រាជធានីភ្នំពេញ ៖ កម្ពុជា-ថៃបានសន្យារួមគ្នាថា នឹងជំរុញការកសាងតំបន់សេដ្ឋកិច្ចពិសេសតាមតំបន់ព្រំដែនរវាងខេត្តបន្ទាយមានជ័យ និងខេត្តស្រះកែវ និងរវាងខេត្តកោះកុង និងខេត្តត្រាត ឲ្យបានឆាប់តាមដែលអាចធ្វើទៅបាន ដើម្បីពង្រីកទំនាក់ទំនងពាណិជ្ជកម្មរវាងប្រទេសទាំងពីរ ខណៈដែលឆ្នាំ២០១៧កន្លងទៅ…
រាជធានីភ្នំពេញ ៖ កម្ពុជា-ថៃបានសន្យារួមគ្នាថា នឹងជំរុញការកសាងតំបន់សេដ្ឋកិច្ចពិសេសតាមតំបន់ព្រំដែនរវាងខេត្តបន្ទាយមានជ័យ និងខេត្តស្រះកែវ និងរវាងខេត្តកោះកុង និងខេត្តត្រាត ឲ្យបានឆាប់តាមដែលអាចធ្វើទៅបាន ដើម្បីពង្រីកទំនាក់ទំនងពាណិជ្ជកម្មរវាងប្រទេសទាំងពីរ ខណៈដែលឆ្នាំ២០១៧កន្លងទៅ ទំហំពាណិជ្ជកម្មរវាងប្រទេសទាំងពីរបានកើនដល់ជាង៦ពាន់លានដុល្លារអាមេរិក ។
ការសន្យាខាងលើនេះ ធ្វើឡើងក្នុងជំនួបពិភាក្សារវាងលោកឧបនាយករដ្ឋមន្ត្រី ហោ ណាំហុង និងលោក ប៉ាន់យ៉ារ៉ាក់ ពលទ័ព ឯកអគ្គរាជទូតថៃថ្មីប្រចាំកម្ពុជា កាលពីព្រឹកថ្ងៃទី៣០ ខែឧសភា ឆ្នាំ២០១៨កន្លងទៅ នៅទីស្តីការគណៈរដ្ឋមន្ត្រី ។
លោកឧបនាយករដ្ឋមន្ត្រី ហោ ណាំហុង មានប្រសាសន៍ថា មកដល់ពេលនេះ ចំណងមិត្តភាពកិច្ចសហប្រតិបត្តិការរវាងព្រះរាជាណាចក្រទាំងពីរកម្ពុជា-ថៃ កាន់តែរឹងមាំ និងបោះជំហានទៅមុខ ។
លោកឧបនាយករដ្ឋមន្ត្រីបានថ្លែងថា កន្លងមក កម្ពុជា-ថៃ បានបើកច្រកបន្ថែមតាមព្រំដែនរួចហើយ ដើម្បីបង្កើនទំនាក់ទំនងរវាងប្រជាពលរដ្ឋនៃប្រទេសទាំង២ ខណៈដែលភាគីថៃបាននិងកំពុងជួយកសាងស្ពានឆ្លងកាត់ស្ទឹងបត់ ហើយរំពឹងថា ច្រកស្ទឹងបត់ នឹងបើកក្នុងពេលឆាប់ៗនេះ ។ ទន្ទឹមនឹងនោះ ភាគីកម្ពុជា-ថៃ ក៏បាននិងកំពុងពិភាក្សាបើកច្រកអូរនាងផងដែរ ប៉ុន្តែតាមដឹង ភាគីថៃបានត្រៀមរួចរាល់អស់ហើយក្នុងការបើកច្រកអូរនាង បើទោះបីជាភាគីកម្ពុជាមិនទាន់បានត្រៀមក៏ដោយ ។
ឯកអគ្គរាជទូតថៃ លោក ប៉ាន់យ៉ារ៉ាក់ ពលទ័ព បានថ្លែងដោយកត់សម្គាល់ថា រយៈពេលប៉ុន្មានឆ្នាំចុងក្រោយនេះ ប្រទេសកម្ពុជាមានការរីកចម្រើនខ្លាំងគួរឲ្យកត់សម្គាល់ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជានាយករដ្ឋមន្ត្រី ។ លោកក៏បានកោតសរសើរផងដែរចំពោះការអនុវត្តនយោបាយឈ្នះ-ឈ្នះ របស់សម្តេចតេជោ ហ៊ុន សែន ដែលបានផ្តោតសំខាន់លើកត្តាស្ថិរភាពនយោបាយ និងសន្តិភាព។ ផ្តើមពីនោះ លោកក៏បានសន្យាថា នឹងជំរុញទំនាក់ទំនងរវាងកម្ពុជា-ថៃឲ្យកាន់តែរីកចម្រើន និងរឹងមាំបន្ថែមទៀតនៅគ្រប់កាលៈទេសៈ ។
ប្រមុខរាជរដ្ឋាភិបាលនៃប្រទេសទាំងពីរកាលពីឆ្នាំ២០១៥ បានសន្យារួមគ្នាថា នឹងជំរុញទំហំពាណិជ្ជកម្មឲ្យបានដល់១៥ពាន់លានដុល្លារនៅឆ្នាំ២០២០ ខណៈដែលឆ្នាំ២០១៧កន្លងទៅនេះ ទំហំពាណិជ្ជកម្មកម្ពុជា-ថៃ មានប្រមាណជាង៦ពាន់លានដុល្លារ ។
ឆ្លៀតក្នុងឱកាសនោះ លោកឧបនាយករដ្ឋមន្ត្រី ហោ ណាំហុង ក៏បានស្នើឲ្យភាគីថៃនាំចូលទំនិញពីកម្ពុជាឲ្យបានកាន់តែច្រើនថែមទៀត ដើម្បីតុល្យភាពពាណិជ្ជកម្ម ។ ចំណែកពលករខ្មែរកំពុងធ្វើការនៅប្រទេសថៃវិញ លោកឧបនាយករដ្ឋមន្ត្រី បានថ្លែងអំណរគុណដល់ភាគីថៃ ដែលបានចុះបញ្ជីស្របច្បាប់សម្រាប់ពលករខ្មែរ ក្នុងពេលដែលភាគីកម្ពុជាក៏កំពុងតែជំរុញការធ្វើលិខិតឆ្លងដែនសម្រាប់ពលករខ្មែរទាំងអស់ ឲ្យបានកាន់តែលឿន ។ ជាមួយគ្នានេះ លោកឧបនាយករដ្ឋមន្ត្រី ក៏សូមអរគុណចំពោះភាគីថៃដែលបានតភ្ជាប់ផ្លូវដែកពីប៉ោយប៉ែតទៅអារញ្ញ ដែលបង្កលក្ខណៈងាយស្រួលដល់ការដឹកជញ្ជូនមុខទំនិញចេញចូលរវាងប្រទេសទាំងពីរ ៕
ចែករំលែកព័តមាននេះ