បុគ្គលមិនប្រមាទ មិនឱ្យពេលវេលាកន្លងទៅទទេៗដោយការព្យាយាមក្រវើនក្រតើនខ្នះខ្នែងប្រឹងប្រែងក្នុងវិធានការ គឺរៀបចំចាត់ចែងកិច្ចការងារទាំងឡាយដោយខ្វល់ខ្វាយស្រវាស្រទេញមិនខ្ជិលច្រអូស មិនធ្វេសប្រហែស ព្រងើយកន្តើយក្នុងកិច្ចការ ដែលគួរធ្វើ គួរចាត់ចែងយ៉ាងណា មានប្រាជ្ញាឆ្លៀវឆ្លាតរៀងវៃដឹងជាក់ច្បាស់ថា រឿងនេះគួរចាត់ការយ៉ាងនេះ ធ្វើយ៉ាងនេះទើបបានសុខ បានសម្រេចផលល្អ បានចម្រើនយូរអង្វែង។ រឿងនោះមិនគួរធ្វើ មិនគួរចាត់ចែង ព្រោះនាំឱ្យក្តៅក្រហាយ នាំឱ្យវិនាសដល់ខ្លួ ន និងអ្នកដទៃ ហើយក៏ចាត់ការធ្វើតែការងារណាដែលល្អ ដែលនាំឱ្យកើតប្រយោជន៍ ។
អ្នកដែលបរិបូរណ៍ដោយគុណសម្បត្តិទាំងនេះ ជាអ្នកស្ថិតនៅក្នុងរង្វង់នៃសេចក្តីមិនប្រមាទ អាចនាំសេចក្តីសុខចម្រើន និងប្រយោជន៍សាធារណបានដោយប្រពៃ។ សមដូចពុទ្ធភាសិតមួយឃ្លាត្រាស់ថា អប្បមាទោ ច ធម្មេសុ ឯតម្មង្គមុត្តមំ ប្រែថា សេចក្តីមិនប្រមាទក្នុងធម៌ទាំងឡាយជាមង្គលដ៏ឧត្តម ។
ការមិនប្រមាទគឺមិនធ្វេសប្រហែសក្នុងកុសលធម៌ទាំងអស់ អប្បមាទោ អមតំ បនំ សេចក្តីមិនប្រមាទនេះជាឧបាយនាំខ្លួនទៅកាន់ព្រះនិព្វានដែលមិនមានសេចក្តីស្លាប់ទៀតឡើយ អ្នកដែលមិនប្រមាទ គឺអ្នកដែលមិនស្លាប់ស្មារតី ស្មារតីនៅរស់រវើកជានិច្ច ទាំងយប់ទាំងថ្ងៃឥតរលត់ឡើយ ។ រមែងមានសតិដាស់តឿនចិត្តឱ្យរឭកដល់កងការកុសល ដែលខ្លួនបានធ្វើមកហើយរឿយៗផង កុសលឯណាដែលខ្លួនមិនធ្លាប់ធ្វើ សតិដាស់តឿនចិត្តឱ្យប្រញាប់ប្រញាល់ធ្វើឡើង កុំបង្អែបង្អង់ទុកថា ចំថ្ងៃនេះ ថ្ងៃនោះ ខែនេះ ខែនោះ ឆ្នាំនេះ ឆ្នាំនោះទើបធ្វើ ព្រោះនៅក្រ ឬនៅក្មេងជាដើម ហៅថា មិនប្រមាទ ។
បុគ្គលដែលត្រេកអរពេញចិត្តស៊ប់ក្នុងសេចក្តីមិនប្រមាទ ប្រព្រឹត្តធ្វើនូវកិច្ចការទាំងពួងមានសមណធម៌ជាដើមដោយសេចក្តីមិនប្រមាទសព្វៗកាល មិនឱ្យពេលវេលាកន្លងហួសទៅទទេៗ ដោយសេចក្តីប្រមាទធ្វេសប្រហែស ឬថាជាអ្នកឃើញភ័យក្នុងសេចក្តីប្រមាទ សេចក្តីប្រមាទជាមូលហេតុនាំសត្វឱ្យកើតក្នុងអបាយភូមិទាំងឡាយមាននរកជាដើម បុគ្គលនោះមិនអាចសាបសូន្យចាកមគ្គ និងផលទាំងឡាយបានឡើយមានគតិទៅកាន់សុគតិភាពជាទីអស់ទៅនៃសេចក្តីទុក្ខទាំងពួងដោយសេចក្តីមិនប្រមាទ ។
ចែករំលែកព័តមាននេះ