មើលលក្ខខណ្ឌ2នេះសិនចាំសម្រេចចិត្តស្រឡាញ់កីឡាការិនី អេ យ៉ានុត
- ភ្នំពេញ
រាជធានីភ្នំពេញ ៖ បន្ទាប់ពីមានព័ត៌មានជុំវិញកីឡាការិនី អេ យ៉ានុត មានគម្រោងភ្ជាប់ពាក្យជាមួយលោក អុិន សុខហៃ ជាសាច់ញាតិរបស់លោក ម៉ា…
រាជធានីភ្នំពេញ ៖ បន្ទាប់ពីមានព័ត៌មានជុំវិញកីឡាការិនី អេ យ៉ានុត មានគម្រោងភ្ជាប់ពាក្យជាមួយលោក អុិន សុខហៃ ជាសាច់ញាតិរបស់លោក ម៉ា សេរី អតីតអ្នកអត្ថាធិប្បាយកីឡាល្បីឈ្មោះ ហើយធ្វើឱ្យគ្រួសារខាងស្រីមានប្រតិកម្មយ៉ាងខ្លាំង និងថានោះជាព័ត៌មានមិនពិត ពេលនេះអ្នកស្រីជាម្ដាយបានអះអាងថា មិនហាមប្រាមកូនស្រីរឿងជ្រើសរើសគូស្រករនោះទេ សំខាន់ឱ្យតែអនាគតកូនប្រសារបស់ខ្លួនបើកចិត្តឱ្យអេ យ៉ានុត បន្តអាជីពកីឡា ដោយសារតែអ្នកស្រីមិនចង់ឱ្យបាត់បង់មរតកកីឡាបន្តពីលោក អេ ភូថង ជាឪពុក ។
អ្នកស្រីថា ក្រោយការទម្លាយថា កូនស្រីអ្នកស្រីត្រៀមភ្ជាប់ពាក្យរឿងរ៉ាវមួយនេះចាប់ផ្ដើមស្ងប់ស្ងាត់ ហើយអ្នកស្រីក៏បើកចិត្តទូលាយសម្រាប់កូនស្រីឱ្យមានអ្នកស្រឡាញ់ផងដែរ ឱ្យតែបុរសម្នាក់នោះចូលចែចូវដល់មេបា ។
អ្នកស្រី សាំង សុម៉ាលី ភរិយាលោកអេ ភូថង បានថ្លែងបញ្ជាក់ថា រវាងកូនស្រីនិងលោក អុិន សុខហៃ បុគ្គលិកនៅទូរទស្សន៍CNCនៅតែរាប់អានគ្នា បន្ទាប់ពីចាស់ៗគ្រួសារលោកធ្លាប់ចេញចូលរាប់អានគ្នា ហើយលោក និងកូនស្រី អេ យ៉ានុត ក៏រាប់អានគ្នា ដោយធ្លាប់បណ្ដើរគ្នាម្ដងពីរដងទៅញាំបង្អែម ។ យ៉ាងណាមិញ អ្នកស្រីថា អ្នកទាំងពីរមិនបានស្រឡាញ់គ្នាដល់ថ្នាក់ត្រូវរ៉ូវគ្នានោះ ដោយអ្នកស្រីហ៊ានអះអាងថាអ្នកទាំងពីរនៅជាមិត្តភក្តិច្រើនជាង ។
អ្នកស្រីទទួលស្គាល់ថា រវាងកូនស្រី និងបុរសនោះ ជិតស្និទ្ធគ្នា និងលេងសើចជាមួយគ្នាលើសពីមិត្តធម្មតា ប៉ុន្តែលោកសុខហៃ ដែលជាសាច់ញាតិរបស់លោក ម៉ា សេរី មិនដែលបង្ហាញទង្វើនិងសកម្មភាពណាមួយដែលអាចបញ្ជាក់ថា មានចិត្តចង់បានកូនស្រីអេ យ៉ានុត ម្ដងណាទេ ទើបអ្នកស្រីយល់ថា អ្នកទម្លាយដំណឹងថាកូនស្រីខ្លួន និងបុរសនោះត្រៀមភ្ជាប់ពាក្យ ឬស្រឡាញ់ គឺជារឿងដែលធ្វើឱ្យ អេ យ៉ានុត ខូចខាត។
