ខេត្តត្បូងឃ្មុំ ៖ អ្នកបម្រើការនៅហាងខារ៉ាអូខេ«វិមានទ្រព្យ»២នាក់ ស្ថិតនៅភូមិម៉ាស៊ីនទឹក ឃុំមេមត់
ស្រុកមេមត់២នាក់ បានយកលុយចំនួន៥ពាន់រៀលដែលភ្ញៀវឱ្យ ទៅទិញតែOISHIចំនួន២ដប យកមក
ផឹក ស្រាប់តែមានសំណាងល្អ បើកគម្របដបក៏ត្រូវបានរង្វាន់ធំរថយន្តFORDមួយគ្រឿង ។ ពេលនោះ ក៏បានយកទៅផ្ញើទុកនៅថៅកែខ្លួន ព្រោះតែខ្លាចបាត់ ។ ក្រោយមកស្រាប់តែល្បីថា ថៅកែបានស៊ីដាច់និងបានបង្ហោះឡើងកក្រើកហ្វេសបុក រហូតដល់លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត ឱ្យសមត្ថកិកច្ចនៅមូលដ្ឋាន បើកការស៊ើបអង្កេតជាបន្ទាន់ កាលពីព្រឹកថ្ងៃទី១២ មិថុនា នេះ ។
បើតាមលោកអនុសេនីយ៍ឯក ចាន់ ឌុល អធិការរងនគរបាលស្រុកមេមត់ទទួលផែនព្រហ្មទណ្ឌបានប្រាប់ដែរថា កាលពីយប់ថ្ងៃទី២៦ ឧសភា ២០១៨ កន្លងមក ភ្ញៀវមួយក្រុមបានចូលមកច្រៀងនៅហាងខារ៉ាអូខេ «វិមានទ្រព្យ» លុះពេលដែលគិតលុយសល់ចំនួន៥.០០០រៀលក៏ឱ្យមកអ្នកបម្រើ២នាក់ ក្នុងនោះ ១-ឈ្មោះ ហែម និមល ភេទប្រុស អាយុ២៥ឆ្នាំ និង២-ឈ្មោះ សែម កាណាន់ ហៅតាន់ ភេទប្រុស អាយុ២៦ឆ្នាំ ។ ក្នុងចន្លោះម៉ោង១ទៅ២រំលងអធ្រាត្រថ្ងៃដដែលនោះ ទាំ២នាក់នាំគ្នាទៅទិញតែ OISHI ចំនួន២ដប លុះពេលដែលបើកគំរបផឹកនោះ ស្រាប់តែឈ្មោះតាន់ ដែលពិការជើងខាងស្តាំ (ស្វិតពីកំណើត) ត្រូវរង្វាន់រថយន្តម៉ាក FORDមួយគ្រឿង ដោយមានសេចក្តីត្រេកអរជាខ្លាំងនិងបានសន្យាចែកគ្នាពាក់កណ្តាលទៀតផង ។
អធិការរងនគរបាលស្រុកមេមត់បន្តថា លុះដល់ព្រឹកឡើង ឈ្មោះតាន់ បានយកគម្របដបដែលត្រូវរង្វាន់នេះ ឱ្យថៅកែឈ្មោះម៉ៅ ជួយរក្សាទុកចៀសវាងខ្លាច់បាត់ ។ ក្រោយមក ស្រាប់តែឈ្មោះនិមល និងប្រពន្ធ ព្រមទាំងប្អូនថ្លៃ បានទៅទិញយកគម្របពីថៅកែមកវិញ តែមិនត្រូវបានថៅកែឱ្យនោះទេ ។ លុះពេលដែលឈ្មោះតាន់ ដឹងទាន់ ពេលប្រាប់ថៅកែ ក៏មិនត្រូវផ្តល់ឱ្យឈ្មោះតាន់នោះទេ ព្រោះបើឱ្យទៅអាចនឹងយកទៅបាត់ ហើយរូបគេ(តាន់ ) ជាអ្នកបើកត្រូវរង្វាន់មិនបានទៅវិញ ។ បន្ទាប់មក ស្រាប់តែឈ្មោះនិមល បានបង្ហោះតាមហ្វេសបុក ដើម្បីសុំអន្តរាគមន៍ពីសម្តេចតេជោ និងសម្តេចកិត្តិព្រឹទ្ធបណ្ឌិត ដោយសម្អាងថា ថៅកែស៊ីដាច់ ។
ដោយទទួលបញ្ជាពីលោកឧត្តមសេនីយ៍ទោ បែន រ័ត្ន ស្នងការនគរបាលខេត្តឱ្យកម្លាំងខេត្ត ចុះមកស្រាវជ្រាវជាមួយនឹងនគរបាលស្រុកមេមត់ ហើយនៅព្រឹកថ្ងៃទី១២ មិថុនា នេះ សមត្ថកិច្ចបានហៅភាគីទាំងសងខាងមកសួរនាំនៅអធិការដ្ឋាននគរបាលស្រុកមេមត់ ។ ចំពោះថៅកែឈ្មោះ ម៉ៅ បានយកគម្របដបនោះមកប្រគល់ឱ្យសមត្ថកិច្ចរក្សាទុក ដោយប្រាប់ថាគាត់មិនមានចេតនាចង់ស៊ីដាច់អ្វីនោះទេ ហើយថៅកែនោះ ក៏បានដកខ្លួនចេញបាត់ហើយ ។
លោកវរសេនីយ៍ឯក ហុង គឹមហឿន អធិការនគរបាលស្រុកមេមត់បានឱ្យដឹងដែរថា ក្នុងពេលដែលហៅឈ្មោះនិមល និងឈ្មោះកាណាន់ (ហៅតាន់) មកសួរនាំនៅអធិការដ្ឋានមេមត់ លុះពេលដែលមានការសួរនាំពិតជជីកដល់ឬសគល់ ត្រូវបានឈ្មោះនិមលឆ្លើយថា ឈ្មោះកាណាន់ ហៅតាន់ ដែលជាអ្នកបើកគម្របដបផឹកត្រូវរង្វាន់រថយន្ត ។ តែទោះបីជាយ៉ាងណា ទាំង២នាក់ហាក់នៅតែប្រកែកធ្វើជាម្ចាស់រៀងៗខ្លួន ។ ជាមួយគ្នានោះដែរ លោកស្នងការនគរបាលខេត្ត ក៏ឱ្យរក្សាគម្របដបត្រូវរង្វាន់ទុកនៅនឹងអធិការដ្ឋាននគរបាលស្រុកមេមត់ជាបណ្តោះអាសន្នសិន ដើ់ម្បីរកភាពយុត្តិធម៌ជូន ។
ចែករំលែកព័តមាននេះ