រាជធានីភ្នំពេញ ៖ ព្រឹត្តិការណ៍កីឡាជាតិលើកទី២ ដែលទើបបញ្ចប់ការប្រកួតជាផ្លូវការនាពេលថ្មីៗកន្លងទៅនេះបានបង្ហាញឱ្យឃើញថា វិស័យកីឡាជាតិកំពុងកក្រើកក្នុងសង្គមក្រោយពីមើលឃើញការអភិវឌ្ឍក្រុមចូលរួមពីអត់មេដាយមកទទួលបានមេដាយ ។
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ថ្លែងបែបនេះនៅក្រោយបញ្ចប់ពិធីបិទការប្រកួតកីឡាជាតិលើកទី២ នៅពហុកីឡដ្ឋានជាតិក្រោមអធិបតីភាពសម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ។
លោក វ៉ាត់ ចំរើន បន្តថា ក្រោយការប្រកួតយ៉ាងស្វិតស្វាញទៅតាមប្រភេទកីឡានីមួយៗ យើងសង្កេតឃើញថា ខេត្តខ្លះដែលពុំទទួលបានមេដាយទាល់តែសោះកាលពីកីឡាជាតិលើកទី១ឆ្នាំ២០១៦នោះ ដូចជាខេត្តត្បូងឃ្មុំជាដើម បានវិវឌ្ឍខ្លួនរកបានមេដាយមាសលើសការរំពឹងទុករហូតដល់ទៅ៦គ្រឿងនៅក្នុងព្រឹត្តិការណ៍កីឡាជាតិលើកទី២នេះ ។ នេះសបញ្ជាក់ឲ្យឃើញថា វិស័យកីឡាជាតិកំពុងតែកក្រើកក្នុងសង្គម ។ ជាមួយគ្នានេះលោកបញ្ជាក់ថា ការមានមេដាយ និងអត់មេដាយទាល់តែសោះនៅក្នុងព្រឹត្តិការណ៍កីឡាជាតិលើកទី២នេះ គឺជាការដាសតឿនរំលឹកដល់ខេត្តដែលជាសាមីខ្លួនឲ្យខិតខំពង្រឹងសក្តានុពលកីឡានៅក្នុងខេត្តឲ្យកាន់តែខ្លាំងក្លា ពិសេសគឺប្រភេទកីឡាជំនាញ ស្វែងរកសិទ្ធិផលល្អប្រសើរនៅក្នុងព្រឹត្តិការណ៍កីឡាជាតិលើកទី៣នៅឆ្នាំ២០២០ ដើម្បីទាមទារកេរ្តិ៍ឈ្មោះជូនខេត្ត ។
លោក វ៉ាត់ ចំរើន បានវាយតម្លៃថា កីឡាករ-កីឡាការិនីមកពីបណ្តាខេត្តដែលចូលរួមប្រកួតនៅក្នុងព្រឹត្តិការណ៍កីឡាជាតិលើកទី២ ជួបបញ្ហាប្រឈមច្រើនពាក់ព័ន្ធទៅនឹងគុណភាពកម្លាំងកាយបើប្រៀបធៀបទៅនឹងកីឡាករ-កីឡាការិនីនៅរាជធានីភ្នំពេញ ពោលបញ្ហានេះមកពីកត្តាពួកគេជាអ្នកហ្វឹកហាត់ដោយស្ម័គ្រចិត្តទើបមិនមានពេលវេលាហ្វឹកហាត់គ្រប់គ្រាន់ ។ តាមរយៈការវាស់ស្ទង់កីឡាជាតិលើកទី២នេះ វាជាចំណុចសំខាន់មួយដែលក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកម្ពុជា បានរកឃើញនូវចំណុចខ្វះខាតដើម្បីប្រែក្លាយអភិវឌ្ឍន៍ចំណុចខ្វះខាតទាំងនោះឆ្ពោះទៅរកគុណភាពនៅស៊ីហ្គេមឆ្នាំ២០២៣ ដែលកម្ពុជាធ្វើម្ចាស់ផ្ទះ ។ ជាមួយគ្នានេះដែរ ខេត្តដែលមិនបានមេដាយទាល់តែសោះក្នុងព្រឹត្តិការណ៍កីឡាជាតិលើកទី២នេះ ដូចជាខេត្តប៉ៃលិន គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា នឹងជំរុញបន្ថែមលើការបណ្តុះបណ្តាលប្រភេទកីឡាជំនាញដែលជាកីឡាសក្តានុពលនៅក្នុងខេត្តដូចជាបាល់ទះ និងបាល់ទះលើឆ្នេរខ្សាច់ជាដើម ។
គួរបញ្ជាក់ថា ព្រឹត្តិការណ៍កីឡាជាតិលើកទី២មាន២៧ប្រភេទកីឡាស្មើនឹង២៧១វិញ្ញាសា ក្នុងនោះមានអត្តពលិកចូលរួមប្រមាណជាង៤០០០នាក់មកពី២៥រាជធានី-ខេត្ត និង៣ក្រសួងមានក្រសួងការពារជាតិ ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ។
រីឯអង្គភាពកីឡាដែលដណ្តើមបានមេដាយមាសច្រើនជាងគេ គឺអង្គភាពកីឡាក្រសួងមហាផ្ទៃដែលដណ្ដើមបានមេដាយសរុបចំនួន១៤៩គ្រឿងក្នុងនោះមេដាយមាស៨៣គ្រឿង មេដាយប្រាក់៤៣គ្រឿង និងមេដាយសំរឹទ្ធ២៣គ្រឿង៕
ចែករំលែកព័តមាននេះ