អ្នកស្រីថា ខ្លួនអត់ត្រូវការជ្រើសរើសស្វាមីឱ្យអេ យ៉ានុត នោះទេ ពោលគឺបើកសិទ្ធិឱ្យនាងជ្រើសរើសដោយខ្លួនឯងឱ្យតែបុរសដែលនាងស្រឡាញ់ បើកផ្លូវឱ្យ អេ យ៉ានុត បានបន្តអាជីពកីឡា ដែលហោចណាស់ក៏អាចឱ្យនាងបានបំពេញការងារជាគ្រូបង្វឹក ឬជាកីឡាការិនីជម្រើសជាតិ ដែលមានមុខឡើងប្រកួតក្នុងព្រឹត្តិការណ៍ធំៗដែរ ។
អ្នកស្រីថា គិតមកដល់ពេលនេះ អេ យ៉ានុត ទើបតែរៀនដល់ថ្នាក់ទី១១ប៉ុណ្ណោះ ហើយម្យ៉ាងនៅក្មេងឡិកឡក់ៗមិនទាន់ចេះគិតផង ទើបអ្នកស្រីចេះតែតាមការពារ និងមិនទាន់ចង់ឱ្យគិតគូរគ្រួសារ ដោយអ្នកស្រីប្រកាសថា ហេតុផលដែលខ្លួនហាមប្រាម មិនមែនជាការឃាត់ឃាំងកូនស្រីនោះទេ ប៉ុន្តែជាការរៀបចំដើម្បីឱ្យអេ យ៉ានុត បាននឹងនរ និងចាស់ចិត្តចាស់គំនិតបានបន្តិច ទើបបើកផ្លូវឱ្យនាងមានស្នេហា ។
អ្នកស្រីមានគម្រោងឱ្យអ្នកដែលតាមស្រឡាញ់នាង មិនជាបុរសដែលគេផ្គូផ្គង ឬជាអ្នកណាដែលទទួលយកលក្ខខណ្ឌ២ មុននឹងចង់បានអេ យ៉ានុត ធ្វើជាអនាគត ដោយទី១ត្រូវរង់ចាំរហូតដល់រៀនមហាវិទ្យាល័យចប់ និងទី២ត្រូវបើកសិទ្ធិឱ្យនាងបានបន្តក្នុងអាជីពកីឡា ដើម្បីកុំឱ្យគ្រួសាររបស់អ្នកស្រីដាច់ពូជអ្នកប្រដាល់ ។
អ្នកស្រីថា ខ្លួនមិនមែនជាអ្នកមានបានទេ ប៉ុន្តែខ្លួនមានបំណងតស៊ូឱ្យកូនស្រីរៀនដល់ចប់មហា
វិទ្យាល័យ ដោយសារតែអ្នកស្រីចង់ឱ្យកូនស្រីមានការងារមួយល្អបន្ថែមពីលើអាជីពកីឡាកុំឱ្យពិបាកពឹងផ្អែកតែលើស្វាមី ។ អ្នកស្រីថា អេ យ៉ានុត មិនខុសពីក្មេងឡិកឡក់នោះទេហើយអ្នកស្រីប្រឆាំងដាច់ខាតសម្រាប់ការស្ដីដណ្ដឹងទុកដោយមិនព្រមរង់ចាំឱ្យនាងបានរៀនចប់ ។ ដោយសារអ្នកស្រីមិនចង់ឱ្យកូនបែកអារម្មណ៍សិក្សាមិនបានល្អនោះផងទើបអ្នកស្រីចេះតែចេញមុខការពារ ។
អ្នកស្រីថា ខ្លួននឹងឱ្យអេ យ៉ានុត ចូលរោងការក្នុងរង្វង់៥ទៅ៦ឆ្នាំទៀត ដោយសារអ្នកស្រីយល់ថា កូនស្រីគួរតែដល់ពេលនោះទើបសមល្មមនឹងមានគ្រួសារ ។ អ្នកស្រីសាំង សុម៉ាលី បន្តថា កូនស្រីរបស់ខ្លួនមកទល់ពេលនេះ មិនទាន់មានអ្នកណាស្រឡាញ់ពេញចិត្ត ឬចែចូវនៅឡើយទេ បន្ទាប់ ពីអ្នកស្រីប្រកាសជាមុនថា កូនស្រីអ្នកស្រីទាល់តែដល់អាយុ២៥ឆ្នាំទើបឱ្យមានគូ ។ យ៉ាងណាមិញអ្នកស្រីបញ្ជាក់ថា បើកូនស្រីក្រោយពេលរៀនចប់ក៏មានការងារច្បាស់លាស់ ហើយអនាគតស្វាមីរបស់នាងក៏មានជីវភាពល្អ នោះអ្នកស្រីក៏មិនឱ្យកូនស្រីបន្តអាជីពកីឡានោះដែរ ដោយសារតែអាជីពមួយនេះក៏មិនអាចឱ្យនាងមានបានទៅបាន។
