រាជធានីភ្នំពេញ ៖ មន្ត្រីជាន់ខ្ពស់គណៈកម្មាធិការជាតិអូឡាំពិកកម្ពុជា (NOCC) បានថ្លែងនៅក្នុងឱកាសធ្វើសន្និសីទសារព័ត៌មានស្ដីពីព្រឹត្តិការណ៍រត់ភ្នំពេញពាក់កណ្ដាលម៉ារ៉ាតុងអន្តរជាតិនៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីព្រឹកថ្ងៃទី១២ មិថុនា ថា រហូតមកទល់ពេលនេះមានអ្នកមកចុះឈ្មោះរត់ទាំងខ្មែរ និងបរទេសជិត៤ពាន់នាក់ហើយ…
រាជធានីភ្នំពេញ ៖ មន្ត្រីជាន់ខ្ពស់គណៈកម្មាធិការជាតិអូឡាំពិកកម្ពុជា (NOCC) បានថ្លែងនៅក្នុងឱកាសធ្វើសន្និសីទសារព័ត៌មានស្ដីពីព្រឹត្តិការណ៍រត់ភ្នំពេញពាក់កណ្ដាលម៉ារ៉ាតុងអន្តរជាតិនៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីព្រឹកថ្ងៃទី១២ មិថុនា ថា រហូតមកទល់ពេលនេះមានអ្នកមកចុះឈ្មោះរត់ទាំងខ្មែរ និងបរទេសជិត៤ពាន់នាក់ហើយ ខណៈកម្មវិធីរត់ជាផ្លូវការនឹងត្រូវធ្វើឡើងនៅថ្ងៃអាទិត្យទី១៧ មិថុនា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាឱ្យដឹងបន្ថែមថា
កម្មវិធីរត់ភ្នំពេញពាក់កណ្ដាលម៉ារ៉ាតុងអន្តរជាតិលើកទី៨នេះធ្វើឡើងដើម្បីអបអរពិធីបុណ្យចម្រើនព្រះជន្មសម្ដេចព្រះមហាក្សត្រីនរោត្តមមុនិនាថ សីហនុ ក៏ដូចជាបំផុសឱ្យមានការចូលរួមថែរក្សាបរិស្ថានបៃតងឱ្យមានការទាក់ទាញចំពោះទីតាំងសំខាន់ៗនៅក្នុងរាជធានីភ្នំពេញរបស់យើង ។ មិនតែប៉ុណ្ណោះ ព្រឹត្តិការណ៍នេះនឹងក្លាយទៅជាព្រឹត្តិការណ៍ប្រវត្តិសាស្ត្រសម្រាប់រាជធានីភ្នំពេញរបស់យើងផងដែរ ។ លោកសង្ឃឹមថា កម្មវិធីនេះពីមួយឆ្នាំទៅមួយឆ្នាំនឹងមានអ្នកចូលរួមគាំទ្រកាន់តែច្រើនឡើង ។ កម្មវិធីរត់នេះត្រូវចេញដំណើរពីខាងមុខព្រះបរមរាជវាំងឆ្លងកាត់ផ្លូវសំខាន់ៗនៅក្នុងរាជធានីភ្នំពេញ ប៉ុន្តែឆ្នាំនេះមិនបានរត់ឆ្លងកាត់ផ្លូវនៅត្រើយខាងកើតដូចបណ្ដាឆ្នាំមុនៗនោះទេ ដោយសារតែស្ពានមិត្តភាពកម្ពុជាជប៉ុនកំពុងតែធ្វើការជួសជុល ។
