គិតត្រឹមថ្ងៃ១ កញ្ញា! ជនភៀសសឹកជិត២ពាន់គ្រួសារ បន្តស្នាក់នៅតាមទីតាំងសុវត្ថិភាព ក្នុងខេត្តសៀមរាប
- សៀមរាប
ខេត្តសៀមរាប ៖ គិតត្រឹមល្ងាចថ្ងៃទី១ ខែកញ្ញា ឆ្នាំ២០២៥ មានបងប្អូនប្រជាពលរដ្ឋជាជនភៀសសឹកចំនួន ១ ៨៩០គ្រួសារ ស្មើនឹង ៦…
ខេត្តសៀមរាប ៖ គិតត្រឹមល្ងាចថ្ងៃទី១ ខែកញ្ញា ឆ្នាំ២០២៥ មានបងប្អូនប្រជាពលរដ្ឋជាជនភៀសសឹកចំនួន ១ ៨៩០គ្រួសារ ស្មើនឹង ៦ ១០៧នាក់ បានកំពុងបន្តស្នាក់នៅតាមទីតាំងសុវត្ថិភាពទូទាំងខេត្តសៀមរាប ក្រោមការយកចិត្តទុកដាក់ខ្ពស់ពីអាជ្ញាធរខេត្ត និងមន្ត្រីពាក់ព័ន្ធ។
យោងតាមរបាយការណ៍របស់រដ្ឋបាលខេត្ត ក្នុងចំណោម ១ ៨៩០គ្រួសារខាងលើ មានអ្នកកំពុងស្នាក់នៅតាមបណ្ដាទីតាំងសុវត្ថិភាពដែលរៀបចំដោយរដ្ឋបាលខេត្ត និងរដ្ឋបាលក្រុង ស្រុកចំនួន ៩៩០គ្រួសារ ស្មើនឹង ៣ ១៦៥ នាក់ និងចំនួន ៩០០គ្រួសារ ស្មើនឹង ២ ៩៤២ នាក់ បានកំពុងស្នាក់នៅតាមផ្ទះប្រជាពលរដ្ឋ ខណៈ ថ្ងៃទី១ ខែកញ្ញា បងប្អូនជន ភៀសសឹកចំនួន ២៣៤គ្រួសារ ស្មើនិង ៧៨១ នាក់ បានវិលត្រឡប់ទៅកាន់លំនៅឋានរបស់ខ្លួនវិញ ហើយចំពោះទីតាំងសុវត្ថិភាពក៏មានការថយចុះចំនួន៤ទីតាំងផងដែរ ។
ក្នុងនោះអាជ្ញាធរ ក៏បានជួបបញ្ហាមួយចំនួន ដូចជាពុំមានសម្ភារប្រើប្រាស់គ្រប់គ្រាន់ ដូចជាមុង ភួយ ថ្នាំមូស ធុងទឹក សម្ភារផ្ទះបាយ ខ្វះខាតបន្ទប់ទឹក បង្គន់អនាម័យ ទឹកស្អាត អគ្គិសនី និងការពារសត្វអាសិរពិសដើម ។
ក្នុងន័យនេះ អាជ្ញាធរខេត្តសូមអំពាវនាវដល់សប្បុរសជនទាំងក្នុង និងក្រៅប្រទេស បន្តចូលរួមឧបត្ថម្ភ ជាគ្រឿង ឧបភោគបរិភោគ សម្ភារប្រើប្រាស់ និង ថវិកា ជួយឧបត្ថម្ភដល់បងប្អូនជាជនភៀសសឹកដែលកំពុងបន្តស្នាក់នៅ ។
សូមបញ្ជាក់ផងដែរថា បងប្អូនជនភៀសសឹកទាំង១ ៨៩០គ្រួសារនេះ ដោយលំនៅឋានរបស់ពួកគាត់ស្ថិតក្នុងតំបន់ងាយរងគ្រោះបំផុត រួមនឹងគ្រួសារកងទ័ពផងដែរ ៕
ចែករំលែកព័តមាននេះ