លោក អេ ភូថង ជាឪពុកក៏បានប្រកាសថា ករណីភ្ជាប់ពាក្យ ឬគម្រោងភ្ជាប់ពាក្យ គឺលុះត្រាតែពេល អេ យ៉ានុត រៀបចប់ថ្នាក់ទី១២យ៉ាងហោច ប៉ុន្តែសម្រាប់រូបលោកមិនទាន់ចង់ឱ្យកូនស្រីមានពាក់ព័ន្ធនឹងបុរសណាទេ ទើបលោក និងភរិយាការពារធ្វើឱ្យកូនស្រីមូលអារម្មណ៍តែនឹងការសិក្សាត្រៀមប្រឡងបញ្ចប់ថ្នាក់ទី១២នៅឆ្នាំក្រោយ និងយូរៗម្ដងឡើងប្រកួតតំណាងប្រទេស ។
លោកថា មិនចង់ឃើញកូនស្រីមានប្ដីសីទេ ដរាបណាកូនស្រីមិនទាន់មានសមត្ថភាពធ្វើការបន្ថែមពីលើអាជីពកីឡាច្បាស់លាស់ ហើយលោកមិនត្រូវការទេសម្រាប់ស្ថានភាពអនាគតកូនប្រសាប្រកាសចិញ្ចឹមកូនស្រីដោយមិនឱ្យធ្វើការរកលុយ ក្រោយពេលពិធីរៀបការត្រូវបានកើតឡើងនោះ ។ លោកនិយាយថា«សម្រាប់កូនស្រី យើងអត់ដឹងថា ស្វាមី គាត់ជាអ្នកមានឬមនុស្សប្រភេទយ៉ាងម៉េចទេ ប៉ុន្តែខ្ញុំ និងភរិយានៅតែចង់ឱ្យកូនរៀនចប់សិនបានឱ្យមានប្ដី អត់ចង់ឱ្យកូនទៅស៊ីលើគេ ហើយស្អីក៏មិនមានក្នុងខ្លួននោះទេ!»។
អ្នកស្រី សាំង សុម៉ាលី បន្តថា សម្រាប់កូនស្រី អ្នកស្រីអត់មានត្រូវការបង្ខាំងទុកនោះទេ គឺត្រូវតែឱ្យមានអនាគត ប៉ុន្តែបើរៀបចំដោយឆិនឆៃ ហើយមិនបានគិតគូរឱ្យបានវែងឆ្ងាយ គឺអ្នកស្រីសុខចិត្តជំទាស់ ជាពិសេសសម្រាប់អ្នកចង់បានកូនស្រីរបស់ខ្លួនហើយមានគំនិតចង់រៀបការឆាប់ៗឬចង់ឱ្យនាងបោះបង់ទាំងស្រុងពីការប្រដាល់ ឬពីជាកីឡាការិនីជម្រើសជាតិ ។ អ្នកស្រីថា ការប្រកួតកីឡាកូនស្រីរបស់ខ្លួនរវល់តែអំឡុងពេលត្រូវប្រកួតថ្នាក់ជាតិ និងក្រៅស្រុកម្ដងៗប៉ុណ្ណោះ ដូច្នេះបើទោះជានាងត្រូវរៀនថ្នាក់ទី១២ ឬមានស្វាមីហើយ ក៏អាចបន្តបានដែរ ទើបអ្នកស្រីចង់ឱ្យនាងបន្តកសាងកេរ្តិ៍ឈ្មោះសិន ចាំដល់អាយុរាងជ្រេបន្តិចឱ្យនាងធ្វើជាគ្រូបង្វឹក ឬឱ្យលាឈប់ដាច់ក៏មិនថ្វីនោះដែរ ៕
ចែករំលែកព័តមាននេះ