកនេះថា ក្រុងព្យុងយ៉ាងអាចដាក់ពង្រាយយន្តហោះធុនAN-2 ចំនួនប្រមាណជា៣០គ្រឿង និងសមាជិកកងកម្លាំងពិសេស២០០.០០០នាក់ដែលទទួលការហ្វឹកហាត់សម្រាប់ធ្វើប្រតិបត្តិការទាំងឡាយដូចជាវាយប្រហារបណ្តាគោលដៅសំខាន់ៗធ្វើឃាតបណ្តាឥស្សរជនគន្លឹះ និងធ្វើសកម្មភាពបំផ្លាញក្នុងមូលដ្ឋានខាងក្រោយរបស់កូរ៉េខាងត្បូង ៕
ចែករំលែកព័តមាននេះ