ខេត្តកណ្តាល ៖ តូបលក់ដូរប្រមាណ២០០ និងផ្ទះ៦ល្វែងនៅក្នុងផ្សារកោះធំ ស្ថិតក្នុងភូមិព្រែកថ្មី ឃុំព្រែកថ្មីស្រុកកោះធំ ត្រូវបានព្រះអគ្គីលេបត្របាក់អស់ស្រុងរួមទាំងទំនិញគ្រប់ប្រភេទ និងទ្រព្យសម្បត្តិមួយចំនួនទៀត ដែលគិតពីតម្លៃនៃការបាត់បង់នេះគឺច្រើនឥតគណនា កាលពីម៉ោង២និង៣០នាទីរំលងអធ្រាតឈានចូលថ្ងៃទី២២ កុម្ភៈ ។ ទោះបីជាបែបណាមិនបណ្តាលឱ្យមានមនុស្សណាម្នាក់ស្លាប់ ឬរងរបួសឡើយ ប៉ុន្តែទ្រព្យសម្បតិ្តរបស់អាជីវករបានត្រូវឆេះហ្មត់អស់ទាំងស្រុង ។ មូលហេតុដែលនាំឱ្យកើតមានអគ្គិភ័យនេះ តាមការសន្និដ្ឋានជំហានដំបូងត្រូវបានគេអះអាងថា បណ្តាលមកពីទុស្សេចរន្តអគ្គិសនីចេញពីតូបមួយនៅកណ្តាលផ្សារ ។
លោកចាន់ សុខុម អភិបាលស្រុកកោះធំមានប្រសាសន៍ឱ្យដឹងថា អាជ្ញាធរនិងសមត្ថកិច្ចពុំទាន់ធ្វើការវាយតម្លៃពីការឆេះផ្សារអស់គិតជាទឹកប្រាក់ប៉ុន្មាននោះឡើយ ប៉ុន្តែតូបដែលត្រូវអន្តរាយដោយសារភ្លើងឆេះនេះគឺអស់ទាំងស្រុងនោះចំនួន២០០តូប រួមទាំងសម្ភារទំនិញ និងទ្រព្យសម្បត្តិ ។ ចំណែកផ្ទះចំនួន៦ល្វែងដែលនៅក្បែរនោះក៏ត្រូវឆេះអស់ប្រមាណ៧០ភាគរយផងដែរ ។ បើតាមប្រជាពលរដ្ឋនៅទីនោះបានប្រាប់ឱ្យដឹងថា ហេតុការណ៍ឆេះផ្សារនេះ គឺភ្លើងបានឆេះចេញពីចំណុចកណ្តាលនៃផ្សារមកមុនតែម្តង ប៉ុន្តែមិនដឹងតូបណានោះទេ ដោយសារភ្លើងឆេះរាលដាលខ្លាំងទៅហើយទើបដឹង ។ ក្នុងគ្រោះមហន្តរាយនេះអត់មានម្ចាស់តូបណាម្នាក់យកទំនិញនិងទ្រព្យសម្បតិ្តរបស់ខ្លួនចេញទាន់ឡើយព្រោះម្ចាស់តូបចាក់សោហើយទៅសម្រាកនៅឯផ្ទះរៀងៗខ្លួន ។ ប្រភពបានឱ្យដឹងទៀតថា ភ្លើងបានឆាបឆេះយ៉ាងខ្លាំងក្នុងរយៈពេលតែកន្លះម៉ោងដោយសារតែតូបខ្លះមានធុងហ្គាសធំៗនៅក្នុងនោះ គឺខណៈពេលភ្លើងកំពុងឆេះបានផ្ទុះលាន់ឮសំឡេងយ៉ាងកក្រើករណ្តំបណ្តាក់គ្នាមិនឈប់ឈរ ។ នៅពេលភ្លើងឆេះពេញបន្ទុកអ្នកផ្សារដែលមានផ្ទះល្វែងនៅក្បែរៗនោះបាននាំគ្នាបើករ៉ូប៊ីណេទឹកបាញ់ ដើម្បីការពារកុំឱ្យភ្លើងឆេះរាលដាលផ្ទះរបស់ខ្លួន ខ្លះទៀតប្រញាប់ប្រញាល់ជញ្ជូនទ្រព្យសម្បត្តិមានតម្លៃចេញពីក្នុងផ្ទះទាំងភាពស្លន់ស្លោបំផុត ។
អ្នកផ្សារនិយាយបន្តទៀតថា ចាប់តាំងពីភ្លើងឆាបឆេះនៅម៉ោង២និង៣០នាទីរហូតដល់ម៉ោង៣និង៣០នាទីទៀបភ្លឺ ទើបមានរថយន្តពន្លត់អគ្គិភ័យជាច្រើនគ្រឿងទៅដល់ និងបានត្រឹមតែធ្វើអន្តរាគមន៍បាញ់ការពារកុំឱ្យមានការឆេះរាលដាលបន្តដល់ផ្ទះនៅជុំវិញផ្សារប៉ុណ្ណោះ និងបាញ់ទឹកពន្លត់រងើកភ្លើងដែលកំពុងឆេះយ៉ាងងំនោះ ។