ដោយឡែកចំពោះវិញ្ញាសាដែលត្រូវរត់ និងតម្លៃសំបុត្រចូលរួមមានដូចខាងក្រោម៖ រត់ចម្ងាយ២១គីឡូម៉ែត្រសម្រាប់ជនបរទេស៤០ដុល្លារ ជនជាតិខ្មែរ១៥ដុល្លារ ។ រត់ចម្ងាយ១០គីឡូម៉ែត្រសម្រាប់ជនបរទេស៣០ដុល្លារ ជនជាតិខ្មែរ១០ដុល្លារ និងរត់ចម្ងាយ៣គីឡូម៉ែត្រសម្រាប់ជនបរទេស១០ដុល្លារ ជនជាតិខ្មែរ៥ដុល្លារ ។ ទីកន្លែងលក់សំបុត្រស្ថិតនៅខាងជើងព្រះបរមរាជវាំង។ លោកបញ្ជាក់ថា ឆ្នាំមុនមានអ្នកចូលរួមរត់ជិត៤ពាន់ប៉ុន្តែឆ្នាំនេះយោងតាមរបាយការណ៍ត្រួសៗសម្រាប់វិញ្ញាសារត់ចម្ងាយ២១គីឡូម៉ែត្រជនបរទេសមានជាង២០០នាក់ ជនជាតិខ្មែរជាង១០០នាក់, រត់ចម្ងាយ១០គីឡូម៉ែត្រជនបរទេសមានចំនួនជិត៣០០នាក់ ជនជាតិខ្មែរជាង១ពាន់នាក់ និងរត់ចម្ងាយ៣គីឡូម៉ែត្រ ជនបរទេសជាង៥០នាក់ ជនជាតិខ្មែរជាង២ពាន់នាក់ ។ ចំពោះជនបរទេសដែលបានមកចូលរួមរត់លើកនេះ គឺមកពី៣៦ប្រទេសក្នុងនោះជនជាតិជប៉ុនមានចំនួនច្រើនជាងគេ បន្ទាប់មកចិន និងបារាំង។
ជាការកត់សម្គាល់រហូតមកទល់ពេលនេះ ជនជាតិខ្មែរយើងចូលរួមរត់ចម្ងាយ១០គីឡូម៉ែត្រកាន់តែច្រើនជាងឆ្នាំមុនៗ ដោយសារពួកគាត់កាន់តែមានការយល់ដឹងពីបញ្ហាសុខភាពកាន់តែច្រើន ។ ជាមួយគ្នានេះ ជប៉ុនបានទាមទារឱ្យយើងរៀបចំកម្មវិធីរត់ម៉ារ៉ាតុងពេញ៤១គីឡូម៉ែត្រនៅពេលក្រោយៗទៀត ប៉ុន្តែកិច្ចសហការរវាងគណៈកម្មាធិការជាតិអូឡាំពិកកម្ពុជានិងភាគីជប៉ុននៅមិនទាន់មានការឯកភាពគ្នានៅឡើយ ។ ទោះបីជាយ៉ាងណា កម្ពុជាយើងនឹងខិតខំធ្វើឱ្យបានដើម្បីឱ្យក្លាយជាព្រឹត្តិការណ៍ប្រវត្តិសាស្ត្រដូចនៅប្រទេសគេដែរ ដូចជាតូក្យូម៉ារ៉ាតុង ញូវយ៉កម៉ារ៉ាតុង និងប៉ារីសម៉ារ៉ាតុងជាដើម ។ បើសិនជាមានកិច្ចសហប្រតិបត្តិការល្អនៅឆ្នាំក្រោយយើងសង្ឃឹមថានឹងធ្វើឱ្យបានសម្រេច។ តាមការឱ្យដឹងបន្ថែម ជនជាតិជប៉ុនចូលចិត្តរត់ណាស់ ពោលគឺ១០០នាក់គឺមាន៥០នាក់ហើយទើបជនជាតិមួយនេះមានសុខភាពល្អ កម្លាំងមាំមួនអាយុយ៉ឺនយូរ។
តាមប្រសាសន៍របស់លោកបណ្ឌិតថោង ខុន ប្រធានគណៈកម្មាធិការជាតិអូឡាំពិកកម្ពុជាឱ្យដឹងថា ព្រឹត្តិការណ៍រត់ភ្នំពេញពាក់កណ្ដាលម៉ារ៉ាតុងអន្តរជាតិ នឹងធ្វើឡើងជារៀងរាល់ឆ្នាំរហូតដល់ស៊ីហ្គេមឆ្នាំ២០២៣ ។ ការធ្វើបែបនេះដើម្បីប្រែក្លាយទីក្រុងភ្នំពេញឱ្យក្លាយជាទីក្រុងបៃតង ស្រស់ស្អាត និងធ្វើឱ្យប្រជាជនយើងមានទម្លាប់ល្អក្នុងការចូលរួមថែរក្សាបរិស្ថានទាំងអស់គ្នា៕
ចែករំលែកព័តមាននេះ