បុគ្គលដែលមានសេចក្តីប្រាថ្នា ដើម្បីសម្អាតចិត្តឱ្យបានបរិសុទ្ធផូរផង់ល្អ ប្រាសចាកអកុសលផ្សេងៗ នឹងបានធ្វើចិត្តនឹង ស្ងប់ ងាយស្រួលក្នុងការឃុំគ្រង ត្រូវធ្វើសមាធិដើម្បីអប់រំចិត្ត ។
ការធ្វើសមាធិដំបូងយើងត្រូវស្វែងរកទីសេនាសនៈសមគួរ គឺស្ងប់ស្ងាត់ល្អដើម្បីងាយស្រួលក្នុងការពិចារណា ។ យោគាវចរ គប្បីអង្គុយផ្គត់ភ្នែនឱ្យមាំល្អ ព្រោះការអង្គុយផ្គត់ភ្នែននេះ ជាឥរិយាបថនាំមកនូវភាពងាយស្រួលក្នុងការប្រព្រឹត្តិចុះឡើងនៃខ្យល់ដកដង្ហើមចេញចូលផង ជាឧបាយនៃកិរិយាកាន់យកដោយជុំវិញនូវអារម្មណ៍ផង។ ការអង្គុយតាមទម្លាប់ជើងស្តាំដាក់លើជើងឆ្វេងដៃស្តាំដាក់លើដៃឆ្វេងយកម្រាមមេដៃទល់គ្នា ដងខ្លួនឱ្យត្រង់ល្អ ការតាំងកាយឱ្យត្រង់នាំឱ្យស្បែកសាច់ សរសៃមិនទ្រោមចុះ វេទនាមិនចុកចាប់ ហើយស្បែក សាច់ សរសៃមិនទ្រោមចុះសង្កត់គ្នាជាដើម ។
កាលបើវេទនាមានសភាពបែបនេះហើយ ចិត្តក៏មានអារម្មណ៍មូលល្អ កម្មដ្ឋានមិនធ្លាក់ចុះ ក៏ចូលដល់សេចក្តីចម្រើនដ៏ទូលំទូលាយល្អ ។ បន្ទាប់មកត្រូវតម្កល់សមាធិ គឺស្មារតីឱ្យមានមុខឆ្ពោះទៅរកអានាបានុស្សតិកម្មដ្ឋាន ដែលខ្លួនត្រូវចម្រើនតទៅ ។ ត្រង់វិធីនេះជាកិច្ចសំខាន់បំផុត ព្រោះអ្នកចម្រើនកម្មដ្ឋាន បើមានចិត្តរាយមាយអណ្តែតអណ្តូងនោះក៏ធ្វើមិនកើតដែរ ដូចនេះមុននឹងប្រារព្ធដើម្បីនឹករកខ្យល់ដកដង្ហើមចេញ និងខ្យល់ដកដង្ហើមចូលគួរប្រមូលចិត្តឱ្យមូលដកចេញអំពីអារម្មណ៍ផ្សេងៗ ហើយតម្កល់ស្មារតីឱ្យរឹងមាំល្អ ។
កាលបើប្រមូលចិត្តមូលក្នុងទ្រូងល្អហើយ យោគាវចរត្រូវមានស្មារតីរលឹកនូវខ្យល់ដកដង្ហើមចេញ និងខ្យល់ដកដង្ហើមចូលតែម្យា៉ងប៉ុណ្ណោះ ក្នុងន័យនេះសូមយល់ចុះថា អារម្មណ៍តែមួយ ចិត្តតែមួយដែលកំពុងប្រាកដក្នុងវេលានេះ គឺខ្យល់ដកដង្ហើមចេញ និងខ្យល់ដកដង្ហើមចូលតែម៉្យាង ។
អ្នកធ្វើសមាធិ គប្បីជាអ្នកមានចិត្តស្ថិតនៅខាងក្នុងទ្រូងតាំងនៅមាំស៊ប់ហើយអកុសលធម៌មិនអាចមកគ្រប់គ្រងសង្កត់ចិត្តបាន ឡើយ ។ កាលបើចិត្តតាំងនៅល្អយ៉ាងនេះហើយ គប្បីបញ្ជូនស្មារតីរលឹកតាមដានខ្យល់ដកដង្ហើមចេញ និងខ្យល់ដកដង្ហើមចូលតែម៉្យាង ។
ចែករំលែកព័តមាននេះ