លោកសែ សារឿន ស្នងការរងប៉ូលិសខេត្តកណ្តាលបានប្រាប់ឱ្យដឹងថា ក្រោយពីទទួលបានព័ត៌មានភ្លើងឆេះផ្សារនៅស្រុកកោះធំភ្លាមរថយន្តពន្លត់អគ្គិភ័យ១០គ្រឿង ក្នុងនោះមានរថយន្តរបស់ខេត្តនិងរាជធានីភ្នំពេញបានចេញអន្តរាគមន៍ភ្លាមៗ ប៉ុន្តែដោយកន្លែងកើតហេតុនៅឆ្ងាយពេកប្រើរយៈពេលប្រមាណ១ម៉ោងទើបទៅដល់ហើយធ្វើការបាញ់ពន្លត់ជាបន្ទាន់ ។ ដោយសារភ្លើងឆេះខ្លាំងទៅហើយគឺបានត្រឹមតែជួយបាញ់ទឹកការពារកុំឱ្យភ្លើងឆេះឆ្លងរាលដាលដល់ផ្ទះនៅជុំវិញប៉ុណ្ណោះ ខណៈផ្ទះ៦ល្វែងក៏បានក្លាយជាចំណីភ្លើងរួចទៅហើយនោះ ។ ប៉ុន្តែចាត់ទុកថា សំណាងល្អ ដែលកម្លាំងរថយន្តពន្លត់អគ្គិភ័យធ្វើការទប់ស្កាត់កុំអីអាចនឹងកើតហានិភ័យធ្ងន់ធ្ងរជាងនេះទៀត ព្រោះនៅជុំវិញផ្សារនោះគឺសុទ្ធតែលំនៅឋានដូចម្រាមដៃ និងជាពិសេសគឺមានដេប៉ូលក់ប្រេងឥន្ធនៈមួយកន្លែងផងដែរ នៅជិតផ្សារនោះ ។
លោកស្នងការរងបានឱ្យដឹងទៀតថា រយៈពេលជាងមួយម៉ោងក្រោយមកទៀតទើបអាចគ្រប់គ្រងសភាពការណ៍បាន ដោយរថយន្តពន្លត់អគ្គិភ័យ១០គ្រឿងបានបាញ់អស់ទឹកចំនួន១៧ជើងរហូតដល់ម៉ោង៧ព្រឹក ក្រុមអន្តរាគមន៍ក៏នៅតែបន្តបាញ់ពន្លត់១០០ភាគរយ ហើយនៅវេលាម៉ោង៩ព្រឹកកម្លាំងប៉ូលិសជិត១០០នាក់និងកម្លាំងកងរាជអាវុធហត្ថ៤០នាក់មកជួយថែរក្សាសន្តិសុខជុំវិញផ្សារដែលក្លាយជាចំណីភ្លើងនោះ ។
លោកមុយ ចាន់ពេជ្រ អធិការប៉ូលិសស្រុកកោះធំបានប្រាប់ឱ្យដឹងដែរថា តាមការសន្និដ្ឋានជំហ៊ានដំបូងមូលហេតុដែលឆេះផ្សារនេះគឺសង្ស័យមកពីទុស្សេចរន្តអគ្គិសនី ។ ចំណែកការខូចនេះដែលគិតជាសាច់ប្រាក់អស់ប៉ុន្មាននោះ គឺមិនទាន់មានតួលេខទេ ដោយខាងសមត្ថកិច្ចនិងអាជ្ញាធរកំពុងធ្វើការសាកសួរម្ចាស់តូបជាជនរងគ្រោះទាំងនោះសិន ។
បើតាមការសន្និដ្ឋានរបស់ប្រជាពលរដ្ឋគឺការខូចខាតសរុបជាទឹកប្រាក់រាប់លានដុល្លារ ព្រោះសម្ភារទ្រព្យសម្បត្តិត្រូវឆេះអស់ទាំងស្រុងមានតូបលក់មាសប្តូរប្រាក់ លក់គ្រឿងអលង្ការ គ្រឿងទេស និងសម្លៀកបំពាក់ជាដើម ។ នេះជាមហាវិនាសកម្មដ៏ធំមួយដែលមិនធ្លាប់មានកន្លងមកនោះទេនៅស្រុកកោះធំ ជាស្រុកដែលមានភូមិសាស្ត្រជាប់នឹងប្រទេសវៀតណាម ៕
ចែករំលែកព័តមាននេះ